ఐదుసార్లు గుండెపోటు చావును జేయించింది

దేనికైనా రాసిపెట్టివుండాలంటారు. అది పుట్టుకకైనా.... చావుకైనా.  ఆరు రోజుల వ్యవధిలో ఒకటి రెండు కాదు ఏకంగా ఐదుసార్లు గుండెపోటు వస్తే ఎవరైనా బతుకుతారా? అదీ 80 ఏళ్లు దాటితే.. కానీ, ఓ వృద్ధురాలు గుండె గట్టిదే. ఐదుసార్లు గుండెపోటును తట్టుకుని ప్రాణాలతో బయటపడింది. మరణం అంచుల వరకూ వెళ్లి వచ్చారు. వైద్య రంగంలో అద్భుతమైన ఈ ఘటన ఢిల్లీలో చోటుచేసుకుంది. 81 ఏళ్ల వయసులో ఆమె మృత్యువును జయించి, ఆస్పత్రి నుంచి క్షేమంగా ఇంటికి చేరుకున్నారు. ఢిల్లీకి ఓ వృద్ధురాలు శ్వాసకోస సంబంధిత సమస్యలతో స్థానిక మ్యాక్స్ ఆసుపత్రిలో చేరారు. అప్పటికే ఆమె ఊపిరి పీల్చుకోవడంలో ఇబ్బంది పడుతున్నారు.

వృద్ధురాలిని పరీక్షించిన వైద్యులు.. ఆమె గుండె సామర్థ్యం 25 శాతానికి పడిపోయినట్టు గుర్తించారు. గుండె కొట్టుకునే తీరులోనూ లోపం కనిపించింది. దీంతో ఆమెకు వైద్యులు ఏంజియోగ్రఫీ చేసి తాత్కాలికంగా పేస్‌మేకర్ అమర్చారు. ఆ తరువాత ఉన్నట్టుండి ఆమె గుండె ఒక్కసారిగా స్తంభించిపోయింది. తక్షణమే వైద్యులు ఆటోమెటిక్ ఇంప్లాంటబుల్ కార్డియోవెర్టర్ డిఫ్రిబ్రిల్లేటర్ (ఏఐసీడీ) అనే పరికరం సాయంతో గుండె మళ్లీ కొట్టుకునేలా చేశారు. రోగుల ఛాతిలో అమర్చే ఈ పరికరంతో గుండె సంబంధిత తీవ్ర సమస్యలను తొలగించవచ్చని మ్యాక్స్ ఆసుపత్రి వైద్యులు డాక్టర్ బల్బీర్ సింగ్ తెలిపారు.

ఈ పరికరం తీవ్రమైన, ప్రాణాంతక అరిథ్మియా చికిత్సకు ఉపయోగిస్తామని, అత్యంత ప్రభావవంతమైన మార్గమని చెప్పారు. దీంతో.. బాధితురాలి గుండె పనితీరు మెరుగై ఆమె క్రమంగా కోలుకున్నట్టు డాక్టర్ సింగ్ వివరించారు. వృద్ధురాలికి వైద్యులు చేసిన ఇతర చికిత్సలేవీ ఫలించకపోవడంతో తొలుత కుటుంబసభ్యులు ఆమెపై ఆశలు వదులుకున్నారు. కానీ, ఆ సమయంలో వైద్యులు అనేక ప్రత్యామ్నాయాలు పరిశీలించి చివరకు ఏఐసీడీతో ప్రాణాలు నిలిపారు. వృద్ధురాలు పూర్తిగా కోలుకోవడంతో ఇటీవలే డిశ్చార్జ్ అయ్యారు.

‘‘ఇది నిజంగా ఓ అద్భుతం’’ అని డాక్టర్ సింగ్ మీడియాతో మాట్లాడుతూ వ్యాఖ్యానించారు. ఆధునిక వైద్య శాస్త్రంతో పాటూ ఆ మహిళ శక్తిసామర్థ్యాలే ఈ విపత్తు నుంచి గట్టెక్కేలా చేశాయని వివరించారు. మెనోపాజ్ దశ తరువాత మహిళలు గుండెపోటు బారిన పడే అవకాశాలు ఎక్కువగా ఉంటాయని తెలిపారు.