మానవజాతికి చారిత్రక ఘట్టం.. చంద్రయాన్-3పై పాక్ మాజీ మంత్రి ఫవాద్ చౌధురి ప్రశంసలు

భారత్ చేపట్టిన చంద్రయాన్-3 ప్రయోగంపై పాకిస్థాన్ మాజీ మంత్రి, ఇమ్రాన్ సహచరుడు ప్రశంసలు కురిపించారు. చంద్రయాన్-3 ల్యాండింగ్‌ ఘట్టాన్ని పాక్ మీడియా కూడా ప్రత్యక్ష ప్రసారం చేయాలని ఆ దేశ సమాచార ప్రసార శాఖ మాజీ మంత్రి ఫవాద్ చౌధురీ కోరారు. భారతీయ శాస్త్రవేత్తలు, అంతరిక్ష నిపుణులకు ఆయన శుభాకాంక్షలు తెలియజేశారు. అంతేకాదు, చంద్రయాన్-3 ల్యాండింగ్‌ను మానవజాతికి చారిత్రాత్మక ఘట్టంగా ఆయన అభివర్ణించారు. ఈ మేరకు పాక్ మాజీ మంత్రి ఎక్స్ (ట్విట్టర్‌)లో ట్వీట్ చేశారు.

‘బుధవారం సాయంత్రం జరగబోయే చంద్రయాన్-3 ల్యాండింగ్ ప్రక్రియను పాకిస్థాన్ మీడియా కూడా ప్రత్యక్ష ప్రసారం చేయాలి.. మానవజాతికి ఇది చారిత్రాత్మక క్షణం.. ప్రత్యేకంగా భారత ప్రజలు, శాస్త్రవేత్తలు, అంతరిక్ష కమ్యూనిటీకి చాలా అభినందనలు’ అని ఫవాద్ మంగళవారం ట్వీట్ చేశారు. మరోవైపు, చంద్రయాన్-3 ల్యాండింగ్ కోసం యావత్తు ప్రపంచం ఆసక్తిగా గమనిస్తోంది. 42 రోజుల పాటు ప్రయాణం సాగించిన చంద్రయాన్-3.. తన లక్ష్యానికి ఒక్క అడుగు దూరంలో ఉంది. ఈ అడుగే అత్యంత కీలకమైంది. గతంలో చంద్రయాన్-2 ఇక్కడే విఫలమైంది.

అయితే, ఈసారి అలా జరగదనే నమ్మకంతో ఉన్నారు ఇస్రో శాస్త్రవేత్తలు. ఎన్ని అవాంతరాలు ఎదురైనా ల్యాండింగ్ పక్కాగా జరిగి తీరుతుందని బలంగా చెబుతున్నారు. చంద్రయాన్-3లోని సెన్సార్లు, ఇంజిన్ థ్రస్టర్లు పనిచేయకపోయినా.. ల్యాండింగ్ మాత్రం ఆగదని స్పష్టం చేస్తున్నారు. ఇదే సమయంలో ప్రయోగం విజయవంతం కావాలని 140 కోట్ల మంది భారతీయులు ప్రార్థిస్తున్నారు. ఇందుకోసం దేశంలోని ప్రజలు ప్రత్యేక పూజలు, హోమాలు, మసీదుల్లో ప్రార్థనలు నిర్వహిస్తున్నారు.

సాయంత్రం 5.45 గంటలకు మొదలయ్యే ల్యాండింగ్ ప్రక్రియ పూర్తికావడానికి 30 నిమిషాలు పడుతుందని ఇస్రో తెలిపింది. సరిగ్గా 6.04 గంటలకు చంద్రుడి ఉపరితలంపై ల్యాండర్ అడుగుపెట్టనుంది. ల్యాండింగ్‌ను ఇస్రో ప్రత్యక్ష ప్రసారం చేస్తోంది. ప్రస్తుతం దక్షిణాఫ్రికాలో జరుగుతున్న బ్రిక్స్ సదస్సుకు వెళ్లిన ప్రధాని నరేంద్ర మోదీ ఆన్‌లైన్‌లో దీనిని వీక్షిస్తారు. పలు రాష్ట్రాలు సైతం ఈ ప్రయోగాన్ని వీక్షించడానికి పాఠశాలలు, విద్యా సంస్థల్లో ఏర్పాట్లు చేస్తున్నాయి. యూపీ ప్రభుత్వం అన్ని ప్రభుత్వ పాఠశాలల్లోనూ లైవ్ టెలికాస్ట్ చేయాలని నిర్ణయించింది.

దక్షిణ ధ్రువంపై సురక్షితంగా దిగడాన్ని సాఫ్ట్‌ ల్యాండింగ్‌ అంటారు. ల్యాండర్‌ తన కృత్రిమ మేధ సాయంతో సొంతంగా దీన్ని నిర్వహించనుంది. ఇందుకోసం ప్రత్యేక సాఫ్ట్‌వేర్‌, నేవిగేషన్‌, గైడెన్స్‌, అల్గోరిథమ్స్‌ను శాస్త్రవేత్తలు ఏర్పాటుచేశారు. అవి వ్యోమనౌకలోని 800 న్యూటన్‌ సామర్థ్యమున్న నాలుగు థ్రాటల్‌బుల్‌ ఇంజిన్లను యుక్తిగా పనిచేయిస్తాయి. వేగంగా దిశలను మార్చుకోవడానికి ఎనిమిది 50 న్యూటన్‌ ఇంజిన్లను సమర్థంగా వినియోగించాలి. చంద్రయాన్‌-2 నాటి అనుభవాల ఆధారంగా ఈ దఫా మెరుగైన అల్గోరిథమ్స్‌, గైడెన్స్‌, ఇంజిన్లు, సెన్సర్లతో ఇస్రో సమాయత్తమైంది.