రెప్పపాటులో జరిగిపోయిన పెను ప్రమాదం,,,,బాధితుల ఆర్తనాదాలతో దద్దరిల్లిన ఘటనా స్థలి

ఒడిశాలో శుక్రవారం రాత్రి చోటుచేసుకున్న కోరమాండల్ రైలు ప్రమాదాన్ని భారతీయ రైల్వే చరిత్రలోనే అత్యంత విషాదకర ఘటనల్లో ఒకటిగా భావిస్తున్నారు. ఈ ప్రమాదంలో ఇప్పటి వరకూ 238 మంది ప్రాణాలు కోల్పోగా.. దాదాపు 1000 మంది గాయపడ్డారు. కోరమాండల్ ఎక్స్‌ప్రెస్, బెంగళూరు-హౌరా యశ్వంతపూర్ సూపర్‌ఫాస్ట్ రైళ్లు.. ఓ గూడ్సు ఢీకొట్టడంతో ప్రాణనష్టం భారీగా ఉంది. ఘటనా స్థలిలో తెగిపడిన చేతులు, కాళ్లు.. తలలేని మొండెంలతో భీతావాహ పరిస్థితి నెలకుంది. సమీపంలోని పలు ప్రభుత్వ, ప్రయివేట్ ఆస్పత్రుల్లో క్షతగాత్రులకు చికిత్స కొనసాగుతోంది.

ఇక, ప్రమాదం తర్వాత స్థానికులు స్పందించి తీరు మానవత్వానికి అద్దం పడుతోంది. ఘటనా స్థలికి చేరుకుని సహాయక చర్యల్లో పాల్గొని.. ఎన్డీఆర్ఎఫ్, ఎస్డీఆర్ఎఫ్, అగ్నిమాపక సిబ్బందికి సహకరించారు. అలాగే, ఆస్పత్రుల్లో చికిత్స పొందుతున్న క్షతగాత్రులకు రక్తం ఇవ్వడానికి భారీగా క్యూ లైన్‌లో వేచి చూస్తున్నారు. 200 నుంచి 300 మంది వరకూ క్షతగాత్రులను తాము రక్షించామని గణేశ్ అనే స్థానికుడు తెలిపారు.

గత రాత్రి నుంచి మొదలైన రెస్క్యూ ఆపరేషన్ ఇంకా కొనసాగుతోందని ఇండియన్ ఆర్మీ అధికారి కల్నల్ ఎస్కే దత్ తెలిపారు. కోల్‌కతా నుంచి మరింత మంది వస్తున్నారని చెప్పారు. మొత్తం 200 అంబులెన్స్‌లు మొత్తం 200 అంబులెన్స్‌లు; 45 మొబైల్ హెల్త్ టీమ్‌లతో పాటు 108 ఫ్లీట్‌లలో 167, 20కి పైగా ప్రభుత్వ అంబులెన్స్‌లు సంఘటనా స్థలంలో మోహరించినట్లు అధికారులు వివరించారు. దీంతో పాటు ఎస్‌సీబీకి చెందిన 25 మంది వైద్యుల బృందంతో పాటు 50 మంది అదనపు వైద్యులను కూడా సహాయక చర్యల్లో పాల్గొన్నారు.

మృతదేహాల గుర్తింపు పర్యవేక్షణ కోసం బారిపడ, ఎస్‌సీబీ ఎంబీకి చెందిన ఫోరెన్సిక్ మెడిసిన్ స్పెషలిస్టులను నియమించారు. డైరెక్టర్ ఆఫ్ హెల్త్ సర్వీసెస్, డైరెక్టర్ ఆఫ్ బ్లడ్ సేఫ్టీ, అదనపు డీఎంఈటీ, మరో ముగ్గురు అదనపు డైరెక్టర్లు బాలాసోర్‌లో ఉన్నారు. ఆరోగ్య బృందాలతో సమన్వయం చేస్తున్నారు. నిన్న రాత్రి నుంచి ఆరు బృందాలు పని చేస్తున్నాయని ఎన్డీఆర్‌ఎఫ్ సీనియర్ కమాండెంట్ వివరించారు.