ప్రియురాలి ఇంటికి వెళ్లాక,,,కొలంబియాలో తెలుగు విద్యార్థి అనుమానాస్పద మృతి.

ఎన్టీఆర్‌ జిల్లా జి.కొండూరుకు చెందిన బేతపూడి సుధీర్ కుమార్‌ అలియాస్‌ జోషి టెలీ కమ్యూనికేషన్‌లో ఎంఎస్‌ చేసేందుకు స్పెయిన్‌ వెళ్లాడు. అక్కడ యూనివర్సిటీ ఆఫ్‌ లే డే జైన్‌లో ఎంఎస్‌లో చేరాడు. అక్కడే పార్ట్‌టైమ్‌ ఉద్యోగం చేస్తున్నాడు. ఈ క్రమంలో అతడికి తనతోపాటు అదే యూనివర్సిటీలో చదువుతున్న కొలంబియాకు చెందిన జెస్సికాతో పరిచయం ఏర్పడింది. ఈ నెల 15న తన స్నేహితురాలి జన్మదిన వేడుకల కోసం సుధీర్ స్పెయిన్‌ నుంచి కొలంబియా రాజధాని బోగోటో వెళ్లాడు. అక్కడి నుంచి రియో బ్లాంకోలోని స్నేహితురాలి ఇంటికి వెళ్లాడు. అక్కడ బర్త్ డే వేడుకల తర్వాత ఏమైందో ఏమో ఈ నెల 19న తెల్లవారుజామున కొలంబియాలోని జెస్సీకా నుంచి జి.కొండూరులోని సుధీర్‌కుమార్‌ తల్లిదండ్రులు బేతపూడి కేథరీన్, దేవదాసుకు ఓ సమాచారం వచ్చింది. తన ఇంట్లోనే సుధీర్‌కుమార్‌ ఉరి వేసుకొని ఆత్మహత్య చేసుకున్నాడని జెస్సీకా చెప్పింది.

తమ కుమారుడి మరణవార్తను జెస్సీకా తమతో చెప్పినట్లు కేథరీన్, దేవదాసు వెల్లడించారు. స్నేహితురాలి బర్త్ డే వేడుకకు సంబంధించిన వీడియోలు, ఫొటోలను కూడా సుధీర్ ఫ్యామిలీతో వాట్సాప్‌లో పంచుకుంది జెస్సికా. బర్త్ డే వేడుకల్లో తాగిన డ్రింక్‌ వల్ల మత్తుగా ఉందని.. తర్వాత మాట్లాడతానని తమతో చివరిగా ఫోన్‌లో మాట్లాడినట్లు సుధీర్ కుటుంబ సభ్యులు చెబుతున్నారు. తమ కుమారుడిని బర్త్ డే సెలబ్రేషన్స్‌ పేరుతో రప్పించి కావాలని హత్య చేసి ఉంటారని అనుమానం వ్యక్తం చేశారు. ఇప్పటికే తాము ఆర్థికంగా ఇబ్బంది పడుతున్నామని.. కేంద్ర, రాష్ట్ర ప్రభుత్వాలు చొరవ తీసుకొని తమ కుమారుడి భౌతికకాయం తమకు అప్పగించేలా చూడాలని కుటుంబ సభ్యులు కోరారు.

గత కొంతకాలంగా సుధీర్‌, జెస్సికా లివింగ్ రిలేషన్ షిప్‌లో ఉన్నారనే ప్రచారం జరుగుతోంది. వారిద్దరి మధ్య ఏమైనా గొడవలు ఉన్నాయా అనే అనుమానాలు మొదలయ్యాయి. సుధీర్ ఆత్మహత్య చేసుకుని చనిపోయాడని జెస్సికా ఫోన్ చేసి చెప్పిందని అతడి సోదరి జ్యోత్స్న అంటున్నారు. చనిపోయే ముందు ఇండియాలో తన సోదరుడితో సుధీర్ మాట్లాడుతున్న వీడియో జ్యోత్స్నకు జెస్సికా పంపిందట. ఆ తర్వాతే సుధీర్‌ చనిపోయినట్లు తెలుస్తోంది. అయితే అతడి మరణంపై అనుమానాలు వ్యక్తమవుతున్నాయి. కుమారుడి మరణంతో తల్లిదండ్రులు తీవ్ర విషాదంలో ఉన్నారు. సుధీర్ మరణానికి సంబంధించిన పూర్తి వివరాలు తెలియాల్సి ఉంది. అతడు ఆత్యహత్య చేసుకున్నాడని జెస్సికా చెబుతుండగా.. కుటుంబ సభ్యులు మాత్రం అనుమానాలు వ్యక్తం చేస్తున్నారు.