పెళ్లి కాని వారికి పెన్షన్లు ఇస్తాం.... హర్యానా ముఖ్యమంత్రి మనోహర్ లాల్

పెళ్లి కాని వారికి పెన్షన్ ఇచ్చేందుకు హర్యానా రాష్ట్ర ప్రభుత్వం సన్నాహాలు చేస్తోంది. అతి త్వరలోనే ఈ పథకానికి సంబంధించిన విధి విధానాలు రూపొందించి విడుదల చేస్తామని.. హర్యానా ముఖ్యమంత్రి మనోహర్ లాల్ ఖట్టర్ స్పష్టం చేశారు. కర్ణాల్ జిల్లా కాలాంపురా గ్రామంలో జరిగిన జన్ సంవాద్ కార్యక్రమంలో భాగంగా మనోహర్ లాల్ ఖట్టర్ ఈ పథకం గురించి ప్రకటన చేశారు. పెళ్లి కాని ఓ 60 ఏళ్ల వృద్ధుడు తన పెన్షన్ కోసం ముఖ్యమంత్రికి ఫిర్యాదు చేయగా.. ఈ పెళ్లి కాని వారి కోసం కూడా ఓ పథకాన్ని ప్రవేశ పెట్టనున్నట్లు ఖట్టర్ తెలిపారు. అయితే ఈ పథకం కింద పెన్షన్ పొందే వారికి పలు షరతులు, నియమ నిబంధనలు కూడా ఉంటాయని ఈ సందర్భంగా ఖట్టర్ వెల్లడించారు.

పెళ్లి కాని పురుషులు, స్త్రీలకు ఈ పెన్షన్ అందజేస్తామని హర్యానా ముఖ్యమంత్రి స్పష్టం చేశారు. ఎవరైతే 45 ఏళ్ల నుంచి 60 ఏళ్ల లోపు ఉన్న పురుషులు, స్త్రీలు పెళ్లి కాకుండా ఉంటారో వారే ఈ పథకం కింద అర్హులు అవుతారని మనోహర్ లాల్ ఖట్టర్ వెల్లడించారు. పెళ్లి కాని వారికి నెల నెలా రూ. 3 వేల పెన్షన్‌కు అందిస్తామని చెప్పారు. వచ్చే నెల రోజుల లోపే ఈ పథకానికి శ్రీకారం చుడతామని ఖట్టర్ వ్యాఖ్యానించారు. అదే విధంగా ఇప్పటివరకు హర్యానాలో పెన్షన్ పొందుతున్న వృద్ధులకు మనోహర్ లాల్ ఖట్టర్ ప్రభుత్వం మరో శుభవార్త చెప్పింది. ప్రస్తుతం హర్యానాలో వృద్ధులకు ఇచ్చే పెన్షన్‌ను.. రానున్న 6 నెలల్లో రూ. 3 వేలకు పెంచుతామని ప్రకటించారు.

ఒక్కసారి కూడా పెళ్లి కాని వారికి మాత్రమే ఈ పెన్షన్ పథకం వర్తిస్తుందని అధికారులు స్పష్టం చేశారు. లబ్ధిదారులు ఖచ్చితంగా హర్యానాలో నివసిస్తూ ఉండాలి. వారి ఆదాయం సంవత్సరానికి రూ. 1.80 లక్షలకు మించకూడదని నిబంధన పెట్టారు. ఈ పథకం కింద హర్యానా రాష్ట్రంలో 1.25 లక్షల మంది లబ్ధిదారులు పింఛను పొందేందుకు అర్హులు అవుతారని అంచనా వేస్తున్నారు. మనోహర్ లాల్ ఖట్టర్ చేసిన ప్రకటనలో హర్యానాలో పెళ్లి కాకుండా ఉన్న స్త్రీ, పురుషులు సంతోషం వ్యక్తం చేస్తున్నారు. ఈ పథకం గురించిన వార్తలు బయటికి రావడంతో సోషల్ మీడియాలో తెగ వైరల్‌గా మారాయి. దీనిపై నెటిజన్లు పాజిటివ్‌గా స్పందిస్తున్నారు. వయసు మీద పడి తోడు లేక బతుకుతున్న వారిని ప్రభుత్వం ఆదుకుంటామని చెప్పడంతో హర్షం వ్యక్తం చేస్తున్నారు.