ప్రయివేట్ ఆస్పత్రుల్లోనూ అత్యవసర ఉచిత వైద్యం,,,దేశంలో తొలిసారి ఆరోగ్య హక్కు బిల్లు తెచ్చిన రాజస్థాన్

వైద్య వ్యాపారానికి చెక్ పెట్టేలా రాజస్థాన్ ప్రభుత్వం అడుగులేసింది. ఆ రాష్ట్రంలోని వైద్యులు తమ ఆస్పత్రులను మూసివేసి పానీపూరీలు, పరోఠాల వ్యాపారులుగా మారారు. రోగులకు వైద్యం చేయాల్సిన డాక్టర్లు.. వీధి వ్యాపారులుగా మారడానికి రాజస్థాన్‌లోని అశోక్‌ గెహ్లాట్ ప్రభుత్వం ఇటీవలే తీసుకువచ్చిన ఆరోగ్య బిల్లే కారణం. ఈ బిల్లుకు వ్యతిరేకంగా రాష్ట్రవ్యాప్తంగా వైద్యులు ఆందోళనలు చేపట్టారు. ఈ క్రమంలోనే సికర్‌కు చెందిన డాక్టర్‌ అనిత బండిపై పానీపూరీలు అమ్ముతూ నిరసన తెలుపుతున్నారు. పలు రకాల రుచుల్లో పుల్కాలు లభిస్తాయని ఆమె బోర్డు పెట్టారు. అలాగే, ఆస్పత్రి బోర్డు కూడా తొలగించి ‘అనిత.. పుచ్కావాలీ’ అని పానీపూరి దుకాణం బోర్డు పెట్టారు. తన నేమ్‌బోర్డ్‌ను సైతం మాజీ ప్రైవేట్‌ డాక్టర్‌ అని మార్చుకున్నారు.

మరో వైద్యుడు తన ఆస్పత్రిని పరోఠా సెంటర్‌గా మార్చారని ఆమె తెలిపారు. ప్రైవేట్‌ ఆస్పత్రుల ఆందోళనల నడుమే ‘రైట్‌ టు హెల్త్‌’ బిల్లును రాజస్థాన్‌ ప్రభుత్వం ఆమోదించింది. ఈ చట్టం అమల్లోకి వస్తే రాజస్థాన్‌లోని పౌరులు ఎలాంటి ఛార్జీలు లేకుండా ఏ ఆస్పత్రిలోనైనా అత్యవసర చికిత్స పొందే అవకాశం కలుగుతోంది. అయితే, ఈ చట్టం పేరుతో రాజస్థాన్‌ ప్రభుత్వం ప్రైవేటు ఆస్పత్రుల వ్యవహారాల్లో జోక్యం చేసుకుంటోందని వైద్యులు ఆరోపిస్తున్నారు. ప్రయివేట్ ఆస్పత్రులు మూసివేయడంతో రోగులు తీవ్ర ఇబ్బందులకు గురవుతున్నారు. వాతావరణ మార్పులు, వైరస్‌లు విజృంభిస్తోన్న వేళ ప్రయివేట్ ఆస్ప్రతులు మూసివేయడంతో ప్రభుత్వ ఆస్పత్రులకు జనం క్యూ కడుతున్నారు.

అయితే, ఆరోగ్య హక్కు బిల్లుకు ఆమోమదంతో దేశంలో ఇంత వరకు ఏ రాష్ట్రం తీసుకోని, తీసుకోలేని నిర్ణయాన్ని రాజస్థాన్ సర్కారు ఆచరణలో చూపించింది. ప్రభుత్వ ఆసుపత్రుల్లో ఇన్ పేషెంట్, అవుట్ పేషెంట్ సేవలను ఉచితంగా పొందొచ్చు. అంతేకాదు, ఎంపిక చేసిన ప్రైవేటు ఆసుపత్రుల్లోనూ ఇదే మాదిరిగా ఉచిత సేవలు పొందే హక్కు ప్రజలకు ఉంటుంది. వైద్యుల కన్సల్టేషన్, వైద్య పరీక్షలు, ఔషధాలు, అత్యవసర వైద్యం, శస్త్ర చికిత్సలను కొన్ని నిబంధనలు, షరతులకు లోబడి అన్ని ప్రభుత్వ ఆసుపత్రులు, ఎంపిక చేసిన ప్రైవేటు ఆసుపత్రుల్లో పొందొచ్చని ప్రభుత్వం ప్రకటించింది. రోడ్డు ప్రమాదాలకు గురైన వారు అత్యవసర వైద్యాన్ని రూపాయి చెల్లించకుండానే ఉచితంగా పొందొచ్చని బిల్లు స్పష్టం చేస్తోంది.