చంద్రబాబుకు చరమ గీతం పాడేంత వరకూ నేను బతికే ఉంటా

తన ఆరోగ్యం మీద వస్తున్న వదంతులపై వైసీపీ ఎమ్మెల్యే కొడాలి నాని ఘాటుగా స్పందించారు. తెలుగు దేశం పార్టీనే తనపై ఇలాంటి ప్రచారం చేపిస్తోందన్నారు. ఈ మేరకు మంగళవారం ఆయన మీడియాతో మాట్లాడారు. గుడివాడ వైఎస్సార్ కాంగ్రెస్ పార్టీ ఎమ్మెల్యే, మాజీ మంత్రి కొడాలి నాని ఆరోగ్యంపై మీడియాలో వస్తున్న వార్తలను ఆయన ఖండించారు. శునకానందం కోసమే కొందరు ఇలా చేస్తున్నారంటూ తెలుగు దేశం పార్టీని ఉద్దేశించి కొడాలి నాని తీవ్ర విమర్శలు గుప్పించారు. ఈ మేరకు మంగళవారం విజయవాడలో కొడాలి నాని మీడియాతో మాట్లాడుతూ.. తాను అనారోగ్యానికి గురైనట్లు సోషల్‌ మీడియాలో ప్రచారం చేస్తున్నారని చెప్పారు.

ఇలాంటి ప్రచారాల వల్ల తనకేం కాదని కొడాలి నాని అని అన్నారు. ఐటీడీపీ ద్వారా తెలుగు దేశం పార్టీ ఇలాంటి ప్రచారం చేయిస్తోందని ఆరోపించారు. ఇది ఆ పార్టీ దిగజారుడు తననానికి నిదర్శనమన్నారు. చంద్రబాబునాయుడుని, రాజకీయాల నుంచి.. రాష్ట్రం నుంచి ఇంటికి సాగనంపే వరకు తాను ఈ భూమ్మీదే ఉంటానని చెప్పారు. చంద్రబాబుకి రాజకీయాల నుంచి చరమగీతం పాడేంత వరకూ ఉంటానని ఘాటుగా స్పందించారు.

ఇక, చంద్రబాబుతో పాటు పవన్ కళ్యాణ్‌ వైఖరిపైనా కొడాలి నాని తీవ్ర వ్యాఖ్యలు చేశారు. చంద్రబాబు, పవన్ కళ్యాణ్ ఇద్దరూ మానసిక వికలాంగులని.. వాళ్లను మానసిక వైకల్య కేంద్రంలో చేర్చాలని ముఖ్యమంత్రి వైఎస్ జగన్మోహన్ రెడ్డిని కోరుతున్నానని చెప్పారు. 2024 ఎన్నికల తర్వాత వాళ్లిద్దర్నీ ఆస్పత్రిలో చేరుస్తామని సెటైర్లు వేశారు. అలాగే, నారా లోకేష్‌కు దమ్ముంటే తనపై పోటీకి దిగాలని సవాల్‌ చేసి చాలా రోజులైనా.. ఇప్పటి వరకు ఆయన మాత్రం స్పందించడం లేదని కొడాలి నాని అన్నారు.