వైసీపీ కార్యాలయం దగ్గర కారు కలకలం,,,రూ.16 కోట్ల మోసం చేశారని స్టిక్కర్లు

వైఎస్సార్‌సీపీ కేంద్ర కార్యాలయం దగ్గర ఓ కారు కలకలంరేపింది. వైఎస్సార్‌సీపీ వాళ్లు తన రూ.16 కోట్ల విలువైన ఆస్తి మోసం చేసి దోచుకున్నారంటూ ఓ వ్యక్తి పోస్టర్లు అంటించి కారును అక్కడే వదిలేశాడు. 'జగనన్నా మీకు చిత్తశుద్ధి ఉంటే దొంగలను పట్టుకోండి. న్యాయం చేయ లేకపోతే మేం ఆత్మహత్య చేసుకోవడానికి అనుమతించండి. నన్ను మోసం చేసిన వ్యక్తి ఇతనే.. మీ పార్టీ ఎమ్మెల్యే గంగుల నానితో మీతో ఆ వ్యక్తి దిగిన ఫొటోలివిగో..' అంటూ కారుపై అతికించి, తన మొబైల్‌ నంబరును కూడా ప్రస్తావించి కారును బాధితుడు సిద్ధంరెడ్డి రమణారెడ్డి అనే వ్యక్తి వదిలేసి వెళ్లారు.

నాలుగేళ్లుగా న్యాయం కోసం ప్రయత్నించినా ఫలితం లేకపోవడంతో ఇలా చేశానంటున్నారు రమణారెడ్డి. జిల్లా స్పందనలో 33 సార్లు ఫిర్యాదు చేశానని.. ముఖ్యమంత్రిని కలిసి విన్నవించుకుందామంటే అనుమతి లేదన్నారు. తనకు జరిగిన అన్యాయం గురించి చెప్పుకొనేందుకు అనుమతినివ్వాలని ఆయన మైకు పట్టకుని సీఎం క్యాంపు కార్యాలయం పరిసర ప్రాంతాల్లో ముఖ్యమంత్రికి వినిపించేలా కోరారు. తాను తీసుకున్న సెల్ఫీ వీడియోనూ కూడా ప్రదర్శించారు. కారును వదిలేసి విజయవాడకు చేరుకున్న బాధితుడ్ని మీడియా సంప్రదించగా.. అప్పుడువ వివరాలు చెప్పుకొచ్చాడు.

తమది నంద్యాల జిల్లా ఆళ్లగడ్డ మండలం పెద్దచింతకుంట అని చెప్పారు రమణారెడ్డి. తన బావ, వైఎస్సార్‌సీపీ నేత బాలిరెడ్డి, మరో నలుగురితో కలిసి 27 ఏళ్లుగా తన తండ్రి రసాయనాలు, పురుగుల మందుల వ్యాపారం చేశారన్నారు. లాభాలతో నంద్యాల, చుట్టుపక్కల ప్రాంతాల్లో భూములు కొనుగోలు చేశారని చెప్పుకొచ్చారు. వాటిలో తనకు రావాల్సిన రూ.16 కోట్ల ఆస్తిని బాలిరెడ్డి కొడుకు మల్లికార్జున రెడ్డి, ఆయన సోదరులు దౌర్జన్యంగా స్వాధీనం చేసుకున్నారని ఆరోపించారు.

మల్లికార్జున రెడ్డి ఆళ్లగడ్డ వైఎస్సార్‌సీపీ ఎమ్మెల్యే గంగుల బిజేంద్రనాథ్‌ (నాని) రెడ్డి అనుచరుడన్నారు రమణారెడ్డి. ఎవరికి చెప్పుకొంటావో చెప్పుకో అని బెదిరిస్తున్నారని.. నాలుగేళ్ల నుంచి తిరుగుతున్నా తనకు న్యాయం జరగలేదు అన్నారు. ఎమ్మెల్యేని కలిసి అడిగితే తనను మోసం చేసినవారి తరఫునే ఆయన మాట్లాడారన్నారు. కలెక్టర్‌, ఎస్పీ కార్యాలయాల్లో జరిగిన స్పందనలో ఫిర్యాదు చేసినా స్పందన లేదన్నారు. వైఎస్సార్‌సీపీ నేతలు తనను, తన కుటుంబాన్ని వేధిస్తున్నారని.. ముఖ్యమంత్రి అయినా కల్పించుకుని ఇప్పటికైనా న్యాయం చేయాలని కోరుతున్నామన్నారు. లేదంటే తమ కుటుంబం ఆత్మహత్య చేసుకునేందుకు అనుమతినివ్వాలని సీఎంను కోరుతున్నాను అన్నారు. ఈ విషయం స్థానికంగా చర్చనీయాంశమైంది. ఈ కారు వ్యవహారం స్థానికంగా చర్చనీయాంశం అయ్యింది. అంతేకాదు రమణారెడ్డి చేస్తున్న ఆరోపణలపై ఆళ్లగడ్డ ఎమ్మెల్యే స్పందించాల్సి ఉంది.