పరిశుభ్రతపై అవగాహన కోసం ఓపాఠశాల వినూత్న కార్యక్రమం..ఫీజు బదులు చెత్త తీసుకొంటూ

పరిశుభ్రతపై ఎవరూ ఊహించని విధంగా చిన్నారుల మెదుళ్లలో అది మోలిచేలా ఓ పాఠశాల యాజమాన్యం వినూత్న కార్యక్రమం చేపట్టింది. ప్రపంచవ్యాప్తంగా వాతావరణ పరిస్థితులు దారుణంగా ఉన్నాయి. పీల్చే గాలి, తాగే నీళ్లు.. ఇలా అన్ని కలుషితం అయిపోయాయి. అడవులు క్షీణించిపోయాయి. వర్షాలు తగ్గిపోయాయి. ఎండలు పెరిగిపోయాయి. ఈ నేపథ్యంలో బీహార్‌లో ఓ పాఠశాల వినూత్నమైన నిర్ణయం తీసుకుంది. పర్యావరణ పరిరక్షణ కోసం నడుం బిగించింది. బీహార్‌లోని ఓ పాఠశాల... మొక్కల పెంపకం, పరిశుభ్రతం వంటి వాటిపై పిల్లలకు అవగాహన పెంచాలని నిర్ణయం తీసుకుంది. దీంతోపాటు ఇంకో వినూత్న కార్యక్రమానికి కూడా శ్రీకారం చుట్టింది.

బోద్‌గయ దగ్గర సేవా బిఘా ప్రాంతంలోని పద్మపాణి  పాఠశాల పర్యావరణ పరిరక్షణను బాధ్యతగా భావించింది. స్కూల్లో ఫీజుకు బదులుగా ప్లాస్టిక్ వ్యర్థాలను స్వీకరిస్తారు. ఇంట్లో పోగయ్యే చెత్తను, వ్యర్థాలను తీసుకురావాలని స్కూల్ యాజమాన్యం విద్యార్థులకు చెప్పింది. దీంతో పిల్లలు రోజు ఇంటి నుంచి చెత్త తీసుకొచ్చి పాఠశాల గేటు దగ్గర ఉన్న డస్ట్‌ బిన్‌లో వేస్తుంటారు. పరిసరాలు శుభ్రంగా ఉంచుకోవాలనే ఆలోచనని పెంచాలనే ఉద్దేశంతో ఇలా చేస్తున్నామని పాఠశాల యాజమాన్యం వెల్లడించింది.

అలా సేకరించిన వ్యర్థాలను ప్రతిరోజూ రీసైకిల్ చేయడానికి పంపిస్తారు. వాటిని విక్రయించడంతో పాఠశాల ఆదాయం పొందుతుంది. వచ్చిన ఆ డబ్బును పిల్లల చదువులకు, యూనిఫామ్, నోట్ బుక్స్ కొంటూ ఉంటారు. పిల్లలకు సామాజిక బాధ్యతను పెంచేందుకే ఫీజుకు బదులుగా చెత్తను తీసుకుంటున్నామని

పద్మపాణి స్కూల్ హెడ్ మాస్టర్ మీరా కుమారి చెప్పారు. దీంతో చిన్నప్పటి నుంచే పర్యావరణంపై అవగాహన ఏర్పడుతుందన్నారు.

ఈ పాఠశాలకు మరో ప్రత్యేకత కూడా ఉంది. పర్యావరణ పరిరక్షణ విషయంలోనే కాదు... మరో విషయంలో మిగతా స్కూళ్లకు ఆదర్శంగా నిలుస్తుంది. పద్మపాణి స్కూల్‌కు విద్యుత్ కనెక్షన్ లేదు. సోలార్ పవర్ ద్వారా అవసరమైన కరెంట్‌ను సొంతంగా ఉత్పత్తి చేసుకుంటున్నారు. తద్వారా వాతావరణ కాలుష్యం తగ్గించేందుకు ఈ స్కూల్ తమ వంతుగా ఇలా కృషి చేస్తుంది.

పద్మపాణి స్కూల్‌ను 2014లో స్థాపించారు. స్కూల్లో ఒకటో తరగతి నుంచి ఎనిమిదో తరగతి వరకు పాఠాలు చెబుతారు. ఇక్కడ మెరుగైన విద్య నేర్పడంతో పాటు మన సంస్కృతిపై అవగాహన కల్పిస్తున్నారు. పాఠశాలలో ఉచితంగా విద్యను అందించడమే కాదు.. ఉచితంగా ఆహారం, పుస్తకాలు, స్టేషనరీ తదితర వాటిని కూడా యాజమాన్యమే అందిస్తుంది. మొత్తానికి ఈ పాఠశాల ఆఫర్ .. చాలా బాగుంది. అందుకే చాలామంది ఈ స్కూల్లో విద్యార్థులను చేర్పించేందుకు ఉత్సాహం చూపుతున్నారు.