వివాహేతర సంభంధం ఉందనే అనుమానంతో భార్య, అత్తని హత్యచేసిన యువకుడు

కర్నూలు నగరంలో కల్లూరు ఎస్టేట్‌లో సుబ్బలక్ష్మి నగర్‌లో జంట హత్యలు కలకలం రేపాయి. రుక్మిణీదేవి (20), రమాదేవి (45) అనే తల్లి కూతుళ్లు దారుణహత్యకు గురయ్యారు. మంగళవారం మధ్యాహ్నం జరిగిన ఈ హత్యలతో కాలనీవాసులు భయభ్రాంతులయ్యారు. సంఘటన తెలిసిన వెంటనే టూటౌన సీఐ శ్రీనివాసులు, నాలుగో పట్టణ సీఐ శంకరయ్య అక్కడికి చేరుకున్నారు. వారు తెలిపిన వివరాల ప్రకారం... సుబ్బలక్ష్మి నగర్‌కు చెందిన ప్రసాద్‌, కృష్ణవేణి దంపతుల కుమారుడు శ్రావణ్‌ కుమార్‌ బీటెక్‌ పూర్తి చేసి హైదరాబాదులోని ఓ బ్యాంకు కాల్‌ సెంటర్‌లో ఉద్యోగిగా పని చేస్తున్నాడు. ఈ దంపతులు కల్లూరులోని చెన్నమ్మ సర్కిల్‌లో తోపుడుబండి పైన టిఫెన సెంటర్‌ నడుపుతున్నారు. శ్రావణ్‌ కుమార్‌కు ఈ నెల 1వ తేదీన తెలంగాణ రాష్ట్రం వనపర్తికి చెందిన రుక్మిణీ దేవితో పెళ్లయింది. మొదటి రోజు రాత్రి నుంచే శ్రావణ్‌ కుమార్‌కు భార్య మీద అనుమానం మొదలైంది. ఆ తర్వాత రుక్మిణి మరొకరితో ఫోనలో మాట్లాడిన ఆడియో రికార్డింగ్‌ కూడా శ్రావణ్‌ విన్నట్లు తెలుస్తోంది. దీంతో అతడికి భార్య మీద మరింత అనుమానం పెరిగింది. రుక్మిణికి వివాహేతర సంబంధం ఉందని మనస్తాపానికి లోనై ఆత్మహత్య చేసుకునేందుకు ప్రయత్నించాడు. తండ్రి ప్రసాద్‌ ఇది గుర్తించి ‘నీవు తప్పు చేయనప్పుడు ఎందుకు ఆత్మహత్య చేసుకోవాలి.. అవసరమైతే.. వారినే చంపాలని ప్రోత్సహించిన’ట్లు తెలిసింది. ఈ మేరకు శ్రావణ్‌ కుమార్‌ మంగళవారం హైదరాబాదు నుంచి వనపర్తికి వచ్చి అక్కడ ఉన్న భార్య రుక్మిణిని, అత్తమామలు రమాదేవి, వెంకటేశ్వర్లును సమస్యపై మాట్లాడాలని కర్నూలుకు పిలుచుకొచ్చాడు. అప్పటికే శ్రావణ్‌ కుమార్‌ తండ్రి ప్రసాద్‌ చెన్నమ్మ సర్కిల్‌లో రెండు కత్తులను కొని ఇంట్లో పెట్టాడు. మంగళవారం మధ్యాహ్నం రెండు కుటుంబాల మధ్య కాసేపు ఘర్షణ జరిగింది. మాటామాటా పెరిగి శ్రావణ్‌ కుమార్‌ తండ్రి కత్తి తీసుకుని రుక్మిణిపై దాడి చేశాడు. శ్రావణ్‌ మరో కత్తితో రుక్మిణని ఎడా పెడా పొడిచేశాడు. అడ్డం వచ్చిన తల్లి రమాదేవిని కూడా పొడిచాడు. ఈ ఘటనలతో తల్లీ కూతుళ్లు అక్కడికక్కడే మృతి చెందారు. మామ వెంకటేశ్వర్లుకు స్వల్ప గాయాలయ్యాయి. పోలీసులు నిందితులను అదుపులోకి తీసుకున్నారు. గాయపడిన వెంకటేశ్వర్లును ఆసుపత్రికి తరలించారు. రుక్మిణి, రమాదేవిల మృతదేహాలను మార్చురికి తరలించారు. శ్రావణ్‌కుమార్‌, ప్రసాద్‌, కృష్ణవేణిలను విచారిస్తున్నారు.