కంప్యూటర్ పరీక్ష పాసైతే చాలు సర్వీస్ రెగ్యులరైజ్

కారుణ్య నియామకం కింద టైపిస్ట్, ఎల్‌డీ టైపిస్ట్, యూడీ టైపిస్ట్, టైపిస్ట్‌ కమ్‌ అసిస్టెంట్‌ ఉద్యోగాలు పొందినవారు.. కంప్యూటర్‌ పరీక్ష పాసైతే వారి సర్వీసును రెగ్యులరైజ్‌ చేయాలని ఏపీ ప్రభుత్వం నిర్ణయం తీసుకుంది. కారుణ్య నియామకం ద్వారా ఉద్యోగంలో చేరినవారు ఇక నుంచి తెలుగు, ఇంగ్లిష్‌ టైప్‌ రైటింగ్‌ పరీక్షల్లో ఉత్తీర్ణత సాధించాలనే నిబంధనకు గుడ్ బై చెప్పారు.

ఈ మేరకు సాధారణ పరిపాలన శాఖ కార్యదర్శి పోలా భాస్కర్‌ ఉత్తర్వులు జారీ చేశారు. కారుణ్య నియామకం కింద ఉద్యోగం పొందిన ఉద్యోగులు రెండేళ్లలోపు కంప్యూటర్‌ ప్రొఫిషియెన్సీ టెస్ట్‌లో ఉత్తీర్ణత సాధిస్తే వారి సర్వీసును క్రమబద్ధీకరించనున్నట్లు తెలిపారు. ఈ మేరకు గత నిబంధనలను సడలించారు. అందుకు అనుగుణంగా రాష్ట్ర సచివాలయ విభాగాలు, శాఖాధిపతులు, జిల్లా కలెక్టర్లు తగిన చర్యలు తీసుకోవాలని సూచించారు.

ఎంతోకాలంగా ఇబ్బందిపడుతున్న కారుణ్య నియామక ఉద్యోగుల సమస్యను పరిష్కరించిన ముఖ్యమంత్రి వైఎస్‌ జగన్‌‌కు రాష్ట్ర సచివాలయ ఉద్యోగుల సంఘం అధ్యక్షుడు కె.వెంకటరామిరెడ్డి కృతజ్ఞతలు తెలిపారు. ప్రభుత్వ సర్వీస్ రూల్స్ ప్రకారం కారుణ్య నియామకం కింద టైపిస్ట్/ స్టేనోగ్రాఫర్ ఉద్యోగ పొందిన ఉద్యోగులు తెలుగు/ ఇంగ్లిష్ టైప్ రైటింగ్ టెస్ట్ పాస్ అయితేనే వారి సర్వీసు రెగ్యులర్ చేసేవారన్నారు. టైపింగ్‌కి ప్రాధాన్యత లేకపోవడంతో అది నేర్పే వాళ్లు లేక ఆ పరీక్ష పాస్ కాలేక.. ఇలా చాలా మంది ఉద్యోగులు సంవత్సరాల తరబడి రెగ్యులర్ కాక పీఆర్సీ అమలు కాక చాలా తక్కువ జీతంతో ఇబ్బందులు పడుతున్నారన్నారు.

ఈ పరిస్థితిని గమనించి కారుణ్య నియామకం ద్వారా నియమింపబడిన ఉద్యోగులకు తెలుగు టైప్ రైటింగ్ పరీక్షను మినహాయించాలని ముఖ్యమంత్రిని కోరామన్నారు. తమ విజ్ఞప్తిని మన్నించి ప్రభుత్వం కారుణ్య నియామకం ద్వారా నియమితులైన ఉద్యోగులకు తెలుగు / ఇంగ్లీష్ టైప్ రైటింగ్ పరీక్ష మినహాయిస్తూ ఈరోజు జీవో ఎంఎస్ నెంబర్ 69 ద్వారా ఉత్తర్వులు జారీ చేసింది. ఎంతో కాలంగా ఇబ్బంది పడుతున్న కారుణ్య నియామక ఉద్యోగుల సమస్యను పరిష్కరించినందుకు కృతజ్ఞతలు తెలిపారు.