రాకపోతే మాత్రం సీమ ద్రోహులే...మంత్రి బుగ్గన రాజేంద్రనాథ్ రెడ్డి

పరిపాలనా వికేంద్రీకరణకు మద్దతుగా ఈ నెల 5వ తేదీన కర్నూలులో రాయలసీమ గర్జన పేరుతో భారీ సభ నిర్వహిస్తున్నామని రాష్ట్ర ఆర్థిక శాఖ మంత్రి మంత్రి బుగ్గన రాజేంద్రనాథ్‌రెడ్డి వెల్లడించారు. ఈ మేరకు కర్నూలులో శనివారం మంత్రి బుగ్గన మీడియాతో మాట్లాడుతూ.. రాయలసీమ జేఏసీ, వ్యాపార సంఘాలు, ఉద్యోగ సంఘాలు, విధ్యార్థి యువజన సంఘాలు ఈ గర్జనలో పాల్గొంటాయని వెల్లడించారు. రాయలసీమ గర్జన సభకు రానివాళ్లు సీమ ద్రోహులుగా మిగులుతారని రాజేంద్రనాథ్ రెడ్డి అన్నారు. ఈ మేరకు మంత్రి బుగ్గన శనివారం కర్నూలులో మీడియాతో మాట్లాడారు

రాయలసీమ బాగా వెనుకబడిందని, ఈ ప్రాంతానికి భౌగోళికంగా వాతావరణం అనుకూలంగా లేదన్నారు. వర్షాలు ఎపుడు వస్తాయో గ్యారెంటీ లేదని.. అందుకే, 1937లో పెద్దల సమక్షంలో శ్రీభాగ్ ఒప్పందం జరిగిందని గుర్తు చేశారు. వెనుకబడిన రాయలసీమ ప్రాంతంలో రాజధాని లేదా హైకోర్టు ఏర్పాటు చేయాలని ఆ ఒప్పందంలో పేర్కొందని గుర్తుచేశారు. అలాగే, కృష్ణ జలాలను 10 ఏళ్లు వాడుకోవాలని, అవసరమైతే పొడిగించాలని ఒప్పందం జరిగిందన్నారు. 1953 ఆంధ్ర రాష్ట్రంలో కర్నూలును రాజధానిగా ఏర్పాటు చేయాలని కూడా నిర్ణయం జరిగిందన్నారు.

1956లో తెలంగాణ కలిశాక ఆంధ్రప్రదేశ్ ఏర్పాటయ్యాక కర్నూలు నుంచి రాజధానిని తరలించినా రాయలసీమ వాసులు పెద్ద మనసుతో ఒప్పుకున్నారని మంత్రి బుగ్గన గుర్తుచేశారు. 2014లో రాష్ట్ర విభజనతో రాయలసీమ ప్రాంతం వందేళ్లు వెనక్కు వెళ్లిందని ఆవేదన వ్యక్తం చేశారు. చంద్రబాబు నవ్యాంధ్ర సీఎం అయ్యాక ఒకే చోట రాజధాని, హైకోర్టు, హెల్త్ సిటీ, టూరిజం సిటీ ఏర్పాటు చేశారని.. కానీ, వైఎస్‌ జగన్మోహన్ రెడ్డి ముఖ్యమంత్రి అయ్యాక అధ్యయనం చేసి, సంప్రదింపులు జరిపి అభివృద్ధి వికేంద్రీకరణ నిర్ణయం తీసుకున్నారని తెలిపారు.

వెనకబడ్డ రాయలసీమ, ఉత్తరాంధ్ర ప్రాంతాలను అభివృద్ధి చేయాలని సీఎం జగన్ నిర్ణయించారని మంత్రి బుగ్గన చెప్పారు. అందుకే పరిపాలన రాజధాని విశాఖలో, అమరావతిలో అసెంబ్లీ, న్యాయరాజధాని కర్నూలులో ఏర్పాటు చేయాలని నిర్ణయించారని తెలిపారు. సీఎం జగన్‌ గర్వంగా అన్ని ప్రాంతాలు అభివృద్ధి చేస్తామని ప్రకటించారని కొనియాడారు.

ఇక, రాయలసీమ గర్జన ద్వారా రాష్ట్ర ప్రజలకు ఒక మెసేజ్ పంపాలని నిర్ణయం తీసుకున్నట్టు బుగ్గన రాజేంద్రనాథ్‌రెడ్డి తెలిపారు. సుప్రీం కోర్టు కూడా రాజధాని నిర్ణయం ప్రభుత్వానిదని చెప్పిందని గుర్తు చేశారు. శివరామకృష్ణన్ కమిటీ అధ్యయనం చేసి కేంద్రీకరణ మంచిది కాదని తేల్చిందని.. వికేంద్రీకరణ చేయాలని సూచించిందని పేర్కొన్నారు. రాయలసీమ గర్జనకు వైసీపీ సంపూర్ణ మద్దతు ఉంటుందని వెల్లడించారు.

కొందరు పెద్ద నాయకులు కూడా జేఏసీ సభను విమర్శించడం దారుణమని మంత్రి బుగ్గన మండిపడ్డారు. ఇలాంటి సమయంలో ప్రతిపక్ష పార్టీల నాయకులు చిన్న తరహా ఆలోచన చేయవద్దని.. మీరూ కలసి రావాలని పిలుపునిచ్చారు. సభకు రాకపోతే వాళ్లు రాయలసీమ ద్రోహులుగా మిగులుతారని హెచ్చరించారు. హైకోర్టు రాయలసీమ హక్కు అని తేల్చిచెప్పారు.