రూపాయి చెల్లించకుండా చదువుకుంటున్న విద్యార్థులు,,,ప్రత్యేక లక్ష్యంతో పాఠశాలను ప్రారంభించిన యాజమాన్యం

సాధారణంగా ప్రైవేటు స్కూల్ అనగానే ఏం గుర్తుకు వస్తుంది. ఏముంది స్కూల్ ఫీజు అంటారా. అయితే ఈ పాఠశాలలో మాత్రం అసలు ఒక్క రూపాయి కూడా ఫీజుగా తీసుకోరు. అసలు డబ్బుల మాటే అక్కడ వినిపించదు. మరి డబ్బులు తీసుకోకుండా ఓ ప్రైవేటు పాఠశాలను ఎలా నడిపిస్తున్నారు అని అనుకుంటున్నారా. అయితే ఇదేదో విరాళాలు, ఛారిటీల ద్వారా వచ్చే సొమ్ముతో నడిపిస్తున్నారా అంటే పొరపాటే. ఎందుకంటే దాన్ని నడిపిస్తుంది ఇద్దరు వ్యక్తులే. అసలు ఇలాంటి స్కూల్‌ను ఎందుకు ప్రారంభించారు అని అనుకుంటున్నారా. దాని వెనక పెద్ద లక్ష్యమే ఉందని చెబుతున్నారు దాని వ్యవస్థాపకులు.

ఈ వినూత్నమైన ప్రైవేటు స్కూల్ అసోం రాష్ట్రంలో ఉంది. ఇక్కడ వారానికి 25 ప్లాస్టిక్ బాటిల్స్ తీసుకువచ్చిన విద్యార్థుల నుంచి ఒక్క రూపాయి కూడా తీసుకోకుండా పాఠాలు చెప్తారు. పర్మితా శర్మ, మాజిన్ ముక్తర్ కలిసి అస్సాం రాజధాని దిస్పూర్‌లో ఈ పాఠశాలను ఏర్పాటు చేశారు. 2016 జూన్‌లో ది అక్షర్ స్కూల్‌ను ప్రారంభించారు. అయితే వీరు పాఠశాల ప్రారంభించడానికి పెద్ద కారణమే ఉందని పేర్కొన్నారు. ఆ ప్రాంతంలో ఉన్న రెండు ప్రధాన సమస్యలను గుర్తించారు. ఒకటి ప్లాస్టిక్ వేస్టేజ్ కాగా.. మరొకటి నిరక్షరాస్యత. ఈ రెండు సమస్యలను తీర్చాలంటే ఒక స్కూల్‌ను ప్రారంభించాలని నిర్ణయించుకున్నారు.

ఈ క్రమంలోనే ఆ ప్రాంతంలో స్కూల్ ప్రారంభించి అక్కడ ఉన్న చిన్నారులను వచ్చేలా ఏర్పాట్లు చేశారు. అందులో చదువుకోవాలనుకునే వారు వారానికి 25 ప్లాస్టిక్ బాటిళ్లు తీసుకురావాలనే నిబంధన పెట్టారు. దీంతో అక్కడ ఉన్న ప్రజలు ప్లాస్టిక్ బాటిళ్లను పడేయకుండా పిల్లలకు ఇచ్చి స్కూల్‌కు పంపించడం ప్రారంభించారు. దీంతో కొద్ది రోజుల్లోనే అక్కడ ప్లాస్టిక్ వేస్టేజ్ సమస్య చాలా వరకు తీరినట్లు స్థానికులు వెల్లడించారు. అయితే పిల్లలు తీసుకువచ్చిన ప్లాస్టిక్ బాటిళ్లను పర్మితా శర్మ, మాజిన్ ముక్తర్ రీసైక్లింగ్ చేయడం ప్రారంభించారు. వాటి నుంచి రోడ్లు, ఇటుకలు, టాయిలెట్ల తయారీలో ఉపయోగిస్తున్నారు.

ఇక ఈ పాఠశాలలో చదివిన, చదువుతున్న పెద్ద తరగతి విద్యార్థులు.. వారి కన్నా చిన్న తరగతుల విద్యార్థులకు చదువు చెబుతున్నారు. ఈ నిర్ణయంతో వారు చదువుకోవడమే కాకుండా ఆదాయన్ని కూడా ఆర్జించవచ్చని ది అక్షర్ స్కూల్ యాజమాన్యం పేర్కొంటోంది. ఇక్కడి విద్యార్థులకు సమాజంలో ఎలా మెదులుకోవాలి, వారికి విలువలు, ప్లాస్టిక్ రీసైక్లింగ్, కార్పెంటరీ పనులు, గార్డెనింగ్ వంటి పనులను నేర్పిస్తున్నారు. దీంతో ఇక్కడి స్కూల్‌లో విద్యార్థుల్లో స్కూల్ డ్రాపౌట్స్ తగ్గినట్లు స్థానికులు చెబుతున్నారు.