జీవిత భాగస్వామి శృంగారానికి నిరాకరించడం క్రూరత్వమే: ఢిల్లీ హైకోర్టు

భార్యాభర్తల మధ్య వివాహ బంధం గురించి ఢిల్లీ హైకోర్టు కీలక వ్యాఖ్యలు చేసింది. ఇద్దరు జీవిత భాగస్వాముల మధ్య శృంగారం అవసరమని.. దాన్ని నిరాకరించడం క్రూరత్వమే అవుతుందని పేర్కొంది. ఉద్దేశపూర్వకంగా శృంగారానికి నిరాకరించడం క్రూరత్వమేనని స్పష్టం చేసింది. ఈ నిర్ణయం మీదే తాజాగా ఓ జంటకు విడాకులు మంజూరు చేసింది. ఈ విడాకులకు సంబంధించిన కేసు విచారణ సందర్భంగా ఢిల్లీ హైకోర్టు ఈ వ్యాఖ్యలు చేసింది. పెళ్లైన తర్వాత కేవలం 35 రోజుల పాటు కలిసి ఉన్న ఓ జంట విడాకులు కోరుతూ పిటిషన్ దాఖలు చేయగా.. కోర్టు విచారణ జరిపింది.

ఈ జంటకు 2004 లో వివాహం కాగా.. నెల రోజులకే భార్య పుట్టింటికి వెళ్లిపోయింది. ఆ తర్వాత ఆమె తిరిగి ఇంటికి రాలేదు. అయితే భార్యను ఇంటికి తెచ్చుకోవాలని భర్త చేసిన ప్రయత్నాలు ఏవీ ఫలించలేదు. ఈ నేపథ్యంలోనే విసిగిపోయిన ఆ భర్త.. చివరికి విడాకులు తీసుకోవాలని నిర్ణయించుకున్నాడు. దీంతో ఆ వ్యక్తి తనకు విడాకులు కావాలని ఫ్యామిలీ కోర్టును ఆశ్రయించాడు. కేసు పూర్వాపరాలను పరిశీలించిన ఫ్యామిలీ కోర్టు విడాకులు మంజూరు చేస్తూ ఉత్తర్వులు జారీ చేసింది. దీంతో ఆ విడాకులను సవాల్ చేస్తూ ఆ వ్యక్తి భార్య ఢిల్లీ హైకోర్టును ఆశ్రయించింది. భార్య వేసిన పిటిషన్‌ను స్వీకరించి విచారణ జరిపిన ఢిల్లీ హైకోర్టు.. చివరికి ఫ్యామిలీ కోర్టు ఇచ్చిన విడాకుల తీర్పును సమర్థిస్తూ తీర్పు వెలువరించింది. ఈ సందర్భంగానే కీలక వ్యాఖ్యలు చేసింది.

విడాకుల తీర్పును సమర్థించిన ఢిల్లీ హైకోర్టు.. శృంగారం లేని వివాహ బంధం శాపం లాంటిదని వ్యాఖ్యానించింది. శారీరక బంధంలో నిరాశకు మించిన బాధ వైవాహిక జీవితంల ఇంకోటి ఉండదని పేర్కొంది. ఈ కేసులో శృంగారానికి భార్య నిరాకరించడంతో వారి వివాహ బంధం సంపూర్ణం కాలేదని కోర్టు గుర్తించింది. దీనికి అదనంగా ఆధారాలు ఏమీ లేకుండా ఆమె భర్తపైనే ఎదురు వరకట్న వేధింపుల కేసు పెట్టిందని తెలిపింది. ఈ సందర్భంగా తీవ్ర అసహనం వ్యక్తం చేసిన ఢిల్లీ హైకోర్టు.. ఎలాంటి కారణం లేకుండా ఉద్దేశపూర్వకంగా జీవిత భాగస్వామి శృంగారానికి నిరాకరించడం క్రూరత్వమే అవుతుందని.. ముఖ్యంగా కొత్తగా పెళ్లయిన దంపతుల మధ్య ఇది దారుణ పరిస్థితేనని స్పష్టం చేసింది. ఇందుకే ఈ ఒక్క కారణంతో విడాకులు మంజూరు చేయొచ్చంటూ ఫ్యామిలీ కోర్టు ఇచ్చిన విడాకుల తీర్పును ఢిల్లీ హైకోర్టు సమర్థించింది. దీంతో వారిద్దరి మధ్య విడాకులు మంజూరు అయ్యాయి.