బందరు పోర్టు నిర్మాణ పనులను ప్రారంభించిన సీఎం వైఎస్ జగన్

కృష్ణా జిల్లా మచిలీపట్నం ప్రజల కలను నెరవేరుస్తూ.. రూ.5,156 కోట్ల వ్యయంతో చేపడుతున్న పోర్టు నిర్మాణ పనులను ముఖ్యమంత్రి వైఎస్ జగన్‌ మోహన్‌ రెడ్డి సోమవారం ప్రారంభించారు. పూర్తిగా ప్రభుత్వ వ్యయంతో నిర్మిస్తున్న ఈ పోర్టుతో.. వాణిజ్య కార్యకలాపాలు విస్తరించనున్నాయి. భవిష్యత్తులో కృష్ణా జిల్లా ముఖచిత్రం మారనుందనే అభిప్రాయాలు వ్యక్తమవుతున్నాయి.

బందరు పోర్టు పనుల ప్రారంభం సందర్భంగా.. మంత్రులు, ఎమ్మెల్యేలు, ఇతర నేతలు తమతమ సోషల్ మీడియా ఖాతాల్లో పోస్టర్లు పోస్టు చేశారు. అలాగే మంత్రి జోగి రమేష్ ట్విట్టర్ అకౌంట్‌లో కూడా ఓ పోస్టర్‌ను పోస్టు చేశారు. అది కాస్త ఇప్పుడు వైరల్ అయ్యింది. మంత్రి చేసిన ట్వీట్‌లో.. పోర్టు వార్షిక సరకు రవాణా వివరాలు తప్పుగా ఉన్నాయి. 35.12 మిలియన్‌ టన్నుల వార్షిక సామర్థ్యం కాగా.. మంత్రి ఖాతాలో పోస్టు చేసిన దాంట్లో.. 35 టన్నులు అని ఉంది. దీంతో నెటిజన్లు సెటైర్లు వేస్తున్నారు. '35 టన్నులకు పోర్టు కట్టాలా.. కంటైనర్ చాలుగా' అని సెటైర్లు వేస్తున్నారు.

35.12 మిలియన్‌ టన్నుల వార్షిక సామర్థ్యంతో.. రెండు జనరల్‌ కార్గోకు, ఒకటి బొగ్గుకు, మరొకటి మల్టీపర్పస్‌ కంటైనర్‌తో ఎగుమతి, దిగుమతులకు ఉపయోగపడేలా.. మొత్తం నాలుగు బెర్తులతో మచిలీపట్నం పోర్టును నిర్మిస్తున్నారు. ఈ పోర్టు పనులు పూర్తయితే.. ప్రత్యక్షంగా, పరోక్షంగా 25 వేల మందికి ఉపాధి లభించనుంది. వాణిజ్య కార్యకలాపాలు విస్తరించేకొద్దీ.. 16 బెర్తులతో 116 మిలియన్‌ టన్నుల వార్షిక సామర్థ్యంతో పోర్టును విస్తరించేలా ప్రణాళిక రూపొందించారు.

ఈ పోర్టు ద్వారా గుంటూరు, కృష్ణా, ఎన్టీఆర్, తూర్పు, పశ్చిమ గోదావరి జిల్లాలతో పాటు.. తెలంగాణలోని ఖమ్మం, కరీంనగర్, అదిలాబాద్, నల్గొండ, వరంగల్‌ జిల్లాలకు ఎరువులు, బొగ్గు, వంటనూనె, కంటైనర్ల దిగుమతులు, వ్యవసాయ ఉత్పత్తులు, సిమెంట్, సిమెంట్‌ క్లింకర్, గ్రానైట్, ముడి ఇనుము ఎగుమతులకు వేదికగా మారనుంది. సుమారు రూ.16,000 కోట్ల వ్యయంతో.. రామాయపట్నం, మచిలీపట్నం, కాకినాడ గేట్‌వే, మూలపేట పోర్టుల నిర్మాణాల ద్వారా ప్రత్యక్షంగా.. పరోక్షంగా 75 వేల మందికి ఉపాధి లభించనుంది.