చరిత్రలో ఎన్నడు లేనంతగా పడిపోయిన పాక్ రూపాయి

పాకిస్తాన్ కు కోలుకోెలేని కష్టలు వచ్చిపడ్డాయి. తీవ్ర ఆర్థిక సంక్షోభంలో చిక్కుకున్న దాయాది పాకిస్థాన్.. కష్టాల నుంచి బయటపడేందుకు ప్రయత్నాలు చేస్తోంది. ఇందులో భాగంగా అంతర్జాతీయ ద్రవ్య నిధి (ఐఎంఎఫ్) నుంచి రుణాలు పొందేందుకు కీలక నిర్ణయం తీసుకుంది.పాకిస్థాన్‌ రూపాయి మారకపు రేటుపై నిబంధనను సరళతరం చేసింది. దీని కారణంగా డాలరుతో పాక్‌ రూపాయి మారకపు ఊహించని రీతిలో పతనమయ్యింది. రూపాయి విలువ 255కి పడిపోయింది. ఇంత పెద్దమొత్తంలో పాక్ రూపాయి పతనం కావడం ఆ దేశ చరిత్రలో ఇదే మొదటిసారి. ఐఎంఎఫ్‌ సూచన మేరకు ద్రవ్యమారకపు రేటుపై పాక్ బుధవారం నిబంధనలను సడలించింది. దీంతో ఒక్కరోజులోనే పాక్‌ రూపాయి రూ.24 మేర క్షీణించినట్లు ట్రిబ్యూన్‌ పత్రిక వెల్లడించింది.

రూపాయిపై నియంత్రణలను సరళీకరించాలని, రూపాయి మారకపు విలువను మార్కెట్‌ నిర్ణయించేలా చూడాలని పాకిస్థాన్‌ను ఐఎంఎఫ్‌ కోరింది. ఐఎంఎఫ్‌ వద్ద ప్రస్తుతం పెండింగ్‌లో ఉన్న 6.5 బిలియన్‌ డాలర్ల నిధుల విడుదలకు ఆమోదం లభిస్తుందనే ఆశతో పాకిస్థాన్‌ వెంటనే షరతుకు అంగీకారం తెలిపింది. ఐఎంఎఫ్‌ నుంచి 6.5 బిలియన్‌ డాలర్ల ఆర్థిక సహాయం తీసుకోవడానికి 2019లోనే పాక్ అంగీకరించినా, దాని కఠిన షరతుల వల్ల వెనక్కి తగ్గింది. అలాగే, నిధులివ్వాలంటే కరెంటు సబ్సిడీలను ఉపసంహరించాలనీ, అంతర్జాతీయ మార్కెట్ ధరలకు తగ్గట్టు గ్యాస్‌ ఛార్జీలను నిర్ణయించాలని తెలిపింది.

పాక్‌ రూపాయి మారక విలువను మార్కెట్‌ ఆధారంగా నిర్ణయించాలనీ, లెటర్‌ ఆఫ్‌ క్రెడిట్లపై నిషేధం తొలగించాలని షరతులు విధించింది. ఇప్పుడు విడుదల చేయకపోతే రద్దయ్యే ప్రమాదం ఉండటంతో పాకిస్థాన్‌ ఈ కఠిన నిర్ణయాలకు ఉపక్రమించినట్లు తెలుస్తోంది.

అటు, తీవ్ర ఆహార సంక్షోభాన్ని ఎదుర్కొంటున్న పాకిస్థాన్‌లో విదేశీ మారకపు నిల్వలు దారుణంగా పడిపోయాయి. కేవలం మూడు వారాలకు సరిపడే నిల్వలు మాత్రమే ఉన్నాయి. నిత్యావసరాలు కొండెక్కడంతో సామాన్యులు తీవ్ర ఇబ్బందులను ఎదుర్కొంటున్నారు. ఒక ప్యాకెట్‌ గోధుమ పిండి రూ.3000 కంటే ఎక్కువ పలుకుతోంది. అంత మొత్తం చెల్లించడానికి ప్రజలు సిద్ధపడినా.. దొరకే పరిస్థితి లేదు. ఇటీవల గోధుమ పిండి కోసం పాక్‌ ప్రజలు లారీ వెంట పరుగులు తీయడం సోషల్ మీడియాలో వైరల్ అయ్యాయి.

విద్యుత్‌ సరఫరా నిలిచిపోవడంతో దేశం మొత్తం అంధకారంలో కూరుకుపోయింది. దేశంలో విలయం తాండవం చేస్తున్న ఈ సంక్షోభాన్ని ఎదుర్కొనేందుకు గత 24 ఏళ్ల చరిత్రలో ఎప్పుడూ లేని విధంగా పాకిస్థాన్‌ సెంట్రల్‌ బ్యాంకు వడ్డీ రేట్లను కూడా అమాంతంగా పెంచేసింది.