బిలియన్ డాలర్ల డబ్బు ఎవరివి అని.... అదానీ గ్రూప్ వ్యవహారంపై మరోసారి రాహుల్ విమర్శలు

అదానీ గ్రూప్‌పై తాజాగా వచ్చిన అక్రమాలకు సంబంధించిన రిపోర్టు పత్రికల్లో వార్తలు రాగా.. కేంద్రంలోని నరేంద్ర మోదీ సర్కార్‌పై ప్రతిపక్షాల నుంచి మరోసారి తీవ్ర విమర్శలు వెల్లువెత్తుతున్నాయి. ఈ క్రమంలోనే కాంగ్రెస్ అగ్రనేత రాహుల్ గాంధీ.. అదానీ వ్యవహారంపై మోదీ సర్కార్‌పై తీవ్ర ఆరోపణలు గుప్పించారు. అదానీ గ్రూప్‌ అక్రమాలపై ఓసీసీఆర్‌ ఇచ్చిన రిపోర్టును ప్రస్తావించిన రాహుల్ గాంధీ.. కేంద్ర ప్రభుత్వంపై తీవ్ర విమర్శలు చేశారు. తాజాగా పత్రికల్లో వచ్చిన వార్తలపై స్పందించిన రాహుల్ గాంధీ.. బిలియన్ డాలర్ల డబ్బు ఎవరిదని ప్రశ్నించారు. అదానీ వ్యవహారంపై ప్రధాని నరేంద్ర మోదీ ఎందుకు విచారణ జరిపించడం లేదంటూ ప్రశ్నించారు.

ఇండియా కూటమి సమావేశంలో పాల్గొనేందుకు ముంబై వెళ్లిన రాహుల్ గాంధీ.. ప్రెస్‌మీట్ నిర్వహించారు. ఈ సందర్భంగా అదానీ గ్రూప్‌నకు సంబంధించి పలు కీలక ప్రశ్నలను లేవనెత్తారు. అదానీ గ్రూప్ అక్రమాలపై గురువారం పలు పత్రికల్లో కథనాలు వచ్చాయని.. పేర్కొన్నారు. భారత్‌ నుంచి ఒక బిలియన్‌ డాలర్ల డబ్బు విదేశాలకు తరలివెళ్లి.. వివిధ మార్గాల్లో మళ్లీ తిరిగి భారత్‌కు చేరిందని ఆ కథనాల్లో ఉందని రాహుల్ గాంధీ వెల్లడించారు. విదేశాల నుంచి వచ్చిన పెట్టుబడులతో అదానీ గ్రూప్ షేర్ల ధరలను కృత్రిమంగా భారీగా పెంచారని.. ఆ షేర్ల పెరుగుదలతో వచ్చిన డబ్బుతో అదానీ భారీగా ఆస్తులు కూడబెట్టారని రాహుల్ గాంధీ తెలిపారు. అదానీ పోర్టులు, ఎయిర్‌ పోర్టులు కొనుగోలు చేశారని.. ఆ డబ్బంతా ఎవరిదని ప్రశ్నించారు. ఆ బిలియన్ డాలర్ల సొమ్ము అదానీదేనా లేక ఇంకా ఎవరిదైనా ఉందా అని నిలదీశారు. ఈ మొత్తం అదానీ గ్రూప్ అక్రమాల వెనుక ఉన్న మాస్టర్‌ మైండ్‌ గౌతమ్‌ అదానీ సోదరుడు వినోద్‌ అదానీతోపాటు నాసర్‌ అలీ, ఛాంగ్‌ చుంగ్‌ లింగ్‌ ఉన్నట్లు కథనాలు వచ్చాయని రాహుల్ పేర్కొన్నారు.

ఈ సందర్భంగా గతంలో అదానీ గ్రూప్‌పై వచ్చిన ఆరోపణలపై సెబీ క్లీన్‌ చిట్‌ ఇచ్చిందని గుర్తు చేసిన రాహుల్ గాంధీ.. అదానీకి క్లీన్‌ చిట్‌ ఇచ్చిన వ్యక్తి ఇప్పుడు ఎన్డీటీవీలో డైరెక్టర్‌గా ఉన్నారని తెలిపారు. దీన్ని చూస్తేనే అదానీ గ్రూపులో ఏదో తప్పు జరుగుతోందని అర్థమవుతోందని రాహుల్‌ గాంధీ వెల్లడించారు. ఈ సందర్భంగా అదానీ వ్యవహారంపై అంతర్జాతీయంగా ప్రముఖ ఫైనాన్షియల్‌ న్యూస్ పేపర్స్ ఎన్నో ప్రశ్నలు లేవనెత్తుతున్నాయన్నారు. భారత దేశానిది చాలా పారదర్శక వ్యవస్థ అని ప్రపంచానికి చెబుతున్నామని.. అదే సమయంలో ప్రధాని మోదీకి సన్నిహితుడైన వ్యక్తి తన సంస్థ షేర్ల విలువ పెంచేందుకు బిలియన్‌ డాలర్లు విదేశాల నుంచి పెట్టుబడులు పెట్టించారని అన్నారు. ఇంత పెద్ద కుంభకోణంపై ప్రధాని మోదీ ఎందుకు విచారణ జరిపించడం లేదని రాహుల్‌ ప్రశ్నించారు.

మరికొన్ని రోజుల్లో భారత్ జీ 20 దేశాధినేతల సమావేశాలకు ఆతిథ్యం ఇస్తోందని ఈ క్రమంలో అదానీ గ్రూప్‌ వ్యవహారంపై జీ 20 నేతలు ఏవైనా ప్రశ్నలు అడిగితే ప్రధాని మోదీ ఏం సమాధానం చెబుతారని ప్రశ్నించారు. అదానీ గ్రూప్ ఎందుకు ప్రధాని మోదీకి అంత ప్రత్యేక సంస్థగా మారిందని.. భారత దేశ ఆర్థిక వ్యవస్థపై స్వారీ చేసేందుకు అదానీ గ్రూప్‌కు ఎందుకు అనుమతి ఇస్తున్నారని రాహుల్ గాంధీ నిలదీశారు. ఈ క్రమంలోనే అదానీ గ్రూపు వ్యవహారంపై జాయింట్ పార్లమెంటరీ కమిటీ - జేపీసీ వేసి సమగ్ర విచారణ జరిపించాలని రాహుల్‌ గాంధీ డిమాండ్‌ చేశారు. జేపీసీ విచారణకు కేంద్ర ప్రభుత్వం ఎందుకు అనుమతించడం లేదన్న రాహుల్.. విచారణ కోసం ప్రధాని నరేంద్ర మోదీ ఎందుకు చొరవ తీసుకోవడం లేదన్నారు. ఇంత పెద్ద కుంభకోణానికి పాల్పడిన వాళ్లను ఎందుకు జైళ్లలో పెట్టడం లేదని ప్రశ్నించారు. ఇదే సమయంలో ప్రత్యేక పార్లమెంటు సమావేశాలు నిర్వహిస్తున్నట్లు కేంద్రం తీసుకున్న నిర్ణయంపై కూడా రాహుల్ గాంధీ స్పందించారు. దేశంలో ఇండియా కూటమికి ప్రజల్లో వస్తున్న ఆదరణను చూసి మోదీ సర్కార్ భయపడిందని ఎద్దేవా చేశారు. అందుకే అకస్మాత్తుగా కేంద్రం సమావేశాలు పెట్టిందని సెటైర్లు వేశారు.