సెప్టెంబరు 7న గోకులాష్టమి ఆస్థానం.. ఈ నెల తిరుమలలో జరిగే విశేష సేవలు
Andhra Pradesh Telugu | Suryaa Desk | Published : Mon, Sep 04, 2023, 07:16 PM
కలియుగ వైకుంఠం తిరుమలలో శ్రీవారికి సెప్టెంబరు నెలలో విశేష పర్వదినాలకు సంబంధించి తిరుమల తిరుపతి దేవస్థానం (టీటీడీ) వివరాలను వెల్లడించింది. శ్రీ సాక్షాత్తూ శ్రీమహావిష్ణువు ద్వాపర యుగంలో శ్రీకృష్ణుడిగా అవతరించిన శ్రావణ కృష్ణపక్ష అష్టమి రోజును స్మరించుకుని జన్మాష్టమి వేడుకలను సెప్టెంబరు 7న నిర్వహిస్తారు. ఈ సందర్భంగా శ్రీవారి ఆలయంలో గోకులాష్టమి ఆస్థానం నిర్వహించనున్నారు. శ్రీవారి ఆలయంలోని బంగారు వాకిలి ముఖ మండపంలో రాత్రి 7 గంటల నుంచి 9 గంటల వరకు గోకులాష్టమి ఆస్థానం ఉంటుంది.
ఈ సందర్భంగా స్వర్ణభూపాల వాహనంపై శ్రీకృష్ణస్వామిని వేంచేపు చేసి.. నివేదనలు సమర్పిస్తారు. ఉగ్ర శ్రీనివాసమూర్తికి, అమ్మవార్లకు, శ్రీకృష్ణస్వామికి ఏకాంతంగా తిరుమంజనం నిర్వహిస్తారు. తర్వాత ద్వాదశారాధనం చేపడతారు. అనంతరం సెప్టెంబరు 8న ఉట్లోత్సవాన్ని వైభవంగా నిర్వహిస్తారు. ఆ రోజు సాయంత్రం నాలుగు గంటలకు ఈ ఉత్సవాన్ని తిలకించడానికి మలయప్పస్వామి బంగారు తిరుచ్చిపై, శ్రీకృష్ణస్వామి మరో తిరుచ్చిపై తిరుమాడ వీధుల్లో విహరిస్తారు.
సెప్టెంబరు 17న బలరామ జయంతి, వరాహ జయంతి, శ్రీవారి సాలకట్ల బ్రహ్మోత్సవాలకు అంకురార్పణం.. సెప్టెంబరు 18న వినాయకచవితి, ధ్వజారోహణంతో శ్రీవారి బ్రహ్మోత్సవాలు ప్రారంభమవుతాయి. సెప్టెంబరు 22న శ్రీవారికి గరుడసేవ, 23న స్వర్ణరథోత్సవం, 25 రథోత్సవం, 26న శ్రీవారి చక్రస్నానం, ధ్వజావరోహణంతో బ్రహ్మోత్సవాలు పరిసమాప్తమవుతాయి. సెప్టెంబరు 27న బాగ్ సవారీ, 28న అనంత పద్మనాభ వ్రతం జరగనుంది.
|
|