ద్వారకా ఎక్స్‌ప్రెస్ వే: దేశంలో తొలి 8 లేన్ల హైవే

దేశంలోనే మొట్టమొదటి 8 లేన్ల ఎక్స్‌ప్రెస్ వే ఇది. ఢిల్లీలో అత్యంత ప్రతిష్టాత్మకంగా నిర్మిస్తున్న ద్వారకా ఎక్స్‌ప్రెస్ వే వీడియోను కేంద్ర మంత్రి నితిన్ గడ్కరీ షేర్ చేస్తూ.. ఇదొక ఇంజినీరింగ్ అద్భుతం అని పేర్కొన్నారు. ఈ రహదారిపై ప్రయాణ అనుభూతిని ప్రజలు మరో వందేళ్ల పాటు గుర్తుంచుకుంటారని ఆయన అన్నారు. ఢిల్లీ - గురుగ్రామ్ మధ్య ప్రత్యామ్నాయ మార్గంగా దీన్ని నిర్మించారు. ఢిల్లీలోని ద్వారక నుంచి గురుగ్రామ్‌లోని ఖేరీ దౌలా టోల్ ప్లాజా వరకు 27.6 కిలోమీటర్ల పొడవున ఈ ఎక్స్‌ప్రెస్ హైవేను నిర్మించారు. నిర్మాణ పనులు చివరి దశలో ఉన్న ఈ రహదారిని మరో 3 నెలల్లో ప్రారంభించనున్నారు.

ద్వారకా ఎక్స్‌ప్రెస్ వే ప్రత్యేకతలు:

✦ ఈ ఎక్స్‌ప్రెస్ వేను నార్తర్న్ పెరిపెరల్ రోడ్ లేదా ‘NH 248-BB’ అని కూడా పేర్కొంటున్నారు.

✦ ద్వారకా ఎక్స్‌ప్రెస్ వే అందుబాటులోకి వస్తే.. ఢిల్లీలోని ద్వారక నుంచి పంజాబ్‌లోని మానేసర్‌కు కేవలం 15 నిమిషాల్లో చేరుకోవచ్చు.

✦ మానేసర్ నుంచి ఢిల్లీలోని ఇందిరా గాంధీ అంతర్జాతీయ విమానాశ్రయానికి కేవలం 20 నిమిషాల్లో చేరుకోవచ్చు.

✦ మానేసర్ నుంచి సింఘు బోర్డర్‌‌కు కేవలం 45 నిమిషాల్లో చేరుకోవచ్చు.

✦ ద్వారకా ఎక్స్‌ప్రెస్ వేతో ఢిల్లీ, హర్యాణా రాష్ట్రాల వారికి లబ్ధి చేకూరనుంది.

✦ ఈ ఎక్స్‌ప్రెస్ వే మీదుగా రోజూ 55,500 ప్యాసింజర్‌ వాహనాలు ప్రయాణిస్తాయని అధికారులు అంచనా వేస్తున్నారు.

✦ ఈ ఎక్స్‌ప్రెస్ నిర్మాణంలో 2 లక్షల టన్నుల స్టీలును ఉపయోగించారు. ప్యారిస్‌లోని ఈఫిల్ టవర్‌ను నిర్మించడానికి వాడిన స్టీలు కంటే 30 రెట్లు ఎక్కువ స్టీల్‌ను వినియోగించారు.

✦ దుబాయ్‌లోని బుర్జ్ ఖలీఫా నిర్మాణానికి ఉపయోగించిన దానికంటే 6 రెట్లు ఎక్కువ సిమెంట్ - కాంక్రీటుని ఈ ఎక్స్‌ప్రెస్ వే నిర్మాణానికి ఉపయోగించారు.

ద్వారకా ఎక్స్‌ప్రెస్ వే.. ఇంజినీరింగ్ అద్భుతం

✦ ఈ ఎక్స్‌ప్రెస్ వే నిర్మాణ సమయంలో తొలగించిన 1,200 చెట్లను తిరిగి మరో చోట నాటారు.

✦ ఈ ఎక్స్‌ప్రెస్‌వే ఢిల్లీలోని మహిపాల్‌పూర్‌లోని శివ మూర్తి వద్ద NH 48 (పాత NH 8) రహదారి 20వ కి.మీ. మార్క్ వద్ద ప్రారంభం అవుతుంది. ఢిల్లీ సెక్టార్‌ 21లోని ఖేర్కి దౌలా టోల్‌ ప్లాజా వద్ద ముగుస్తుంది.

✦ ఇది 8 లైన్ల ఎక్స్‌ప్రెస్‌ వే. ఇందులో 3.6 కి.మీ పొడవున ఎనిమిది లైన్ల అండర్‌ టన్నెల్‌ రోడ్డును నిర్మించారు.

✦ ఈ ఎక్స్‌ప్రెస్ వేలో 3.6 కి.మీ. పొడవు గల ఎలివేటెడ్‌ ఫ్లైఓవర్‌ ఉంది. అండర్‌పాస్‌ల యాక్సెస్‌ కోసం వేర్వేరు ఇంటర్‌ఛేంజ్‌లను ఏర్పాటు చేశారు.

✦ ఈ ఎక్స్‌ప్రెస్ వే మీదుగా ఒక్కసారి ప్రయాణిస్తే.. ఆ ప్రయాణ అనుభూతిని మీరు 100 ఏళ్ల వరకూ గుర్తుపెట్టుకుంటారని కేంద్ర మంత్రి నితిన్ గడ్కరీ అంటున్నారు.

✦ ఈ ప్రాజెక్టు కిలోమీటర్‌ రహదారికి రూ. 18.20 కోట్ల వ్యయానికి ఆమోదం తెలుపగా.. వాస్తవంగా నిర్మాణానికి కిలోమీటరుకు రూ.250.77 కోట్లు ఖర్చయినట్లు కాగ్‌ తెలిపింది.