నా కుటుంబ సభ్యులను క్రూరంగా హింసించి డబ్బులు వసూలు చేశారు

పోలీసులు చెప్పే వరకు తమ కుటుంబ సభ్యులు కిడ్నాప్‌ అయినట్లు తనకు తెలియదని విశాఖపట్నం వైఎస్సార్ కాంగ్రెస్ పార్టీ ఎంపీ ఎంవీవీ సత్యనారాయణ తెలిపారు. తన కుటుంబం కిడ్నాప్ వ్యవహారంపై విశాఖలో బుధవారం ఎంపీ సత్యనారాయణ మీడియా సమావేశం నిర్వహించారు. ఈ సందర్భంగా ఎంవీవీ సత్యనారాయణ మాట్లాడుతూ.. ఈ నెల 12వ తేదీన తెల్లవారుజామున గుర్తు తెలియని వ్యక్తులు ఇంట్లోకి వచ్చారని చెప్పారు. ఈ సమయంలో కిడ్నాపర్లు తమ కుటుంబ సభ్యులను క్రూరంగా హింసించి డబ్బులు వసూలు చేశారని తెలిపారు.

మూడు రోజుల పాటు రెక్కీ నిర్వహించి మరీ తన కుటుంబ సభ్యులను కిడ్నాప్‌ చేశారని చెప్పారు. ఈ కేసులో హేమంత్‌ అనే వ్యక్తిని అదుపులోకి తీసుకున్నట్లు పోలీసులు చెప్పారన్నారు. అతడిపై ఇప్పటికే 13 కేసులు ఉన్నాయని.. ఏ 2 నిందితుడు రాజేష్‌పై 40కి పైగా కేసులు ఉన్నాయని చెప్పారు. అయితే, హేమంత్‌తో తనకు ఎలాంటి సంబంధం లేదని స్పష్టం చేశారు. ఇక, విశాఖపట్నంలో రక్షణ లేదని కొందరు అనటం సరికాదన్నారు. కిడ్నాప్‌ జరిగిన కొన్ని గంటల వ్యవధిలోనే ఈ కేసును పోలీసులు ఛేదించారని చెప్పారు.

ఇక, కిడ్నాప్‌లు, హత్యలు, నేరాలు అన్ని ప్రభుత్వాల్లో జరుగుతాయని.. అవి జరగకుండా ఉండవని, అయితే వాటిని కంట్రోల్‌ చేసుకుంటుంటామని ఎంపీ సత్యనారాయణ అభిప్రాయపడ్డారు. విశాఖలో నేరాలు, ఘోరాలు జరిగిపోవడం లేదన్నారు. తాను రాజకీయాల్లో ఉండటం వల్ల తన వ్యాపారంలో ప్రతి దాన్నీ వక్రీకరిస్తున్నారని ఆవేదన వ్యక్తం చేశారు. అందుకే తన వ్యాపారం తెలంగాణలో.. సేవలు ఇక్కడ అని చెప్పానని వివరించారు. రాష్ట్ర ప్రభుత్వం నుంచి తనకు మద్దతు లేదని ప్రచారం చేయడం సరికాదని.. ఇందులో వాస్తవం లేదన్నారు. తన వల్ల ప్రభుత్వానికి, ముఖ్యమంత్రి వైఎస్ జగన్మోహన్ రెడ్డికి చెడ్డ పేరు రాకూడదనే ఉద్దేశంతోనే తెలంగాణలో వ్యాపారం చేయాలని నిర్ణయించుకున్నట్లు చెప్పుకొచ్చారు.

అయితే, విశాఖపట్నంలో తామేమైనా ప్రభుత్వ, ప్రైవేటు ఆస్తులు దోచుకున్నామా అని ఎంపీ సత్యనారాయణ ప్రశ్నించారు. విశాఖలో తమది నమ్మకమైన సంస్థ అని అన్నారు. కుటుంబం వేరు.. రాజకీయాలు వేరని.. నా కుటుంబ సభ్యులు కిడ్నాప్‌నకు గురై చావు వరకు వెళ్లొస్తే దాన్ని కూడా రాజకీయం చేస్తే ఎలాగని ప్రశ్నించారు. కిడ్నాప్‌ వెనుక కుట్ర ఉందనే ఆరోపణలు దురదృష్టకరమని ఎంవీవీ సత్యనారాయణ అన్నారు.