ఉత్తరాంధ్రలో వానలే, వానలు,,,మన్యం జిల్లాలో కుండపోత

ఏపీలో వర్షాలు కొనసాగుతున్నాయి. వాయవ్య బంగాళాఖాతంలో పశ్చిమ బంగాళాఖాతానికి ఆనుకుని ఉత్తరాంధ్రపై ఏర్పడిన అల్పపీడనం బలహీనపడగా.. మరో ఉపరితల ఆవర్తనం, రుతుపవనాల ప్రభావంతో రాష్ట్రంలోని పలు ప్రాంతాల్లో వర్షాలు పడుతున్నాయి. రెండు రోజులు ఉత్తర కోస్తాంధ్ర, దక్షిణ కోస్తాంధ్రల్లో కొన్నిచోట్ల, రాయలసీమలో అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉందని అంచనా వేస్తోంది వాతావరణశాఖ.

ఇవాళ పార్వతీపురం మన్యం, కాకినాడ, తూర్పుగోదావరి, కోనసీమ, ఏలూరు జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ తెలిపింది. శ్రీకాకుళం,విజయనగరం, విశాఖ,అనకాపల్లి,అల్లూరి , పశ్చిమగోదావరి, కృష్ణా, ఎన్టీఆర్, చిత్తూరు జిల్లాల్లో అక్కడక్కడ తేలికపాటి వర్షాలు కురిసే అవకాశం ఉందని భావిస్తున్నారు. అల్లూరి సీతారామరాజు జిల్లా, అనకాపల్లి జిల్లా, కాకినాడ జిల్లా, పార్వతీపురం మన్యం జిల్లా, విశాఖపట్నం జిల్లా, విజయనగరం జిల్లాల్లో అక్కడక్కడా భారీ వర్షాలకు అవకాశం ఉందంటున్నారు.

మరోవైపు పార్వతీపురం మన్యం జిల్లా బాలాజీపేటలో 132.4 మిల్లీ మీటర్లు, శ్రీకాకుళం జిల్లా పలాసలో 114.4, పార్వతీపురం మన్యం జిల్లా కొమరాడలో 105.8, అల్లూరి సీతారామరాజు జిల్లా 97.4, పార్వతీపురం మన్యం జిల్లా 84.2, విజయనగరం జిల్లా తెర్లాంలో 76.4, చీపురుపల్లిలో 76.2, అల్లూరి సీతారామరాజు జిల్లా వరరామచంద్రపురంలో71.4, శ్రీకాకుళం జిల్లా పాతపట్నంలో 67.4, అల్లూరి సీతారామరాజు జిల్లా చింతూరులో 64.6, విజయనగరం జిల్లా గపతినగరంలో 63.6, పార్వతీపురం మన్యం జిల్లా పాలకొండలో 63.6, పార్వతీపురం మన్యం జిల్లా జియ్యమ్మవలసలో 59.8, పశ్చిమగోదావరి జిల్లా భీమవరంలో 56.4, శ్రీకాకుళం జిల్లా మందసలో 56.2, అనకాపల్లి జిల్లా చోడవరంలో 54.6, పార్వతీపురం మన్యం జిల్లా వీరఘట్టంలో 53.2, విజయనగరం జిల్లా బొందపల్లెలో 52, విశాఖపట్నంలో 51.4 సెంటీ మీటర్ల వర్షపాతం నమోదైంది.

విశాఖను వర్షం ముంచెత్తింది. నగరంలో గురువారం తెల్లవారుజాము నుంచి ముసురు వాతావరణం కనిపించింది. బంగాళాఖాతం నుంచి వచ్చిన తేమగాలుల ప్రభావంతో పలుచోట్ల తేలికపాటి నుంచి ఒక మోస్తరు వర్షం కురిసింది. వర్షానికి పాత నగరంలో లోతట్టు ప్రాంతాలైన ప్రసాద్‌ గార్డెన్స్‌, పూర్ణా మార్కెట్‌, కల్లుపాకలు, మునిసిపల్‌ స్టేడియం పరిసరాల్లో మురుగు కాల్వలు పొంగి ఇళ్లలోకి నీరు ప్రవేశించింది. ఉదయం పాఠశాలలు, కళాశాలలకు వెళ్లే విద్యార్థులు, కార్యాలయాలకు వెళ్లే ఉద్యోగులు వర్షంతో కాస్త ఇబ్బందిపడ్డారు. కొద్దిరోజులగా ఎండ తీవ్రతతో వేడెక్కిన నగరంలో గురువారం కురిసిన వర్షంతో వాతావరణం చల్లబడింది. అలాగే ఉత్తరాంధ్రలోని మిగిలిన జిల్లాల్లో కూడా వానలు పడ్డాయి.