నోటీ దూల ఫలితం..రోడ్ సైడ్ రోమియోకు బుద్ది చెప్పిన కోర్టు
national | Suryaa Desk | Published : Wed, Oct 26, 2022, 11:55 PM
రోడ్ సైడ్ రోమియోలు ఇక జాగ్రత్త..అమ్మాయిలను టీజ్ చేస్తే ఇలాంటివి అనుభవించాల్సి ఉంటుంది మరి. అమ్మాయిని ‘ఐటెమ్’ అని పిలిచిన ఓ యువకుడు భారీ మూల్యాన్ని చెల్లించుకున్నాడు. కోర్టు అతడికి ఏడాదిన్నర జైలు శిక్ష విధించింది. ముంబైలో జరిగిన ఈ కేసుకు సంబంధించి పూర్తి వివరాల్లోకి వెళ్తే.. 25 ఏళ్ల యువకుడు తనను లైంగికంగా వేధించాడంటూ 16 ఏళ్ల బాలిక 2015లో కేసు పెట్టింది. 14 జులై 2015న తాను స్కూలు నుంచి ఇంటికెళ్తున్న సమయంలో యువకుడు తనను బైక్‌పై వెంబడించాడని, ఆ తర్వాత జుట్టు పట్టుకుని లాగుతూ.. ‘క్యా ఐటెమ్ కిదర్ జా రహీ హో’ (ఏం ఐటెమ్.. ఎక్కడికెళ్తున్నావ్?) అని వేధించాడని ఆరోపించింది. విచారణ చేపట్టిన పోక్సో కోర్టు.. అమ్మాయిలను లైంగికంగా వేధించేందుకు అబ్బాయిలు ఉద్దేశపూర్వకంగానే అలా పిలుస్తారని పేర్కొంది. ఇలాంటి రోడ్‌సైడ్ రోమియోలకు బుద్ధి చెప్పాల్సిందేనని వ్యాఖ్యానించింది. నిందితుడి విషయంలో కనికరం చూపించే ప్రసక్తే లేదని పేర్కొంటూ ఏడాదిన్నర జైలు శిక్ష విధించింది.
|
|