ప్రియుడికి షాకిచ్చిన గుజరాత్ హైకోర్ట్... జరిమాన విధింపు

న్యాయస్థానం ఉంది కదా అని అర్థంపర్థంలేని విషయాలకు కోర్టు ఎక్కితే ఏమవుతుందో రుచిచూపింది గుజరాత్ హైకోర్ట్.  భర్త కస్టడీలో అక్రమంగా ఉన్న ప్రియురాలిని విడిపించి తనకు అప్పగించాలంటూ హెబియస్ కార్పస్ రిట్ దాఖలు చేసిన వ్యక్తికి గుజరాత్ హైకోర్టు రూ.5,000 జరిమానా విధించింది. బనస్కాంత జిల్లాకు చెందిన ఈ కేసు వివరాల్లోకి వెళ్తే.. హైకోర్టును ఆశ్రయించిన ఓ వ్యక్తి.. సదరు మహిళ, తాను సహజీవనంలో ఉన్నామని తెలిపాడు. ఆమె ఇష్టానికి విరుద్ధంగా మరొకరితో వివాహం చేశారని, అయితే, ఆ మహిళ తన భర్తను, అత్తింటిని వదిలిపెట్టి తన వద్దకు వచ్చేసినట్టు పేర్కొన్నాడు. ఇరువురమూ కలిసి ఉంటూ లివ్-ఇన్ రిలేషన్షిప్ అగ్రిమెంట్‌పై సంతకం చేశామని వివరించాడు.

కొద్ది రోజుల తర్వాత తన ప్రియురాలి తల్లిదండ్రులు, అత్తింటివాళ్లు వచ్చి ఆమెను బలవంతంగా తీసుకెళ్లిపోయారని ఆరోపించాడు. తన ఇష్టానికి విరుద్ధంగా ఆమెను భర్త బంధించాడని, ప్రియురాలిని తనకు అప్పగించేలా ఆదేశాలు ఇవ్వాలంటూ గుజరాత్ హైకోర్టులో హెబియస్ కార్పస్ పిటిషన్ వేశాడు. ఈ విషయంలో పోలీసులకు సూచనలు చేసి, ప్రేయసికి విముక్తి కల్పించాలని కోరాడు. అయితే, రాష్ట్ర ప్రభుత్వం ఈ పిటిషన్‌ను వ్యతిరేకిస్తూ.. అటువంటి పిటిషన్‌ను దాఖలు చేయడానికి వ్యక్తికి ఎటువంటి హక్కు లేదని వాదించింది. మహిళ తన భర్త దగ్గర ఉంటే, ఆమె అక్రమంగా కస్టడీలో ఉందని చెప్పలేమని పేర్కొంది.

దీనిపై విచారణ చేపట్టిన జస్టిస్ వీఎం పాంచోలీ, జస్టిస్ హెచ్ఎం ప్రచ్చక్‌ల ధర్మాసనం.. మహిళను పిటిషనర్ వివాహం చేసుకోలేదని, ఆమె తన భర్త నుంచి విడాకులు కూడా తీసుకోలేదని పేర్కొంది. ‘కాబట్టి భర్త దగ్గర ఉన్న మహిళను అక్రమ కస్టడీలో ఉందని పిటిషనర్ ఆరోపిస్తూ సహజీవనం ఒప్పందంగా పిలిచే దాని ప్రకారం ప్రస్తుత పిటిషన్ దాఖలు చేయలేడు’అని వ్యాఖ్యానించింది. అతడికి రూ.5,000 జరిమానా విధించిన న్యాయస్థానం.. ఆ మొత్తాన్ని రాష్ట్ర లీగల్ సర్వీసెస్ అథారిటీలో జమ చేయాలని సూచించింది.