ఆగిన పెళ్లిన సముదాయించి భజాభజాయించిన పోలీసులు

పోలీసులంటే కఠినత్వమే అందరికి గుర్తోస్తుంది. కానీ వారిలో కూడా మానవత్వం ఉంది అని నిరూపించిన ఘటనలు అనేకం. అలాంటిదే ఈ ఘటన. తాగిన మైకంలో ఓ వరుడు పెళ్లి విషయాన్నే మరిచిపోయి.. ముహూర్తం వేళకు పెళ్లి మండపానికి చేరుకోలేదు. వరుడి కోసం మండపంలో ఎదురు చూసిన వధువు.. అతడు తప్పతాగి రావడంతో ఏకంగా ఈ పెళ్లే వద్దునుకుని వెళ్లిపోయింది. ఈ ఘటన బిహార్‌‌లోని భాగల్‌పూర్‌‌ ప్రాంతం సుల్తాన్‌గంజ్ గ్రామంలో చోటుచేసుకుంది. సుల్తాన్‌గంజ్ గ్రామానికి చెందిన యువతికి మియాన్‌ అనే యువకుడితో పెళ్లి నిశ్చయమైంది. మంగళవారం ఉదయం వివాహానికి ముహూర్తాన్ని ఖరారు చేశారు. ఈ క్రమంలో కళ్యాణ మండపానికి చేరుకున్న వధువు.. వరుడి రాకకోసం ఎదురు చూసింది.

ముహూర్త సమయం దాటిపోతున్నా పెళ్లి కుమారుడు రాకపోయేసరికి వధువు కుటుంబసభ్యులు ఆందోళన చెందారు. అయితే, ముందురోజు రాత్రి అతడు ఫుల్లుగా మందుకొట్టి నిద్రపోయాడు. మెలకువ వచ్చేసరికి పుణ్యకాలం కాస్తా దాటిపోయింది. మంగళవారం మధ్యాహ్నం సమయంలో మళ్లీ మద్యం సేవించి కళ్యాణ వేదిక వద్దకు చేరుకున్నాడు. మద్యానికి బానిసైన వ్యక్తితో తన జీవితం నరకప్రాయంగా ఉంటుందని భావించిన వధువు.. అతడి పెళ్లి వద్దంటూ తిరస్కరించింది. దీంతో తాము కట్నకానుకలు కింద ఇచ్చినవి, పెళ్లి కోసం చేసిన ఖర్చులను ఇచ్చేయాలని వధువు కుటుంబం పట్టుబట్టింది. దీంతో ఇరు కుటుంబాల మధ్య వాగ్వాదం చోటుచేసుకుని గొడవకు దారితీసింది.

దీని గురించి సమాచారం అందుకున్న పోలీసులు.. అక్కడకు చేరుకుని ఇరు వర్గాలను సముదాయించారు. పరిస్థితిని అదుపుచేసి నచ్చజెప్పడంతో ఎవరి దారిన వాళ్లు వెళ్లిపోయారు. కాగా, ఇటీవల అసోంలోని గువహటిలోనూ ఇటువంటి ఘటనే చోటుచేసుకుంది. వరుడు ఫుల్‌గా మద్యం తాగి పెళ్లి పీటలపైనే నిద్రపోయాడు. పెళ్లికొడుకుతో పాటు తండ్రి, అతడి కుటుంబ సభ్యులు కూడా మద్యం మత్తులో మండపానికి వచ్చారు. దీనిని సహించలేకపోయిన వధువు పెళ్లి పీటలపై కూర్చొనేందుకు నిరాకరించింది. దీంతో ఆ పెళ్లి రద్దయ్యింది.

నల్బారి పట్టణానికి చెందిన ప్రసేన్‌జిత్ హలోయ్‌ అనే అబ్బాయికి ఒక యువతితో పెళ్లి నిశ్చయమైంది. అయితే పెళ్లి రోజున వరుడు ఫుల్‌గా మద్యం సేవించి కళ్యాణ మండపంక వద్దకు వచ్చాడు. కారు నుంచి కిందకు దిగేందుకు కూడా చాలా ఇబ్బంది పడ్డాడు. మద్యం మత్తులో తూలుతూ అతి కష్టంతో పెళ్లి పీటలు ఎక్కాడు. తీరా వధువు పక్కన పెళ్లి మండపంలో సరిగా కూర్చొలేకపోయాడు. పండితుడు శాస్త్రోక్తంగా పెళ్లి జరిపిస్తున్నాడు. మద్యం మత్తులో ఉన్న అతడు పండితుడు చేప్పే మంత్రాలు తిరిగి చెప్పలేకపోయాడు. చివరకు పెళ్లి మండపంలో అతడు గురక పెట్టి నిద్రపోయాడు.