సముద్రుడికి హారతిచ్చి, గంగమ్మకు పట్టువస్త్రాలు సమర్పణ

ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి.. బందరు పోర్టు పనులను ప్రారంభించారు. కృష్ణా జిల్లా తపసిపూడిలో సముద్రుడికి హారతిచ్చి, గంగమ్మకు పూజలు చేసి పట్టువస్త్రాలు సమర్పించారు. అనంతరం తపసిపూడి తీరంలో బ్రేక్ వాటర్ పనులను జెండా ఊపి ప్రారంభించారు. అనంతరం మచిలీపట్నంలో ఏర్పాటు చేసిన సభలో వైఎస్ జగన్ మాట్లాడారు. చంద్రబాబు, ఇతర ప్రతిపక్ష పార్టీల నాయకులపై విమర్శలు గుప్పించారు.

'గతంలో బందరు జిల్లా హెడ్ క్వార్టర్ అయినా.. కలెక్టర్ తో సహా ఒక్క అధికారి కూడా ఇక్కడ ఉండేవారు కాదు. వారంలో ఒకరోజు వస్తే అదే పదివేలు అన్నట్లు పరిస్థితి ఉండేది. ఇప్పుడు కలెక్టర్ తో సహా మొత్తం యంత్రాంగం ఇక్కడే ఉంటున్నారు. చంద్రబాబు మచిలీపట్నానికి తీవ్ర ద్రోహం చేశారు. పోర్టు గ్రహణాలన్నీ తొలగిపోయాయి. ఇక అడుగులు వేగంగా పడతాయి. మచిలీపట్నం రూపు రేఖలు మారబోతున్నాయి' అని సీఎం జగన్‌ వ్యాఖ్యానించారు.

జగన్ నా కంటే చిన్నవాడైపోయారు.. లేకపోతే పాదాభివందనం చేసేవాడిని: పేర్ని నాని

'బందరుకు శతాబ్దాల చరిత్ర ఉంది. రూ.5,156 కోట్లతో, నాలుగు బెర్తులతో ఈ పోర్టు ప్రారంభం అవుతుంది. ట్రాఫిక్ పెరిగేకొద్దీ బెర్తులను పెంచి.. 116 మిలియన్ టన్నుల వరకు సామర్థ్యం పెంచే అవకాశం ఉంది' అని ముఖ్యమంత్రి జగన్ మోహన్ రెడ్డి వివరించారు.

'విశాఖలో చంద్రబాబు చెప్పిన మాటలు బాధించాయి. పేదల ఇళ్లను సమాధి కట్టే స్థలం అంటారు.. శ్మశానాలతో పోల్చిన చంద్రబాబుకు మానవత్వం ఉందా? ఇళ్లు లేని పేదలకు ఎంత ఆవేదన ఉంటుందో అనే స్పృహ అయినా చంద్రబాబుకు ఉందా? కోడలు మగ పిల్లాడిని కంటానంటే అత్త వద్దు అంటుందా అన్నారు చంద్రబాబు. ఎవరైనా ఎస్సీల్లో పుట్టాలనుకుంటారా అని ఈ వర్గాలను అవమానించారు' అని చంద్రబాబుపై జగన్ ఫైర్ అయ్యారు.

'బీసీల తోకలు కత్తిరిస్తాను అన్నది చంద్రబాబే. రూపం మార్చుకున్న అంటరానితనపు పెత్తందారీ స్వభావం ఆయనది. చంద్రబాబు, దత్త పుత్రుడు అమరావతిలో పేదలకు భూములు ఇవ్వకుండా అడ్డుకుంటూ వచ్చారు. గజదొంగల ముఠా వారు మాత్రమే అమరావతిలో ఉండాలట.. ఇటువంటి సామాజిక అన్యాయం ఉంటుందా? దీన్ని ప్రజలు గమనించాలి. ఎవ్వరూ ఎన్ని కుట్రలు చేసినా.. మీ జగన్‌ మీకు తోడుగా.. అండగా ఉంటాడు. కానీ.. వారి కుట్రలను ప్రజలు గమనించాలి' అని ముఖ్యమంత్రి జగన్ మోహన్ రెడ్డి వ్యాఖ్యానించారు.