ఆటో మొబైల్ షాపు యజమానికి టోకరా,,,,నిమిషాల్లో మొబైల్ నుంచి డబ్బులు మాయం

మనం రోడ్డుపై వెళుతుంటే పరిచయం లేని వ్యక్తులు వచ్చి ఓ కాల్ చేసుకుంటామని మొబైల్ అడగ్గానే ఇస్తుంటారా.. అయితే ఈ మధ్య కొందరు అతి తెలివి ప్రదర్శిస్తున్నారు. కాల్ చేసుకుంటామని ఫోన్ తీసుకుని అకౌంట్ ఖాళీ చేస్తున్నారు. ఏలూరు జిల్లాలో తాజాగా ఇలాంటి తరహా మోసం బయటపడింది. జంగారెడ్డిగూడెంలో రామకృష్ణ ఆటోమొబైల్ షాప్ నడుపుతున్నారు. కస్టమర్లతో షాపు ఎప్పుడూ బిజీగా ఉంటుంది.. ఓ కేటుగాడి కన్ను ఆ షాపుపై పడింది. వెంటనే ఆటోమొబైల్ షాప్‌కు వెళ్లి కొన్ని సామాన్లు కొనుగోలు చేశాడు. కొద్దిసేపటి తర్వాత షాపు యజమాని రామకృష్ణ దగ్గరకు వెళ్లి.. వేరే వాళ్లకు ఫోన్ చేయాలని మొబైల్ అడిగాడు. తన షాపులోనే సామాన్లు కొనుగోలు చేయడంతో యజమానికి అనుమానం రాలేదు. కస్టమరే కదా అని అతడిని నమ్మి మాట్లాడటానికి మొబైల్ ఇచ్చాడు. అతడు ఫోన్ తీసుకుని డిజిటల్ లావాదేవీల ద్వారా టెక్నాలజీ ఉపయోగించి రామకృష్ణ అకౌంట్‌లో నుంచి రూ.99 వేలు నొక్కేశాడు. ఫోన్ మాట్లాడటం అయిపోయిందని షాపు యజమానికి తిరిగి ఇచ్చేసి.. అక్కడి నుంచి వెళ్లిపోయాడు.

రామకృష్ణ షాపులో రద్దీ ఎక్కువగా ఉండటంతో రామకృష్ణ మొబైల్‌ను గమనించలేదు. కొద్దిసేపటి తర్వాత మొబైల్‌ను గమనిస్తే.. అకౌంట్‌లో డబ్బుల్లో తేడా వచ్చిందని గమనించాడు. రూ.99 వేలు తన అకౌంట్ నుంచి మాయమైనట్లు తెలుసుకుని మోసపోయినట్లు గుర్తించాడు. వెంటనే జంగారెడ్డిగూడెం పోలీసులకు ఫిర్యాదు చేశాడు. షాపు యజమాని రామకృష్ణ ఫిర్యాదుతో కేసు నమోదు చేసి దర్యాప్తు ప్రారంభించారు పోలీసులు. గుర్తు తెలియని వ్యక్తులు మొబైల్ అడిగితే జాగ్రత్తగా ఉండాలని పోలీసులు హెచ్చరిస్తున్నారు. పరిచయం లేనివాళ్లకు ఇవ్వొద్దని సూచిస్తున్నారు.