ఆర్టిఫిషియల్ ఇంటెలిజెన్స్‌తో నగ్న ఫోటోలు.... 11 నుంచి 17 ఏళ్ల బాలికల ఫోటోలు వైరల్

టెక్నాలజీ రెండు వైపులా పదును ఉన్న కత్తి లాంటిది అని చెబుతూ ఉంటారు. మంచికి ఎంత ఉపయోగపడుతుందో అదే స్థాయిలో చెడుకు కూడా ఉపయోగపడుతుంది అనడానికి నిదర్శనమే ఈ ఘటన. ఆర్టిఫిషియల్ ఇంటెలిజెన్స్. ఇప్పుడు ఇది టెక్నాలజీ రంగంలో సరికొత్త సంచలనంగా మారింది. ఈ నేపథ్యంలో ఆర్టిఫిషియల్ ఇంటెలిజెన్స్‌ సాయంతో ఇప్పటివరకు సమాధానాలు దొరకని ఎన్నో ప్రశ్నలకు పరిష్కారం దొరికింది. అయితే అదే సమయంలో ఈ టెక్నాలజీతో అంతకుమించిన నష్టాలు, దుష్ప్రభావాలు ఉంటాయని టెక్ నిపుణులు ముందు నుంచీ హెచ్చరికలు చేస్తూనే ఉన్నారు. తాజాగా జరిగిన ఓ ఘటన అందుకు అద్దం పడుతోంది.

ఆర్టిఫిషియల్ ఇంటెలిజెన్స్ సాయంతో బాలికల ఫోటోలను మార్ఫింగ్ చేసి.. వారికి బట్టలు లేకుండా నగ్నంగా ఉన్న ఫోటోలను సోషల్ మీడియాలో అప్‌లోడ్ చేస్తున్నారు. అయితే ఈ ఫోటోలను చూసి బాధితులు, వారి కుటుంబ సభ్యులు తీవ్ర ఆందోళన చెందుతున్నారు. అయితే బాధితుల వయసు 11 నుంచి 17 ఏళ్లు కావడం గమనార్హం. ఇక ఈ మార్ఫింగ్‌కు పాల్పడిన నిందితుల వయసు 12 నుంచి 14 ఏళ్ల మధ్య ఉంటుందని పోలీసులు భావిస్తున్నారు. ఈ భయంకరమైన సంఘటన స్పెయిన్‌లోని చిన్న పట్టణమైన అల్మెండ్రలోజోలో జరిగింది. ఈ అల్మెండ్రలోజో జనాభా దాదాపు 30 వేలు. అయితే ఈ పట్టణంలోని దాదాపు 20 మంది బాలికలకు సంబంధించిన ఫోటోలను మార్ఫింగ్ చేసి సోషల్ మీడియాలో వైరల్ చేసినట్లు గుర్తించారు.

ప్రస్తుతం ఈ సంఘటన బాధితులు వారి కుటుంబాలనే కాకుండా ఆ పట్టణంలోని ప్రజలందరినీ తీవ్ర ఆందోళనకు గురి చేస్తోంది. తమ కుమార్తెలు, కుమారుల పరిస్థితి ఏంటి అని వారిలో తీవ్ర ఆవేదన నెలకొంది. ఆడపిల్లలు ఉన్న తల్లిదండ్రులేమో ఎక్కడ తమ కుమార్తెల నగ్న ఫోటోలు బయటికి వస్తాయోనని భయపడుతూ ఉంటే.. మగపిల్లల తల్లిదండ్రులు మాత్రం ఆ ఏఐ మార్ఫింగ్ వెనకాల తమ కుమారుడు ఉన్నాడేమో అనే టెన్షన్ వారిలో మొదలైంది. ఈ క్రమంలోనే అల్మెండ్రలోజో పట్టణంలోని దాదాపు 28 మంది బాలికల తల్లిదండ్రులు కలిసి ఒక గ్రూప్‌గా ఏర్పడి ఈ ఘటనపై పోలీసులకు ఫిర్యాదు చేశారు.

ఈ ఏఐ డీప్ ఫేక్ ఆధారంగా బాలికల ఫోటోలను నగ్నంగా మార్చారని అనుమానిస్తున్న 11 మంది యువకులను స్పెయిన్ పోలీసులు అదుపులోకి తీసుకుని ప్రశ్నిస్తున్నారు. వాటిని వాట్సాప్, టెలిగ్రామ్ వంటి సోషల్ మీడియా సైట్లలో షేర్ చేస్తున్నట్లు గుర్తించారు. అయితే ఈ ఫోటోలన్నీ బాధిత బాలికలు సోషల్ మీడియాలలో ఉంచిన ఫోటోలే అని పేర్కొంటున్నారు. తమ నగ్న ఫోటోలు సోషల్ మీడియాలో వైరల్‌గా మారుతుండటంతో కొందరు బాధిత బాలికలు ఇంటి నుంచి బయటికి వచ్చేందుకు భయపడుతున్నారని స్థానికులు చెబుతున్నారు. అయితే ఇప్పటివరకు కొంతమంది బాలికల నగ్న ఫోటోలు మాత్రమే బయటికి వచ్చాయని.. ఇంకా ఎంత మంది ఫోటోలు ఉన్నాయన్నది తెలియలేదని పోలీసులు చెబుతున్నారు. అయితే వాటిని పోర్న్ సైట్లలో అప్‌లోడ్ చేశారా అనేది కూడా ఇంకా తెలియలేదని పేర్కొన్నారు. ఇలాంటి ఘటనలపై పిల్లల తల్లిదండ్రులు అప్రమత్తంగా ఉండాలని పోలీసులు హెచ్చరికలు జారీ చేస్తున్నారు. బాలికలైనా, బాలురైనా ఫోన్లలో ఏం చేస్తున్నారు అనేది తనిఖీలు చేయాలని చెబుతున్నారు.