దక్షిణార్ధగోళంలో బయటపడిన ఎనిమిదో ఖండం,,,మడగాస్కర్ కంటే ఆరు రెట్టు ఎక్కువ విస్తీర్ణం

ప్రపంచంలో ఏడు ఖండాలు మాత్రమే ఉన్నాయని ఎన్‌సైక్లోపీడియాలు, మ్యాప్‌లు, సెర్చ్ ఇంజన్లు చెప్పినప్పటికీ.. అది తప్పని శాస్త్రవేత్తలు నిరూపించారు. ప్రపంచంలోని ఎనిమిదో ఖండం సముద్రంలో మునిగిపోయినా... దానిని కనుగొనడానికి శాస్త్రవేత్తలకు 375 ఏళ్లు పట్టింది. భూవిజ్ఞాన, భూకంప శాస్త్రవేత్తల బృందం జిలాండియా లేదా టె రియు-ఎ-మౌయి కొత్తగా మ్యాప్‌ను రూపొందించినట్టు ఫిజిక్స్ డాట్ ఆర్గ్ తెలిపింది. సముద్రపు అడుగు భాగంలో డ్రిల్లింగ్ చేసి సేకరించిన రాతి నమూనాల సాయంతో పరిశోధకులు దీనిని కనుగొన్నారు. ఈ వివరాలను టెక్టోనిక్స్ జర్నల్‌లో ప్రచురించారు.

అంతర్జాతీయ మీడియా నివేదిక ప్రకారం.. జిలాండియా 1.89 మిలియన్ చదరపు మైళ్ల (4.9 మిలియన్ చదరపు కి.మీ) విస్తీర్ణంలో ఉన్న విశాలమైన ఖండం. ఇది మడగాస్కర్ కంటే ఆరు రెట్లు ఎక్కువ. వాస్తవానికి 8 ఖండాలు ఉన్నాయని శాస్త్రవేత్తల బృందం తెలియజేసింది. ఖండాల జాబితాలో చేరిన జిలాండియా ప్రపంచంలోనే అతి చిన్నది, సన్నటి, అతి పిన్న వయసున్న ఖండంగా అన్ని రికార్డులను బద్దలు కొట్టింది. అసలు విషయం ఏమిటంటే.. ఈ ఖండంలోని 94 శాతం సముద్ర జలాల్లో దాగి ఉంది. న్యూజీలాండ్ వంటి కొన్ని ద్వీపాలు నీటిపైకి చొచ్చుకువచ్చాయి.

‘చాలా స్పష్టమైనది వెలికి తీయడానికి కొంత సమయం పడుతుందనడానికి ఇది ఒక ఉదాహరణ’ అని జిలాండియాను కనుగొన్న బృందంలోని న్యూజిలాండ్ క్రౌన్ రిసెర్చ్ ఇన్స్టిట్యూట్ జీఎన్ఎస్ సైన్స్‌ జియాలజిస్ట్ ఆండీ తుల్లోచ్ చెప్పారు. జిలాండియా అధ్యయనం ఎల్లప్పుడూ కష్టతరమని శాస్త్రవేత్తలు అంటున్నారు. సముద్రపు అడుగుభాగం నుంచి సేకరించిన రాళ్లు, అవక్షేప నమూనాలను శాస్త్రవేత్తలు సేకరించి అధ్యయనం చేస్తున్నారు. వీటిలో ఎక్కువ భాగం డ్రిల్లింగ్ సైట్‌ల నుంచి తీసుకోగా.. మిగతావి ఈ ప్రాంతంలోని దీవుల తీరాలలో సేకరించారు.

Phys.org నివేదించిన ప్రకారం.. జిలాండియా శిలల నమూనాలు పశ్చిమ అంటార్కిటికాలో భౌగోళిక నమూనాలను పోలి ఉంది. ఇది న్యూజిలాండ్ పశ్చిమ తీరంలో క్యాంప్‌బెల్ పీఠభూమికి సమీపంలోని అనుబంధ ప్రాంతాన్ని సూచించింది. పరిశోధకులు ఆ ప్రాంతంలో అయస్కాంత క్షేత్రాలను గుర్తించలేదు. అయినప్పటికీ, క్యాంప్‌బెల్ ఫౌల్డ్ చుట్టూ ఉన్న సిద్ధాంతాలకు వ్యతిరేకంగా ఇది నిరూపించింది. కొత్తగా రూపొందించిన మ్యాప్ జిలాండియా ఖండంలోని అగ్నిపర్వత అక్షం స్థానాన్ని మాత్రమే కాకుండా ఇతర ప్రధాన భౌగోళిక లక్షణాలను కూడా చూపుతుంది. జిలాండియా వాస్తవానికి పురాతన సూపర్ ఖండమైన గోండ్వానాలో భాగం. ఇది సుమారు 550 మిలియన్ సంవత్సరాల కిందట ఏర్పడింది. ముఖ్యంగా దక్షిణ అర్ధగోళంలోని మొత్తం భూమిని కలిపి ఉంది.