గణేష్ నిమజ్జనంలో డ్యాన్సర్ డ్రెస్ లాగి అసభ్య ప్రవర్తన.. యువతి వీడియో కాల్, వెంటనే వచ్చిన దిశా పోలీసులు

గణేష్ నిమజ్జనంలో డాన్స్ చేసేందుకు వచ్చిన మహిళా డాన్సర్లతో కొంత మంది పోకిరీలు అనుచితంగా ప్రవర్తించారు. అర్ధరాత్రి సమయంలో యువతి దుస్తులు లాగి అసభ్యంగా ప్రవర్తించారు. పబ్లిక్ ప్లేస్‌లో తీవ్ర ఇబ్బందులకు గురైన బాధిత యువతి వెంటనే దిశ పోలీసులకు కాల్ చేసి, సహాయం కోరింది. వెంటనే స్పందించిన పోలీసులు కేవలం 8 నిముషాల వ్యవధిలో సంఘటనా స్థలానికి చేరుకున్నారు. యువతికి రక్షణ కల్పించారు. అసభ్యంగా ప్రవర్తించిన యువకులను అదుపులోకి తీసుకొని పోలీస్ స్టేషన్‌కు తరలించారు. రికార్డింగ్ డ్యాన్స్ బృందం సభ్యులను సురక్షితంగా వారి ఇంటి దగ్గర డ్రాప్ చేశారు. కృష్ణా జిల్లా బందరు (మచిలీపట్నం) తాలుకా పోలీస్ స్టేషన్ పరిధిలో మంగళవారం (సెప్టెంబర్ 26) అర్ధరాత్రి ఈ ఘటన చోటు చేసుకుంది.

ఏపీలోని పలు ప్రాంతాల్లో వినాయక నవరాత్రి మండపాల వద్ద, నిమజ్జనాల సందర్భంగా రికార్డింగ్ డ్యాన్సులు ఏర్పాటు చేస్తున్నారు. బందరులో జరిగిన వినాయక నిమజ్జనం కార్యక్రమంలో డ్యాన్స్ చేయడానికి విజయవాడకు చెందిన ఐదు మందితో కూడిన బృందం వచ్చింది. ఈ డాన్స్ గ్రూప్‌లో ఇద్దరు అబ్బాయిలు, ముగ్గురు అమ్మాయిలు ఉన్నారు. మంగళవారం అర్ధరాత్రి సమయంలో వీరు డ్యాన్స్ చేస్తున్న సమయంలో బృందంలోని ఓ యువతితో కొంత మంది యువకులు అసభ్యంగా ప్రవర్తించారు. యువతి డ్రెస్ లాగి ఇబ్బందులకు గురిచేశారు. డ్యాన్స్ గ్రూప్‌లోని ఇతర సభ్యులు అడ్డుకునేందుకు ప్రయత్నించగా.. పోకిరీలు రెచ్చిపోయారు. వారిని బూతులు తిడుతూ దాడికి దిగారు. దీంతో బాధిత యువతి దిశా యాప్ ద్వారా పోలీసులకు‌ వీడియో కాల్ చేసి ఫిర్యాదు చేసింది. పోలీసులు క్షణాల్లో అక్కడికి వచ్చారు. యువతి పట్ల అసభ్యంగా ప్రవర్తించిన యువకులను అదుపులోకి తీసుకున్నారు. బాధిత యువతికి ధైర్యం చెప్పి భరోసాను కల్పించారు.

గ్రామ పెద్దలు జ్యోక్యం చేసుకొని పోకిరి యువకులను మందలించారు. ఇరువర్గాలకూ నచ్చజెప్పారు. అసభ్యంగా ప్రవర్తించిన యువకులకు పోలీసులు కౌన్సిలింగ్ ఇచ్చి పంపించారు. అనంతరం డాన్స్ గ్రూప్ సభ్యులకు ప్రత్యేక వాహనాన్ని ఏర్పాటు చేసి విజయవాడకు క్షేమంగా పంపించారు. తాము సురక్షితంగా ఇంటికి చేరేంత వరకూ దిశా మహిళా సిబ్బంది ఫోన్‌లో టచ్‌లో ఉన్నారని బాధిత యువతి తెలిపారు. ఆపదలో ఉన్నామని కాల్ చేసిన నిముషాల వ్యవధిలోనే తమను రక్షించిన దిశా పోలీసులకు ఆమె కృతజ్ఞతలు తెలిపారు.