ఎక్కడికి వెళ్లారో...?
Andhra Pradesh Telugu | Suryaa Desk | Published : Wed, Jun 28, 2023, 11:19 AM
విశాఖ, గాజువాక ప్రాంతానికి చెందిన ముగ్గురు కాలేజీ విద్యార్థులు అదృశ్యమయ్యారు. వివరాల్లోకి వెళ్ళితే.... గాజువాక ప్రాంతానికి చెందిన గండ్రెడ్డి ఉమేశ్‌ పవన్‌, పిల్లల దిలీప్‌, య.దంతేశ్వరి (బాబీ) గాజువాకలోని ఓ కార్పొరేట్‌ కళాశాలలో ఇంటర్మీడియట్‌ ద్వితీయ సంవత్సరం చదువుతున్నారు. స్నేహితులైన ఈ ముగ్గురూ ఈ నెల 24న కళాశాలకు వెళుతున్నామని చెప్పి ఇళ్ల నుంచి బయలుదేరారు. అయితే వీరు కళాశాలకు రాలేదని కాలేజీ యాజయాన్యం వారి తల్లిదండ్రులకు సమాచారం అందించింది. దీంతో కంగారు పడిన తల్లిదండ్రులు గాజువాక పోలీసులను ఆశ్రయించారు. ఈ నెల 24న వీరు కె.కోటపాడులోని దిలీప్‌ బంధువుల ఇంటికి వెళ్లి, అక్కడ భోజనం చేసి సాయంత్రానికి గాజువాక చేరుకున్నారని, అక్కడ నుంచి బస్సులో నగరంలోని బీచ్‌కు వెళ్లినట్టు పోలీసులు గుర్తించారు. వీరి కోసం మూడు బృందాలుగా ఏర్పడి గాలింపు చర్యలు చేపట్టామని ఏసీపీ టి.త్రినాథ్‌ తెలిపారు. కాగా ఈ ముగ్గురు కళాశాలలోని సహచర విద్యార్థులతో తాము సరిగ్గా చదవలేకపోతున్నామని, అందువల్ల ముంబై వెళ్లి ఏదైనా పనిచేసుకుందామని అనుకుంటున్నామని తెలిపినట్టు పోలీసులు పేర్కొన్నారు.
|
|