ఉపాధ్యాయుడిపై తిట్ల దండకం,,,కడప జిల్లాలో ప్రభుత్వ అధికారి తీరుపై విమర్శలు

కడప జిల్లాలో విద్యాశాఖకు చెందిన ప్రభుత్వ అధికారి రెచ్చిపోయారు. ఉపాధ్యాయులైన భార్యాభర్తలతో మాట్లాడిన తీరు దుమారం రేపుతోంది. ఆడియో వైరల్ కావడంతో.. అధికారి తీరుపై విమర్శలు వినిపిస్తున్నాయి. ఇప్పటికే అధికారి తీరుపై పలు ఫిర్యాదులు ఉన్నాయి. అంతేకాదు ఉపాధ్యాయులను బూతులు తిట్టడంతో పాటు బదిలీల్లో అక్రమాలకు పాల్పడ్డారనే ఆరోపణలు వచ్చాయట. ఆ అధికారి దగ్గరకు విజ్ఞప్తులు, ఫిర్యాదులు తీసుకెళ్లిన ప్రతిసారీ ఉపాధ్యాయులను ఆయన తీవ్ర పదజాలంతో తిట్టేవారని ఆరోపణలు వినిపిస్తున్నాయి.

యూజ్‌లెస్‌ ఫెలో.. అక్రమంగా స్కూల్‌లో ఉంటే సరిపోతుందనుకుంటున్నావా.. ఏమనుకుంటున్నావు అంటూ ఆ టీచర్‌కు వార్నింగ్ ఇచ్చారు అధికారి. 'నువ్వు నామీద వాట్సప్‌లో పెట్టిన పేపర్‌ క్లిప్పింగ్‌లు అన్నీ తీసుకుని రా.. రేపు. పనికిమాలిన గాడిద కొడకా' అంటూ తిట్ల దండకం అందుకున్నారు. స్కూల్లో పాఠాలు చెప్పుకోక ఏం పనిరా.. యూజ్‌లెస్‌ ఫెలో.. రేపు వచ్చి రెక్టిఫికేషన్‌ ఆర్డర్‌ తీసుకుని పోదువురా అంటూ మండిపడ్డారు.

ఆ అధికారి టీచర్ భార్యతో కూడా మాట్లాడారు. 'నీ మొగుడిని సరిచేసుకో అమ్మా.. నీ పిల్లలు అన్యాయమైపోతారు జాగ్రత్త' అంటూ ఘాటుగా స్పందించారు. బిడ్డలకు కూడా పిల్లలను ఎవరూ ఇవ్వరు.. ఎమ్మెల్యేకి ఈయన గురించి చెబుదామనుకున్నా.. ఊళ్లో పరువు పోతుందని చెప్పలేదని ఆమెతో చెప్పారు. 'వీడికేం పనమ్మా?.. నా మీద తిక్క నా కొడుకులు ఎవరో పేపర్‌లో రాస్తే.. వీడు అందరికీ పంచుతాడా వాట్సప్‌లో పంపిస్తాడా' అంటూ ఆగ్రహం వ్యక్తం చేశారు.

అది వాట్సాప్ ఫార్వర్డ్ మెసేజ్ అని చెప్పేందుకు ప్రయత్నించగా.. అసలు ఈ గాడిద కొడుకుకు ఏం పని అంటూ మండిపడ్డారు. 'నీ మీద ఏమన్నా ఒకటి వస్తది.. నేను వేరే వాళ్లకు పంపితే బాగుంటదా.. నువ్వూ స్కూల్‌ అసిస్టెంట్‌వే కదా.. చెప్పు బాగుంటదా నీకు' అంటూ అధికారి మాట్లాడారు. 'నీ భర్తకుఓ మూడు రోజులు బువ్వ పెట్టగాకు దారికొస్తాడు.. లేదంటే నిన్ను చంపేస్తాడు. మెంటల్‌ ఉంది యూజ్‌లెస్‌ ఫెలోకి .. రేపు రమ్మను.. రెక్టిఫికేషన్‌ ఆర్డర్‌ తీసుకుని పొమ్మను' అంటూ విరుచుకుపడ్డారు సదరు అధికారి.

మరోవైపు ఉపాధ్యాయులతో అధికారి ప్రవర్తిస్తున్న తీరు బాగోలేదంటూ ఎమ్మెల్సీ రాంగోపాలరెడ్డి కూడా ‘స్పందన’ కార్యక్రమంలో కలెక్టర్‌‌కు ఫిర్యాదు చేశారు. బదిలీలు, పదోన్నతుల్లో అక్రమాలకు పాల్పడి.. ఉపాధ్యాయుల పట్ల దురుసుగా ప్రవర్తిస్తున్నారని ఆరోపించారు. ఆయన్ను పక్కన పెట్టి.. విచారణ చేపట్టాలని లేఖను అందించారు. విచారణ సమయంలో ఆయన విధుల్లో ఉంటే ప్రభావితం చేసే అవకాశం ఉంటుందని.. బాధితులు ఫిర్యాదు చేయడానికి ముందుకొచ్చే అవకాశం ఉండదన్నారు.