17 ఏళ్ల వయసులో కిడ్నాపై,,,తాజాగా యూపీలోని ఓ యువకుడితో సహజీవనం

కొన్ని ఘటనలు సినిమాలను మించిపోతుంటాయి. 17 ఏళ్ల కిందట కిడ్నాప్‌నకు గురయిన ఓ మహిళ ఆచూకీ లభ్యమయ్యింది. 17 ఏళ్ల వయసులో 2006 నుంచి కనిపించకుండాపోయిన మహిళను ఢిల్లీలోని గోకుల్‌పురిలో గుర్తించారు. డీసీపీ షాదారా రోహిత్ మీనా తెలిపిన వివరాల ప్రకారం.. మే 22న సీమాపురి పోలీస్ స్టేషన్‌కు చెందిన బృందం రహస్య సమాచారంతో 17 ఏళ్ల క్రితం కిడ్నాప్‌కు గురైన 32 ఏళ్ల (ప్రస్తుతం) బాలికను గుర్తించింది. తమ కుమార్తె అపహరణకు గురైనట్టు 2006లో బాలిక తల్లిదండ్రులు.. గోకుల్‌పురి పోలీస్ స్టేషన్‌లో ఫిర్యాదు చేశారు. దీంతో మిస్సింగ్ కేసు నమోదుచేసిన పోలీసులు.. దర్యాప్తు చేపట్టారు.

అయితే, ఆమె ఏమైందో? ఎక్కడుందో? పోలీసులకు ఎటువంటి సమాచారం అందలేదు. కేసులో పురోగతి లేకపోవడంతో పోలీసులు చేతులెత్తేశారు. ఇక, తమ కుమార్తె దాదాపు చనిపోయిందని కుటుంబసభ్యులు భావించారు. కానీ, అనూహ్యంగా ఆమె గురించి మే 22న పోలీసులకు సమాచారం అందింది. దీంతో సీమాపురి స్టేషన్ పోలీసుల బృందం అక్కడకు చేరుకుని, ఆమెను పట్టుకుంది. అనంతరం స్టేషన్‌కు తరలించిన విచారణ చేపట్టింది. ఇన్నేళ్లూ ఎక్కడ ఉన్నావు? ఎందుకెళ్లిపోయావని పోలీసులు ప్రశ్నించడంతో ఆమె కీలక వివరాలను వెల్లడించింది.

‘బాలిక 2006లో కిడ్నాప్‌ అయ్యింది.. విచారణలో మాత్రం ఇంటి నుంచి వెళ్లిన తర్వాత ఆ బాలిక ఉత్తర్ ప్రదేశ్‌లోని చెర్డిహ్ జిల్లా బలియా గ్రామంలో దీపక్ అనే వ్యక్తితో కలిసి జీవించినట్టు వెల్లడించింది.. ఇరువురి మధ్య మనస్పర్దలు రావడంతో కొన్ని వివాదాల కారణంగా కరోనా లాక్‌డౌన్ సమయంలో దీపక్‌ను వదిలి గోకుల్‌పురికి వచ్చి ఓ అద్దె ఇంట్లో నివసిస్తున్నట్టు తెలిపింది’ అని పోలీసులు పేర్కొన్నారు. అయితే, షాదారా జిల్లాలో ఈ ఏడాది ఇప్పటి వరకూ కనిపించకుండాపోయిన 301 మంది, అపహరణ లేదా కిడ్నాప్‌నుకు గురైన మరో 116 మందిని రక్షించినట్టు తెలిపారు.