అందుకోసం బ్యాంకులు, కస్టమర్ల మధ్య కచ్చితంగా ఒప్పంద పత్రం ఉండాల్సిందే

బ్యాంకులు తాజాగా ఒక్కో విషయానికి ఒక్కో నిబంధన తీసుకొస్తోంది. తాజాగా బ్యాంక్ లాకర్లకు సంబంధించి ఇటీవల కొత్త నిబంధనలు అమల్లోకి వచ్చిన విషయం తెలిసిందే. దీని ప్రకారం.. బ్యాంక్ లాకర్లకు సంబంధించి.. బ్యాంకులు, కస్టమర్ల మధ్య కచ్చితంగా ఒప్పంద పత్రం ఉండాలని నిబంధనలు చెబుతున్నాయి. ఆ ఒప్పందాన్ని 2022 డిసెంబర్ 31లోగా పునరుద్ధరించుకోవాలని కూడా స్పష్టం చేసింది రిజర్వ్ బ్యాంక్ ఆఫ్ ఇండియా. ఆ తేదీ ముగిసిపోయింది. కొత్త సంవత్సరం కూడా వచ్చింది. అయితే.. ఇంకా చాలా మంది ఆ ఒప్పందాన్ని పునరుద్ధరించుకోలేదు. ఇదే క్రమంలో బ్యాంకులు కూడా ఇంకా తమ కస్టమర్లు అందరికీ దీనిపై సమాచారం ఇవ్వలేదని, అవగాహన కల్పించలేదని చెబుతున్నాయి. దీంతో ఆర్బీఐ వెనక్కి తగ్గింది.

కస్టమర్లు.. తమ లాకర్ ఒప్పందాన్ని పునరుద్ధరించుకునేందుకు మరో ఏడాది గడువు ఇచ్చింది. అంటే 2023, డిసెంబర్ 31లోగా ఈ ప్రక్రియ పూర్తిచేసుకోవచ్చని ఆర్బీఐ స్పష్టం చేసింది. అయితే ఇది దశల వారీగా పూర్తిచేయాలని బ్యాంకులకు కీలక సూచనలు జారీ చేసింది. మారిన నిబంధనలకు అనుగుణంగా బ్యాంక్ లాకర్ల ఒప్పందాన్ని పునరుద్ధరించుకోవాలని ఏప్రిల్ 30లోగా కస్టమర్లందరికీ బ్యాంకులు తెలియజేయాలని పేర్కొంది. జూన్ 30 లోపల 50 శాతం మంది, సెప్టెంబర్ 30 లోపల 75 శాతం మంది కస్టమర్లు కొత్త అగ్రిమెంట్లపై సంతకాలు చేయాలని వెల్లడించింది. ఈ ప్రక్రియ కస్టమర్లకు అర్థమయ్యేలా, వేగంగా జరిగేలా చూడటం బ్యాంకుల బాధ్యత అని వివరించింది.

అయితే.. బ్యాంకులు, కస్టమర్లకు మధ్య లాకర్ల ఒప్పందంలో భాగంగా.. బ్యాంకులు ఒక డూప్లికేట్ (నకలు) పత్రాన్ని కస్టమర్లకు అందించాల్సి ఉంటుంది. అప్పుడే లాకర్లకు సంబంధించి దానిపై హక్కులు, బాధ్యతలు కస్టమర్లకు తెలుస్తాయి. ఇదే సమయంలో బ్యాంకుల నిర్లక్ష్యం కారణంగా.. అంటే దొంగతనం, అగ్నిప్రమాదం వంటి ఘటనలు జరిగితే.. కస్టమర్లు చెల్లించిన రుసుముకు 100 రెట్ల నష్టపరిహారాన్ని బ్యాంకులు ఇవ్వాల్సి ఉంటుంది.

తొలుత బ్యాంక్ లాకర్లకు కొత్త నిబంధనలను 2021 ఆగస్టులో.. రిజర్వ్ బ్యాంక్ ఆఫ్ ఇండియా అమల్లోకి తెచ్చింది. అయితే బ్యాంక్ లాకర్లకు సంబంధించి.. ఇటీవల లోకల్ సర్కిల్స్ సర్వేలో ఆసక్తికర విషయాలు వెలుగులోకి వచ్చాయి. చాలా మంది బ్యాంక్ లాకర్లను మూసేసే ఆలోచనలో ఉన్నారట. బ్యాంకులు ఎక్కువ ఛార్జీలు వసూలు చేయడం, పేపర్ వర్క్ ఎక్కువ కావడం, కేవైసీ అప్‌డేట్ కూడా పలు మార్లు అడగటం కస్టమర్లకు ఇబ్బందిగా మారిందట. ఈ నేపథ్యంలోనే బ్యాంక్ లాకర్ సైజ్‌ను తగ్గించుకోవడం లేదా.. క్లోజ్ చేయడం చేస్తున్నాయట.