వైఎస్ సునీతపై కడప ఎంపీ సంచలన ఆరోపణలు చేశారు

కడప ఎంపీ వైఎస్ అవినాష్ రెడ్డి తెలంగాణ హైకోర్టును ఆశ్రయించారు.. ముందస్తు బెయిల్ పిటిషన్ దాఖలు చేశారు. అయితే ఈ పిటిషన్‌లో ఎంపీ సంచలన విషయాలను ప్రస్తావించారు. తనకు 160 సీఆర్పీసీ కింద నోటీస్ ఇచ్చారని ప్రస్తావించారు. అలాగే ఈ హత్య కేసుతో తనకు సంబంధం లేదని.. కుట్ర పన్ని ఇరికించే ప్రయత్నం చేస్తున్నారన్నారు. వివేకా కుమార్తె వైఎస్ సునీతా రెడ్డి, స్థానిక ఎమ్మెల్సీ, రాష్ట్ర ప్రతిపక్ష నేతతో కలిసి కుట్ర చేస్తున్నారన్నారు. కేవలం గూగుల్ టే కౌట్ ఆధారంగానే తనను నిందితుడిగా చేర్చే ప్రయత్నం చేస్తున్నారన్నారు.

తాను ఈ కేసులో ఇప్పటి వరకు నిందితుడిగా లేనని.. 2021లో సీబీఐ దాఖలు చేసిన చార్జ్ షీట్‌లో తనను అనుమానితుడిగా చేర్చారన్నారు. సీబీఐ దగ్గర తనపై నేరం రుజువు చేయడానికి ఎలాంటి ఆధారాలు లేవు అన్నారు. వివేకా హత్య కేసులో సీబీఐ మరో నిందితుడు దస్తగిరిని ఢిల్లీకి పిలిచి చాలా రోజుల అక్కడే ఉంచారన్నారు. అక్కడే అతడిని అప్రూవర్‌గా మార్చారని.. దస్తగిరి స్టేట్మెంట్ ఒక్కటే ప్రామాణికంగా సీబీఐ తీసుకుందన్నారు.

అలాగే వివేకానందరెడ్డి రెండో భార్య ఉందని.. ఆమె కొడుక్కి హైదరాబాద్ పబ్లిక్ స్కూల్లో సీటు ఇప్పిస్తానని వివేకా హామీ ఇచ్చారన్నారు. ఆ స్కూల్ పక్కనే విల్లా కొనుగోలు చేయాలని వివేకా భావించారన్నారు. వివేకా రెండో భార్యకు మధ్య ఆర్థిక లావాదేవీలు ఉన్నాయని.. అందుకే కుమార్తె సునీత కక్ష గట్టింందన్నారు. ఆ తర్వాత వివేకా చెక్ పవర్‌ను సునీత తొలగించారని.. డబ్బు కోసం బెంగుళూరులో వివేకా ల్యాండ్ సెటిల్మెంట్స్ చేశారని ప్రస్తావించారు. నిందితులతో కలిసి వివేకా డైమండ్స్ వ్యాపారం చేశారని.. ఇద్దరు నిందితుల కుటుంబ సభ్యులతో వివేకాకు వివాహేతర సంబంధం ఉందన్నారు.