చీటింగ్‌ కేసు అంటూ పెట్రోల్‌ బంకు యజమానిని అరెస్ట్ చేసిన పోలీసులు
Andhra Pradesh Telugu | Suryaa Desk | Published : Mon, Feb 27, 2023, 01:42 PM
బాపట్లలోని పెట్రోల్‌ బంకు యజమాని చెరువు ఆదిత్య అరెస్టు వ్యవహారం తీవ్ర కలకలం రేపింది. చీటింగ్‌ కేసులో ఆదిత్యను అరెస్టు చేశామని పోలీసులు చెప్పగా, అసలు ఎలాంటి విషయం తమకు చెప్పకుండా పోలీసులు తన భర్తను కిడ్నాప్‌ చేశారని ఆదిత్య భార్య పద్మిని ఆరోపించారు. అంతేకాదు.. తన భర్తను తీసుకువెళ్తున్న సమయంలో పోలీసుల వెంట వైసీపీ రాజ్యసభ సభ్యుడు మోపిదేవి వెంకట రమణ సోదరుడు హరనాథ్‌ బాబు, మరో ఇద్దరు వ్యక్తులు ఉన్నారని ఆమె ఆరోపించారు. ఆదిత్యను ఎందుకు తీసుకువెళ్తున్నారనే కనీస సమాచారం చెప్పలేదన్నారు. ఆదివారం తెల్లవారుజామున బాపట్ల రైల్వే స్టేషన్‌ ఎదురుగా ఉన్న తమ నివాసం నుంచి తన భర్త ఆదిత్యను నిజాంపట్నం పోలీసులు తీసుకెళ్లారని, ఆ సమయంలో ఎంపీ సోదరుడు హరనాథ్‌బాబు, మరో ఇద్దరు వ్యక్తులు పవన్, రాజశేఖర్‌లు ఉండడం అనుమానంగా ఉందన్నారు. ఇదే విషయంపై ఫిర్యాదు ఇవ్వడానికి ఎస్పీ కార్యాలయానికి వెళ్లగా ఎస్పీ అందుబాటులో లేకపోవడంతో టౌన్‌ పోలీస్‌ స్టేషన్‌కు వచ్చి ఫిర్యాదు చేశారు. తనకు ఎంపీ సోదరుడు హరనాథ్‌బాబుతో పాటు మరో ఇద్దరిపై అనుమానం ఉన్నట్లు పోలీసులకు వివరించారు.
|
|