తిరుమలలో టికెట్ల పేరుతో,,,భక్తుల్ని మోసం చేసిన అటెండర్

తిరుమల దేవస్థానంలో అక్రమార్కుల అడ్డా కొనసాగుతోంది. తిరుమల శ్రీవారి దర్శనాలు, సేవల పేరుతో భక్తుల్ని నమ్మించి మోసం చేశాడో టీటీడీ ఉద్యోగి. టీటీడీ ఆధ్వర్యంలోని ఎస్వీ ఆయుర్వేద ఫార్మసీలో అరుణ్‌కుమార్‌ జూనియర్‌ అసిస్టెంట్‌గా పని చేస్తున్నారు. కొద్ది రోజుల కిందట తిరుచానూరుకు చెందిన భరత్‌కుమార్‌, తిరుపతికి చెందిన చంద్రాచారి, కె.విజయకుమార్‌లకు శ్రీవారి ఆర్జిత సేవా, అభిషేకం, దర్శనం టికెట్లు ఇప్పిస్తానని ఉద్యోగి నమ్మించారు. వారి దగ్గర నుంచి అరుణ్‌కుమార్‌ ఆన్‌లైన్‌లో దశల వారీగా రూ.3.56 లక్షల డబ్బు తీసుకున్నారు.

అరుణ్ కుమార్ దర్శన సేవా టికెట్లు ఇప్పించకపోవడమే కాకుండా డబ్బుల్ని కూడా తిరిగి ఇవ్వకపోవడంతో బాధితులు టీటీడీ విజిలెన్స్‌ విభాగాన్ని ఆశ్రయించారు. వెంటనే రంగంలోకి దిగిన తిరుపతి టీటీడీ విజిలెన్స్‌ పోలీసులు తిరుపతి తూర్పు పోలీసులకు ఫిర్యాదు చేశారు. వారు కేసు నమోదు చేసి నిందితుడిని అరెస్టు చేశారు. ఇటీవల కాలంలో దర్శనాల పేరుతో ఇలా చాలామంది భక్తులు మోసపోయారు. గత నెలలో కూడా పలువురు దళారుల్ని పోలీసులు అరెస్ట్ చేసిన సంగతి తెలిసిందే. అంతేకాదు తిరుమల శ్రీవారి భక్తులు దళారుల్ని నమ్మి మోసపోవద్దని టీటీడీ ఎన్నో సందర్భాల్లో హెచ్చరించింది. అయినా సరే కొందరు అమాయంకగా దళారుల చేతిలో మోసపోతున్నారు.

మరోవైపు తిరుమల ఘాట్ రోడ్డులో ప్రమాదం జరిగింది కారు డ్రైవర్‌ కునుకు తీయడంతో వాహనం అదుపుతప్పి దూసుకెళ్లింది. శ్రీకాకుళానికి చెందిన పవన్‌, అప్పలసూరి, పద్మ, దేవి శ్రీవారి దర్శనం కోసం కొత్త కారులో శనివారం తిరుమలకు చేరుకున్నారు. శ్రీవారి దర్శనం అనంతరం తిరుమల నుంచి కారులో మొదటి ఘాట్‌ రోడ్డు మీదుగా కిందకు బయల్దేరారు.. ఈలోపు కారును నడుపుతున్న పవన్‌ కునుకు తీశారు. ఈ క్రమంలోనే వాహనం అదుపుతప్పి రోడ్డు పక్కన గోడవను ఢీకొని అటవీప్రాంతంలోకి వెళ్లి తిరిగి వచ్చి గోడను ఢీకొట్టి ఆగింది. ప్రమాదంలో పద్మకు స్వల్ప గాయాలయ్యాయి. సమాచారం అందుకున్న ఘాట్‌రోడ్డు భద్రతా సిబ్బంది ఘటనా స్థలానికి చేరుకుని కారును పక్కకు తొలగించారు.