ఇస్రో చీఫ్‌ సోమ్‌నాథ్‌కు గిఫ్ట్ ఇచ్చిన బుడ్డోడు

అంతరిక్ష రంగంలో భారత అంతరిక్ష పరిశోధన సంస్థ ఇస్రో.. తక్కువ ఖర్చుతో అప్రతిహత విజయాలతో అగ్రరాజ్యాలను తలదన్నే విధంగా దూసుకు పోతోంది. దీంతో స్వదేశంలోనే కాకుండా విదేశాల్లోనూ ఇస్రో సాధించిన ఘన కీర్తిపై ప్రశంసల వర్షం కురుస్తోంది. ఇక ఈ ప్రయోగాల కోసం ఏళ్లుగా కష్టపడుతున్న ఇస్రో శాస్త్రవేత్తలకు అభినందనలు చెబుతున్నారు. గత నెలలో ప్రయోగించిన చంద్రయాన్ 3 విజయవంతంగా చంద్రుడి దక్షిణ ధ్రువంపై సాఫ్ట్ ల్యాండింగ్ కావడంతో ఇస్రో విజయం విశ్వ వ్యాప్తం అయింది. ఈ నేపథ్యంలోనే శనివారం సూర్యుడిపై ప్రయోగాలు చేసేందుకు ఆదిత్య ఎల్ 1 ప్రయోగాన్ని ఇస్రో సక్సెస్‌ఫుల్‌గా నింగిలోకి పంపించి నిర్దేశిత కక్ష్యలోకి ప్రవేశపెట్టింది.

ఈ క్రమంలోనే ఇస్రో చీఫ్ డాక్టర్ ఎస్ సోమ్‌నాథ్ పేరు దేశ, విదేశాల్లో మారు మోగిపోతోంది. తాజాగా సోమ్‌నాథ్ ఇంటి పక్కనే ఉండే ఓ బాలుడు ఆయనకు ఒక వినూత్న బహుమతిని అందించి ఆశ్చర్యపరిచాడు. చంద్రయాన్ 3 ప్రయోగంలోని అతి ముఖ్యమైన విక్రమ్ ల్యాండర్ లాంటి నిర్మాణాన్ని తయారు చేసి సోమ్‌నాథ్‌కు బహుమతిగా అందించాడు. ఈ విషయాన్ని ఇస్రో సైంటిస్ట్ పీవీ వెంకటకృష్ణన్ ట్విట్టర్ ద్వారా వెల్లడించారు. బాలుడు సోమ్‌నాథ్‌కు ఆ విక్రమ్ ల్యాండర్ మోడల్‌ను అందించిన ఫోటోను కూడా పంచుకున్నారు. ఇస్రో ఛైర్మన్ సోమ్‌నాథ్.. ఇవాళ ఒక ఆశ్చర్యకరమైన అభిమానిని కలుసుకున్నారు. ఆయన ఇంటి పక్కనే ఉండే బాలుడు తన సొంతంగా తయారు చేసిన విక్రమ్ ల్యాండర్ మోడల్‌ను సోమ్‌నాథ్‌కు బహుమతిగా ఇచ్చాడు. చంద్రయాన్ 3 ఘన విజయం సాధించినందుకు గుర్తుగా ఇరుగు పొరుగు ఇళ్లల్లో ఉన్న వారి తరఫున ఇస్రో చీఫ్‌కు ఆ బాలుడు ఈ గిఫ్ట్‌ను అందించాడని తన పోస్టులో ఇస్రో సైంటిస్ట్ పీవీ వెంకటకృష్ణన్ పేర్కొన్నారు.

దీంతో ఈ పోస్ట్ కాస్త వైరల్‌గా మారడంతో నెటిజన్లు స్పందిస్తున్నారు. చంద్రయాన్ 3 సాధించిన విజయంతో దేశంలో భవిష్యత్ తరాలకు ఎంతో ప్రోత్సాహాన్ని ఇస్రో చీఫ్ సోమనాథ్‌ అందించారని ప్రశంసలు కురిపించారు. ఇలాంటి గొప్ప బహుమతిని అందించి సోమ్‌నాథ్‌కు ఘనంగా శుభాకాంక్షలు చెప్పినందుకు ఆ బాలుడ్ని కూడా నెటిజన్లు మెచ్చుకున్నారు. భవిష్యత్‌లో ఎందరో పిల్లలు శాస్త్రవేత్తలుగా ఎదగాలనుకుంటారని పేర్కొన్నారు. ఇటీవల ఇస్రో చీఫ్ సోమనాథ్.. ఇండిగో విమానంలోకి ఎక్కగానే.. అందులో ఉన్న ఫ‍్లైట్‌ అటెండెంట్ ఈ విషయాన్ని విమానంలో ప్రయాణిస్తున్న ప్రయాణికులకు చెప్పడంతో అందులో ఉన్న వారందరూ చప్పట్లతో ఆయనకు అభినందనలు తెలిపారు. ఈ వీడియో వైరల్‌గా మారింది.