టీడీపీ అక్రమాలకు పాల్పడింది

 పశ్చిమ రాయలసీమ పట్టభద్రుల ఎమ్మెల్సీ ఓట్ల లెక్కింపులో అక్రమాలు జరిగాయని ప్రభుత్వ సలహాదారు సజ్జల రామకృష్ణారెడ్డి ఆరోపించారు. రిటర్నింగ్‌ అధికారి ఎందుకలా వ్యవహరించారో అర్థం కావడం లేదన్నారు. ఎనిమిదో రౌండ్‌లో ఒకచోట ఆరు ఓట్ల తేడా ఉందని వైసీపీ అభ్యంతరం వ్యక్తం చేస్తే.. ఆర్వో పట్టించుకోలేదన్నారు. లెక్కింపు ప్రక్రియ ముగిశాకే రీకౌంటింగ్‌ చేస్తారని.. ఎందుకు చేయలేదో అర్థం కావడం లేదని తెలిపారు. ఆదివారమిక్కడ వెలగపూడి సచివాలయంలోని మీడియా పాయింట్‌ వద్ద సజ్జల మాట్లాడారు. పట్టభద్రుల తీర్పును గౌరవిస్తామని, అయితే కౌంటింగ్‌ ప్రక్రియపై న్యాయపరంగా ముందుకెళ్లే అవకాశాలను పరిశీలిస్తామని చెప్పారు. పశ్చిమ కౌంటింగ్‌ తీరు చూస్తే మేమే అధికారంలో ఉన్నామా అన్న అనుమానం వస్తోందన్నారు. వైసీపీ అక్రమాలకు పాల్పడి ఉంటే ఈ పరిస్థితి ఎందుకొస్తుందని ప్రశ్నించారు. పులివెందుల మార్క్‌ అంటూ చంద్రబాబు విమర్శలు చేస్తూ శునకానందం పొందుతున్నారని విమర్శించారు. జగన్‌ అధికారులను ఆదేశిస్తే.. ఓట్ల లెక్కింపు ఇలా సాగేదా అని ప్రశ్నించారు. ఉన్నతాధికారులు ప్రలోభానికి గురయ్యారని అనను గానీ.. కిందిస్థాయి సిబ్బందిని టీడీపీ మేనేజ్‌ చేసిందని, ఇది చంద్రబాబుకు అలవాటేనన్నారు. ఎమ్మెల్యే కోటా ఎమ్మెల్సీ ఎన్నికల్లో ఒక సీటు గెలవడానికి టీడీపీకి సరిపోయేంత బలం సాంకేతికంగా ఉందని.. కానీ నలుగురు ఎమ్మెల్యేలు ఆ పార్టీకి దూరంగా ఉంటున్నారని చెప్పారు. టీడీపీకి సరిపోయేంత ఎమ్మెల్యేల సంఖ్యాబలం ఉంటే తామే గెలుస్తున్నామంటూ ఎందుకు ప్రకటనలు చేసుకుంటున్నారని చంద్రబాబును ప్రశ్నించారు.