రైల్వే ఉద్యోగాల కుంభకోణం కేసులో ఈడీ సోదాలు,,,లాలూ కుటుంబం అక్రమ సంపాదనపై కీలక ప్రకటన

గత కొన్నేళ్లుగా రైల్వే ఉద్యోగాల కుంభకోణం కేసు లాలు ప్రసాద్ యాదవ్ ను వెంటాడుతూనే ఉంది. 2008 నాటి రైల్వే ఉద్యోగాల కుంభకోణం కేసులో ఆరోపణలు ఎదుర్కొంటున్న బిహార్ మాజీ ముఖ్యమంత్రి లాలూ ప్రసాద్‌ యాదవ్‌కు సంబంధించి దేశవ్యాప్తంగా ఎన్‌ఫోర్స్‌మెంట్ డైరెక్టరేట్ శుక్రవారం సోదాలు నిర్వహించిన విషయం తెలిసిందే. ఢిల్లీ, పట్నా, ముంబయి, రాంచీల్లోని దాదాపు 25 చోట్ల నిర్వహించిన సోదాల్లో రూ.600 కోట్ల అక్రమాస్తుల వివరాలు బయటపడినట్టు ఈడీ శనివారం ప్రకటించింది. ఇందులో రూ.350 కోట్ల విలువైన స్థిరాస్తులు, బినామీల ద్వారా జరిపిన రూ.250 కోట్ల ఆర్థిక లావాదేవీలు ఉన్నట్లు పేర్కొంది. సోదాల్లో 1,900 అమెరికన్‌ డాలర్లతో కలిపి రూ.1 కోటి నగదు, 540 గ్రాముల బంగారు బిస్కెట్లు, 1.5 కిలోల బంగారు ఆభరణాలు (విలువ దాదాపు రూ.1.25 కోట్లు), పలు పత్రాలను స్వాధీనం చేసుకుంది.

యూపీయే- 1 ప్రభుత్వంలో కేంద్ర రైల్వే మంత్రిగా ఉన్న లాలూ ప్రసాద్ యాదవ్ కొందరికి ఉద్యోగాలు ఇప్పించినందుకు ప్రతిఫలంగా భారీ మొత్తంలో విలువైన భూమిని పొందారనేది ఈడీ ప్రధాన ఆరోపణ. ఆ భూముల ప్రస్తుత విలువ రూ.200 కోట్లకు పైగా ఉన్నట్లు తేల్చిన ఈడీ.. ఇందుకు సంబంధించిన బినామీదారులు, షెల్‌ కంపెనీలను గుర్తించింది. దక్షిణ ఢిల్లీలోని న్యూఫ్రెండ్స్‌ కాలనీ డీ-1088 చిరునామాలో నాలుగు అంతస్తుల భవనం తేజస్వీ యాదవ్ ఆధ్వర్యంలో నడిచే ఏబీ ఎక్స్‌పోర్ట్స్‌ ప్రైవేట్‌ లిమిటెడ్‌ పేరుతో రిజిస్టర్‌ అయింది.

ఈ భవనాన్ని రూ.4 లక్షలకు కొనుగోలు చేసినట్లు దస్త్రాల్లో చూపినా.. ప్రస్తుత మార్కెట్‌ విలువ దాదాపు రూ.150 కోట్ల మేర ఉంటుందని అంచనా. అక్రమంగా సంపాదించిన డబ్బు చలామణి కోసం ముంబయికి చెందిన నగలు, ఆభరణాల వ్యాపార సంస్థలను వినియోగించారు. ఢిల్లీలోని భవనాన్ని కంపెనీ కార్యాలయంగా రికార్డుల్లో చూపినప్పటికీ, దీన్ని తేజస్వీ నివాసంగా వాడుతున్నట్లు సోదాల్లో వెల్లడయ్యింది. గ్రూప్‌-డి ఉద్యోగుల నుంచి లాలూ కుటుంబం రూ.7.5 లక్షలకు నాలుగు స్థలాలను కొనుగోలు చేయగా.. వాటిని ఆర్జేడీ మాజీ ఎమ్మెల్యే సయ్యద్‌ అబూ దోజానాకు రూ.3.5 కోట్లకు విక్రయించారు. ఈ మొత్తంలో ఎక్కువ భాగం తేజస్వీ యాదవ్‌ ఖాతాకు బదిలీ చేసినట్లు దర్యాప్తులో తేలింది.

గ్రూప్‌-డి ఉద్యోగుల తల్లిదండ్రుల నుంచి సైతం ఇదే తరహాలో మరికొన్ని భూములు చేజిక్కించుకున్నట్టు అనుమానిస్తున్నారు. లాలూ కేంద్ర మంత్రిగా ఉన్నప్పుడు వివిధ రైల్వేజోన్లలో నియమితులైన ఉద్యోగుల్లో 50% మంది ఆయన కుటుంబసభ్యుల నియోజకవర్గాలకు చెందినవారే. దీనిపై తదుపరి దర్యాప్తు కొనసాగుతోందని, స్థిరాస్తి వ్యాపారంతోపాటు వివిధ రంగాల్లో లాలూ కుటుంబం పెట్టిన పెట్టుబడుల వివరాలపై దర్యాప్తు నిర్వహిస్తున్నట్లు ఈడీ పేర్కొంది.