నందమూరి కుటుంభానికి చేదోడుగా నిలిచిన కర్ణాటక సర్కార్

నందమూరి కుటుంభానికి కర్ణాటక సర్కార్ చేదోడు...వాదోడుగా నిలుస్తోంది. ఇదిలావుంటే సినీ నటుడు, తెలుగు ప్రజలకు సుపరిచితుడైన నందమూరి తారకరత్న హార్ట్ అటాక్ కారణంగా బెంగళూరులోని నారాయణ హృదయాలయలో చికిత్స పొందుతున్న సంగతి తెలిసిందే. నారా లోకేశ్ పాదయాత్ర ప్రారంభం కోసం కుప్పం వెళ్లిన తారకరత్న అక్కడే ఉన్నట్లుండి కుప్పకూలారు. తొలుత చిన్న అనారోగ్య సమస్యే అని భావించినప్పటికీ.. గుండె పోటు అని తర్వాత తేలింది. కుప్పంలోని డాక్టర్లు ఆయనకు సీపీఆర్ చేశారు. కానీ అప్పటికే ఆయన శరీరం నీలం రంగులోకి మారిపోయిందని చెబుతున్నారు. సీపీఆర్ తర్వాత ఆయన నాడి కొట్టుకోవడం మొదలైంది. దీంతో వెంటనే ఆయన్ను మెరుగైన వైద్య చికిత్స కోసం బెంగళూరు తరలించారు. ఎయిర్ లిఫ్ట్ చేయడం కుదరకపోవడం, గుండెపోటు వచ్చిన గంటలోనే ఆయనకు సరైన చికిత్స అందకపోవడం ప్రతికూలంగా మారాయి.

తారకరత్న గుండె ఎడమ భాగంలో వాల్వ్‌లు 90 శాతానికిపైగా పూడుకుపోయాయి. దీంతో ఎక్మో పరికరంపై ఉంచి చికిత్స అందిస్తున్నారు. ఈలోగా ఆయన గుండె పనితీరును మెరుగుపర్చడానికి డాక్టర్లు శక్తిమేరా ప్రయత్నిస్తున్నారు. తారకరత్న సొమ్మసిల్లి పడిపోయారు అని తెలిసినప్పటి నుంచి ఆయన బాబాయి నందమూరి బాలకృష్ణ పక్కనే ఉండి బాగోగులు చూసుకుంటున్నారు. డాక్టర్లతో మాట్లాడటం, కుటుంబ సభ్యులకు ధైర్యం చెప్పడం, మీడియాకు అప్డేట్ ఇవ్వడం లాంటివన్నీ బాలయ్యే చూసుకుంటున్నారు.

తారకరత్నను చూసేందుకు మాజీ సీఎం చంద్రబాబు నాయుడు, బ్రాహ్మణి, జూనియర్ ఎన్టీఆర్ దంపతులు, కళ్యాణ్ రామ్ తదితరులు బెంగళూరు బయల్దేరి వెళ్లారు. నందమూరి కుటుంబం ఇబ్బందుల్లో ఉన్న వేళ.. కర్ణాటకలోని బసవరాజ్ బొమ్మై ప్రభుత్వం వారికి పూర్తి అండగా నిలుస్తోంది.

ఎన్టీఆర్, కళ్యాణ్ రామ్‌ను రిసీవ్ చేసుకోవడానికి కర్ణాటక సీఎం బొమ్మై.. ఆరోగ్య మంత్రి డాక్టర్ కె.సుధాకర్‌ను బెంగళూరు ఎయిర్‌పోర్టుకు పంపించారు. హాస్పిటల్‌లోనూ ఆయన వారి వెంటే ఉన్నారు. విమానాశ్రయంలో తారక్‌ను రిసీవ్ చేసుకుంటున్న ఫొటోలను కర్ణాటక మంత్రి ట్వీట్ చేశారు. కర్ణాటక ఆరోగ్య మంత్రితో ఉన్న అనుబంధం అవసరానికి ఉపయోగపడుతోంది. కష్టాల్లో ఉన్న మాజీ ముఖ్యమంత్రి కుటుంబానికి కన్నడ నాట అధికారంలో ఉన్న బొమ్మై సర్కారు చేతనైనంతగా సాయం చేస్తోంది. దీంతో కర్ణాటక ఆరోగ్య మంత్రికి నందమూరి అభిమానులు ధన్యవాదాలు తెలుపుతున్నారు.

తారకరత్న ఆరోగ్య పరిస్థితి విషయానికి వస్తే.. ఆయన కోలుకుంటున్నారని చెబుతున్నారు. ఆయన చికిత్సకు స్పందిస్తున్నారని డాక్టర్లు చెబుతున్నారు. కానీ ఇప్పటికీ ఆరోగ్యం విషమంగా ఉందని తెలుస్తోంది. ఎక్మో మీద చికిత్స అందించడం ఖర్చుతో కూడుకున్న వ్యవహారం. ఎక్మో మీద గరిష్టంగా నెల రోజుల వరకు ఉంచొచ్చు. కానీ బ్లడ్ థిన్నర్స్ వాడటం వల్ల అంతర్గతంగా రక్తస్రావం జరిగే ప్రమాదం ఉంటుంది. ఆయన డయాబెటిస్‌తోనూ బాధపడుతున్నారని తెలుస్తోంది. బ్లడ్ షుగర్ అదుపులో లేకపోవడం వల్లే హార్ట్ అటాక్ వచ్చిందని చెబుతున్నారు. ఎక్మో సాయంతో తారకరత్న ప్రాణాపాయం నుంచి బయటపడాలని.. తిరిగి మామూలు మనిషిగా మనందరి ముందుకు రావాలని కోరుకుందాం.