రైతును హత్య చేసిన గుర్తు తెలియని వ్యక్తులు
Andhra Pradesh Telugu | Suryaa Desk | Published : Thu, Feb 02, 2023, 12:40 PM
శ్రీసత్యసాయి జిల్లా చిలమత్తూరు మండల పరిధిలోని సోమఘట్ట పొలాల్లో ఓ రైతును గుర్తు తెలియని వ్యక్తులు బుధవారం హత్య చేశారు. ఎస్‌ఐ శ్రీనివాసులు, స్థానికులు తెలిపిన మేరకు, గ్రా మానికి చెందిన శివప్ప, ఆది లక్ష్మమ్మ దంపతుల కుమారుడు నాగరాజు(29) అదే గ్రామానికి చెందిన అంజినప్ప పొ లంలో పనులు చేయడానికి వెళ్లాడు. పైప్‌ లైన పనులు చేస్తున్న సమయంలో పొలం యజమాని అంజినప్ప పక్కనే ఉన్న పాడి ఆవుని కట్టివేసేందుకు వెళ్లాడు. ఆ సమయంలో నాగరాజును దుండగులు వేట కొడవళ్లతో నరికారు. దూరం నుంచి గమనించిన అంజినప్ప, భయంతో పారిపోయి గ్రామంలోకి వచ్చాడు. విషయం తెలుసుకున్న కుటుంబ సభ్యులు, ఘటనా స్థలానికి చేరుకునేలోగా నాగరాజు మృతి చెందాడు. ఎస్‌ఐ శ్రీనివాసులు తన సిబ్బందితో సంఘటనా స్థలానికి చేరుకొని పరిశీలించారు. కుటుంబ సభ్యులు, గ్రామస్థులను విచారించారు. హంతకులను గుర్తించేందుకు జాగిలాన్ని రప్పించారు. హత్యా స్థలం నుంచి గ్రామంలో మృతుడి ఇంటి వరకు వెళ్లి జాగిలం ఆగిపోయింది. ఈ ఘటనపై కేసు నమోదు చేశామని, దర్యాప్తు చేస్తున్నామని ఎస్‌ఐ తెలిపారు. నాగరాజుపై రెండు నెలల క్రితం ఇంటి వద్ద గుర్తు తెలియని వ్యక్తులు దాడి చేసి, హత్య చేసేందుకు యత్నించారని, ఆ సమయంలో అతనికి గాయాలయ్యాయని గ్రామస్థులు తెలిపారు. కానీ అప్పట్లో ఆ విషయం బయటికి పొక్కలేదు.
|
|