ట్రెజర్ ద్వీపంలో డ్రైవర్ రహిత బస్సు నడిపిన అమెరికా

రద్దీగా ఉండే రోడ్లపై వెళ్తోన్న బస్సు.. స్టాఫ్ రాగానే ఆగుతుంటే కొందరు దిగుతుంటే.. ఇంకొదరు ఎక్కిన తర్వాత ముందుకు కదుళ్తోంది. అయితే, ఇందులో ఏం విశేషం అనుకోకండి.. ఆ బస్సులో అసలు డ్రైవర్ కాదుకదా.. స్టీరింగ్ కూడా లేదు. కానీ, బస్సు ఎటువంటి ఇబ్బంది లేకుండా తనంతట తానుగానే ప్రయాణిస్తోంది. ఇదేదో ఫిక్షన్‌ సినిమాల్లో దృశ్యం కాదు. అగ్రరాజ్యం అమెరికాలోని శాన్‌ఫ్రాన్సిస్కోలో ఈ కల సాకారమైంది. పైలట్‌ ప్రాజెక్టు కింద డ్రైవర్, స్టీరింగ్ రహిత బస్సును ప్రయోగాత్మకంగా బుధవారం ప్రారంభించారు. రోబోట్యాక్సీలకు కాలిఫోర్నియా ఆమోదం తెలిపిన వారం రోజుల్లోనే శాన్‌ఫ్రాన్సిస్కో ఈ బస్సును నడపడం గమనార్హం.

శుక్రవారం ట్రెజర్‌ అనే ద్వీపం చుట్టూ ఈ వినూత్న బస్సు చక్కర్లు కొట్టింది. ఎటువంటి సమస్య లేకుండా ఈ ఎలక్ట్రిక్ బస్సు 20 నిమిషాల వ్యవధిలో ద్వీపాన్ని చుట్టేసింది. ఇందులో డ్రైవరు ఉండడు కానీ, ఒక అటెండెంట్‌ ఉంటాడు. అత్యవసర పరిస్థితి ఏదైనా తలెత్తితే ఈ అటెండెంట్‌ బస్సును నియంత్రిస్తాడు. ఒకప్పుడు అమెరికా నేవీ స్థావరమైన ఈ దీవిలో 2,000 మంది జనాభా ఉంటారు. బస్సులో అటెండెంట్ ఉండడం వల్ల ప్రతి ఒక్కరూ సురక్షితంగా ఉంటారని శాన్ ఫ్రాన్సిస్కో కౌంటీ ట్రాన్స్‌పోర్టేషన్ అథారిటీ ఎగ్జిక్యూటివ్ డైరెక్టర్ టిల్లీ చాంగ్ అన్నారు. ‘ఎలా ఉంటుంది.. తక్కువ-వాల్యూమ్, తక్కువ వేగంతో కూడిన వాతావరణంలో డ్రైవర్‌లెస్ షటిల్‌ని కలిగి ఉండటం ఎలా పని చేస్తుంది అనేది ట్రయల్ మాత్రమే’ అని చెప్పారు. ప్రజా రవాణాలో సెల్ఫ్ డ్రైవింగ్ వాహనాల భద్రత, సామర్థ్యాన్ని పరీక్షిస్తున్న ప్రపంచవ్యాప్తంగా పెరుగుతున్న నగరాల్లో శాన్ ఫ్రాన్సిస్కో ఒకటి.

ఈ ట్రయల్ రన్‌ను ఫ్లోరిడాకు చెందిన కంపెనీ బీప్ చేపట్టింది. ‘ఈ బస్సు మొదటి, చివరి స్టాప్‌లు చిన్న కనెక్టివిటీ మార్గాల కోసం నిర్మించారు.. అవి బస్ సిస్టమ్ స్థానంలో ఉండేందుకు ఉద్దేశించినవి కావు’ అని బీప్ ప్రాజెక్ట్ మేనేజర్ షెల్లీ కారన్ అన్నారు. ‘సెల్ఫ్ డ్రైవింగ్ వాహనం మనిషి కంటే మెరుగైన పనితీరు కనబరుస్తుంది.. ఇది మరింత విశ్వసనీయమైన సేవను అందిస్తుంది ఎందుకంటే అవి పరధ్యానంగా ఉండవు’ అని అన్నారు. టెస్ట్ రైడ్ సమయంలో నెమ్మదిగా, చాలా జాగ్రత్తగా వాహనం నడిచింది. రోడ్డుకు అడ్డంగా ఓ ట్రక్కు నిలబడిన సమయంలో వాహనాన్ని అటెండెంట్ నడిపాడు. 10 మంది ప్రయాణికులు కూర్చునే వీలున్న ఈ బస్సు ఉదయం 9 నుంచి సాయంత్రం 6 గంటల వరకు నడుస్తుంది. ప్రతి రోజు ప్రతి 20 నిమిషాలకు ఒక సర్వీసు అందుబాటులో ఉంటుంది.