ఎడతెరిపి లేని వర్షాలతో ఉత్తర భారతంలో విలయం,,,ఉత్తరకాశీ వద్ద యాత్రికుల వాహనాలపై పడ్డ బండరాళ్లు

ఎడతెరిపి లేని వర్షాలతో దేవభూమి ఉత్తరాఖండ్ అల్లాడుతోంది. గంగ, యమున వంటి హిమనీ నదాలు ఉప్పొంగి ప్రమాదకర స్థాయిని దాటి ప్రవహిస్తున్నాయి. భారీ వర్షాలకు పలు ప్రాంతాల్లో రోడ్లు తెగిపోయి.. కొండచరియలు విరిగిపడుతున్నాయి. సోమవారం సాయంత్రం ఉత్తరకాశీ జిల్లాలో కొండచరియలు విరిగిపడి.. కొండ పక్క నుంచి వెళ్తోన్న వాహనాలపైకి బండ రాళ్లు దూసుకొచ్చాయి. ఈ ఘటనలో నలుగురు ప్రాణాలు కోల్పోగా.. మరో ఏడుగురు గాయపడ్డారు. మధ్యప్రదేశ్‌కు చెందిన యాత్రికులు.. గంగోత్రి దర్శనం చేసుకుని తిరిగొస్తుండగా ఈ ప్రమాదం జరిగింది.

సుమారు 30 మంది ప్రయాణికులతో మూడు వాహనాలు కొండ పక్కనే ఉన్న రోడ్డుపై వెళుతుండగా ఒక్కసారిగా బండరాళ్లు దొర్లుకుంటూ వచ్చి ఆ వాహనాలపై పడ్డాయి. ఈ ఘటనలో ఓ మహిళ సహా నలుగురు మృతి చెందారు. ఏడుగురు గాయపడగా.. వీరిలో ఒకరి పరిస్థితి విషమంగా ఉంది. బాధితులంతా మధ్యప్రదేశ్‌లోని ఇండోర్ నగరానికి చెందినవారిగా గుర్తించారు. ధ్వంసమైన వాహనాల అక్కడ ప్రమాద తీవత్రను తెలియజేస్తున్నాయి. చిన్న బస్సు ఒకవైపు పూర్తిగా నుజ్జునుజ్జయింది. మరో రెండు చిన్న వాహనాలు కూడా భారీగా దెబ్బతిన్నాయి.

రుతుపవనాల ప్రభావంతో తీవ్రంగా నష్టపోయిన ఉత్తర భారత రాష్ట్రాల జాబితాలో ఉత్తరాఖండ్ చేరింది. భారీ వర్షాల కారణంగా పలు ప్రాంతాల్లో కొండచరియలు విరిగిపడడంతోపాటు వంతెనలు కొట్టుకుపోయాయి. వాతావరణం అనుకూలించే వరకూ డెహ్రాడూన్‌లోని విద్యా సంస్థలను మూసివేయాలని అధికారులు ఆదేశించారు. కాగా, ఆదివారం తెహ్రీ జిల్లా గులార్ వద్ద జరిగిన ప్రమాదంలో ఓ తెలుగు వ్యక్తి సహా ఆరుగురు చనిపోయిన విషయం తెలిసిందే.భారీ వర్షాలకు గులార్ వద్ద కొండచరియలు విరిగి పడి.. రోడ్లపై పడ్డాయి. ఈ క్రమంలో రోడ్డుకు అడ్డుగా పడి ఉన్న బండరాయిని తప్పించబోయి వాహనం అదుపుతప్పి నదిలో పడింది. బాధితులు సోన్‌ ప్రయాగ్ నుంచి శనివారం రాత్రి 8 గంటలకు రిషికేశ్‌కు బయలుదేరారు. ఈ క్రమంలో రాత్రి 3 గంటల సమయంలో తెహ్రీ జిల్లా గులార్ సమీపంలోని మలకుంతి బ్రిడ్జ్ వద్ద వీరి వాహనం ప్రమాదానికి గురయ్యింది. రోడ్డుకు అడ్డంగా ఉన్న బండ రాయిను తప్పించబోయి నదిలోకి దూసుకెళ్లింది.  మరోవైపు, పక్కనే ఉన్న హిమాచల్ ప్రదేశ్‌లోనూ భారీ వర్షాలు బీభత్సం సృష్టిస్తున్నాయి. గత 50 ఏళ్లలో ఎన్నడూ ఇటువంటి వర్షాలను చూడలేదని ఆ రాష్ట్ర సీఎం సుఖ్విందర్ సింగ్ సుఖు అన్నారు. వేర్వేరు ఘటనల్లో ఇప్పటి వరకూ 30 మంది ప్రాణాలు కోల్పోయారు.