శవాన్ని పెళ్లాడి...ప్రేమను వ్యక్తంచేసిన ప్రియుడు

ప్రేమ గుడిదే కాదు పెద్ద మనస్సున్నది కూడా. ఈ క్రమంలోనే నిజమైన ప్రేమకు హద్దులు లేవని ఓ యువకుడు నిరూపించాడు. ప్రేమించిన అమ్మాయిని మోసం చేసి వేరేవారిని పెళ్లి చేసుకోవడం, ప్రేమించిన అమ్మాయిలను కూడా హత్య చేసేందుకు ప్రయత్నిస్తున్న ఈ కాలంలో ఓ యువకుడు తన ప్రియురాలి పట్ల స్వచ్ఛమైన ప్రేమను చాటుకున్నాడు. ప్రాణంగా ప్రేమించిన ప్రేయసి చనిపోవడాన్ని భరించలేని ఈ యువకుడు.. ఆమె మృతదేహానికి తాళి కట్టి పెళ్లి చేసుకున్నాడు. ప్రియురాలి పట్ల ఈ యువకుడి ప్రేమను చూసి అందరూ ఆశ్చర్యపోతున్నారు.

చనిపోయిన ప్రేయసి శవానికి ప్రియుడు తాళి కట్టిన ఘటన అసోంలోని మోరిగావ్ జిల్లాలో చోటుచేసుకుంది. మోరిగావ్‌కు చెందిన బిటుపన్ తములి అనే 27 ఏళ్ల యువకుడు.. కౌసువ గ్రామానికి చెందిన 24 ఏళ్ల ప్రాథనా బోరా అనే అమ్మాయితో ప్రేమలో పడ్డాడు. వీరిద్దరూ ఎప్పటినుంచో ప్రేమించుకుంటుండగా.. ప్రియురాలు అనారోగ్యానికి గురై ఆస్పత్రిలో చికిత్స పొందుతూ మరణించింది. ప్రేయసిని పెళ్లి చేసుకుని హ్యాపీగా జీవితం గడపాలని ఆశ పడ్డ యువకుడు.. ఆమె మరణాన్ని జీర్ణించుకోలేపోయాడు. దీంతో యువతి మృతదేహానికి తాళి కట్టి పెళ్లి చేసుకుని తన నిజమైన ప్రేమను చాటుకున్నాడు.

నుదిటిపై కుంకమ పెట్టి మెడలో దండవేసి తాళి కట్టాడు. యువతి కుటుంబసభ్యులు, బంధువుల ముందు తాళి కట్టి పెళ్లి చేసుకున్నాడు. ప్రాథనను తాను ప్రాణంగా ప్రేమించానని, ఆమె తన భార్య అని బిటుపన్ చెబుతున్నాడు. తాను ఇంకో పెళ్లి కూడా చేసుకోనని, జీవితాంతం ఒంటరిగా ఉంటానంటూ అతడు శపథం చేశాడు. చాలాకాలంగా వీరిద్దరు ప్రేమించుకుంటుండగా.. ప్రేమ పెళ్లికి కుటుంబసభ్యులు కూడా అంగీకరించారు. త్వరలోనే వీరిద్దరు పెళ్లి చేసుకోవాలని నిర్ణయించుకున్నారు. అంతలోపే ప్రేయసి మరణించడాన్ని ప్రియుడు తట్టుకోలేకపోతున్నాడు. ఇటీవల ప్రాథనా ఉన్నట్లుండి ఇంట్లోనే కుప్పకూలిపోయింది. దీంతో ఆమెను కుటుంబసభ్యులు గువహటిలోని ఓ ప్రైవేట్ ఆస్పత్రికి తరలించారు.

గత కొంతకాలంగా హాస్పిటల్‌లో ఆమె చికిత్స పొందుతుండగా.. డాక్టర్లు ఎంత ప్రయత్నాలు చేసినా ఆమెను కాపాడలేకపోయారు. ప్రియురాలి మరణంతో వెక్కివెక్కి ఏడుస్తూ బటుపన్ దగ్గరుండి ఆమె అంత్యక్రియలు నిర్వహించాడు. అంత్యక్రియులు పూర్తయ్యే వరకు ఏడుస్తూనే ఉన్నాడు. దీనిపై ప్రాథనా సోదరుడు శుభోన్ మాట్లాడుతూ.. 'బిటుపన్ రాగానే ఆమెను పెళ్లి చేసుకోబోతున్నట్లు మాకు చెప్పాడు. ఇది మేము అసలు ఊహించలేదు. కొద్దిసేపు ఏమీ అర్థం కాలేదు. నా సోదరిని ఇంత గాఢంగా ప్రేమించాడని అనుకోలేదు. మేము అతడిని ఆపలేకపోయాం. నా సోదరి నిజంగా అదృష్టవంతురాలు. ఆమె బిటుపన్‌ను పెళ్లి చేసుకోవాలని అనుకుంది. బిటుపన్ ఆమె కోరికను నెరవేర్చాడు. ఇంతకంటే ఏం చెప్పాలి?' అని తెలిపాడు.