ఉక్రెయిన్‌లోని క్రిమియాను ఆక్రమించిన రష్యా,,,సెర్గీ అకన్యోవ్‌ను చీఫ్‌గా నియమించిన వ్లాదిమిర్ పుతిన్

క్రిమియా చీఫ్‌ హత్యకు జరిగిన కుట్రను రష్యా ఫెడరల్ సెక్యూరిటీ సర్వీసెస్ అడ్డుకుని, ఓ అనుమానితుడ్ని అదుపులోకి తీసుకుందని ఆ దేశ వార్తా సంస్థ సోమవారం వెల్లడించింది. ఉక్రెయిన్ స్పెషల్ సర్వీసెస్ ఆధ్వర్యంలో ఈ హత్యాయత్నం జరిగినట్టు రష్యా అధికారిక మీడియా టాస్ ఆరోపించింది. రిపబ్లిక్ ఆఫ్ క్రిమియా హెడ్ సెర్గీ అకన్యోవ్ హత్యకు జరిగిన కుట్రను భగ్నం చేశారని తెలిపింది. దీనిపై ఓ ప్రకటన చేసిన ఎఫ్‌ఎస్బీ.. ఉక్రెయిన్ సెక్యూరిటీ సర్వీస్ అధికారులతో నియమితుడైన 1988లో జన్మించిన రష్యన్ జాతీయుడ్ని అరెస్ట్ చేసినట్టు వివరణ ఇచ్చింది.

పేలుడు పదార్థాలను దాచిన ప్రదేశం నుంచి తొలగిస్తుండగా నిందితుడ్ని అదుపులోకి తీసుకున్నట్లు తెలిపింది. ఉక్రెయిన్‌ నుంచి క్రిమియాను 2014లో స్వాధీనం చేసుకున్న రష్యా.. అక్కడ ప్రజాభిప్రాయ సేకరణ చేపట్టి రిపబ్లిక్‌గా ప్రకటించింది. ఉక్రెయిన్, పశ్చిమ దేశాలు తీవ్ర అభ్యంతరం వ్యక్తం చేస్తున్నా.. రష్యా మాత్రం వెనక్కి తగ్గలేదు. ఉక్రెయిన్‌పై దండయాత్ర మొదలైనప్పటి నుంచి క్రిమియాలోని రష్యా అధికారులు, కార్యాలయాలపై తరుచూ దాడులు జరుగుతున్నాయి. వీటి వెనుక కీవ్ హస్తం ఉందని మాస్కో ఆరోపిస్తోంది.

ఇదిలా ఉండగా, గతవారం కిరాయి సైన్యం వాగ్నర్‌ గ్రూపు చేపట్టిన తిరుగుబాటు రష్యాను కలవరపెట్టిన సంగతి తెలిసిందే. అయితే ఆ గ్రూపు అకస్మాత్తుగా వెనక్కి తగ్గడంతో రష్యన్లు ఊపిరి పీల్చుకున్నారు. అయితే, ప్రిగోజిన్‌ వ్యూహాలు అమెరికాకు ముందే తెలుసంటూ రష్యా మీడియా సంస్థలు కథనాలు ప్రచురించాయి. ఆ ఆరోపణలను, మీడియా కథనాలను అమెరికా తోచిపుచ్చింది. రష్యాపై వాగ్నర్ సైన్యం చేపట్టిన తిరుగుబాటులో తమకు ఎలాంటి సంబంధం లేదని పేర్కొంది.

అంతకు ముందు, తిరుగుబాటు సమయంలోనే అమెరికా అధ్యక్షుడు జో బైడెన్‌ అప్రమత్తమయ్యారు. ఫ్రాన్స్‌ అధ్యక్షుడు మెక్రాన్‌, జర్మనీ ఛాన్స్‌లర్‌ షోల్జ్‌, బ్రిటన్‌ ప్రధాని రిషి సునాక్‌తో మాట్లాడి.. రష్యాలో వాగ్నర్‌ గ్రూప్‌ తిరుగుబాటు విషయంలో పశ్చిమ దేశాల జోక్యం ఉందంటూ పుతిన్‌ చేస్తున్న ఆరోపణలకు ఎటువంటి బలం చేకూర్చకుండా చూడటం ముఖ్యమని నొక్కి చెప్పారు.