రూ.10 లక్షల వ్యయంతో నిర్మాణం,,,వారం రోజుల తర్వాత కనిపించిన బస్టాప్

బెంగళూరు నగరంలో కర్ణాటక అసెంబ్లీకి కూతవేటు దూరంలో ఉన్న బస్స్టాప్ చోరీకి గురైన విషయం తెలిసిందే. రూ.10 లక్షల వ్యయంతో నిర్మించిన బస్టాప్ చోరీ కేసు సోమవారం అనూహ్య మలుపు తిరిగింది. అసలు ఆ బస్టాప్ చోరీ కాలేదని.. నాణ్యత లేకుండా నిర్మించడం వల్ల అధికారులే అక్కడి నుంచి తొలగించారని పోలీసుల దర్యాప్తులో వెల్లడయ్యింది. మరోవైపు, కనీసం నాణ్యత ప్రమాణాలు పాటించకుండా నిర్మించారంటూ సంబంధింత కంపెనీపై అధికారులు తిరిగి కేసు నమోదు చేయడం గమనార్హం.

కర్ణాటక అసెంబ్లీకి కిలోమీటరు దూరంలోని కన్నింగ్హామ్ రోడ్లో బస్స్టాప్ నిర్మాణ బాధ్యతలను సైన్బోర్డ్ అనే కంపెనీకి బృహత్ బెంగళూరు మహానగర పాలకె(బీబీఎంపీ) అప్పగించింది. ఈ నేపథ్యంలో మొత్తం రూ.10 లక్షల వ్యయంతో ఆగస్టు 21న బస్టాప్ నిర్మాణం పూర్తి చేశారు. అయితే, ఈ బస్టాప్ను పరిశీలనకు సైన్‌బోర్డు సంస్థ ప్రతినిధులు ఆగస్టు 28న వెళ్లారు. కానీ, అక్కడ వారికి బస్టాప్ కనిపించకపోయేసరికి ఖంగుతిన్నారు. వెంటనే బీబీఎంపీ అధికారులను సంప్రదించగా.. తమకేమీ తెలియదని బదులిచ్చారు. దీంతో కంపెనీ వైస్ ప్రెసిడెంట్ రవి రెడ్డి పోలీసులకు ఫిర్యాదు చేయగా..సెప్టెంబర్‌ 30న కేసు నమోదు చేసి దర్యాప్తు చేపట్టారు.

పోలీసుల విచారణలో అసలు విషయం వెలుగులోకి వచ్చింది. నిర్మాణం నాసిరకంగా ఉందని ఫిర్యాదులు వెల్లువెత్తడంతో స్థానిక శివాజీనగర్ ఎగ్జిక్యూటివ్ ఇంజినీర్ బస్టాప్ను పరిశీలించారు. ఆయన ఆదేశాలతో బస్టాప్ను అక్కడి నుంచి తొలగించి గోడౌన్కు తరలించినట్లు వెల్లడయ్యింది. పోలీసులు అక్కడ ఉన్న సీసీటీవీ ఫుటేజ్‌లు ఆధారంగా నిర్దారణకు వచ్చారు. బీబీఎంసీ కార్మికులు బస్టాప్‌ను తొలగించి.. సామాగ్రిని తరలిస్తోన్న దృశ్యాలు అందులో రికార్డయ్యాయి. అయితే, అసలు విషయం తెలియని కాంట్రాక్ట్ సంస్థ పోలీసులకు ఫిర్యాదు చేసింది. అయితే, నాణ్యత లేకుండా నిర్మించారంటూ కంపెనీపైనే అధికారులు తిరిగి కేసు నమోదు చేశారు. వసంతనగర్ సబ్-డివిజన్ పోలీస్ అధికారి మాట్లాడుతూ.. ‘మిస్టరీ వీడింది. ఇది దొంగతనం లేదా ఎత్తుకెళ్లడం కాదు.. నాసిరకం పని కారణంగా బీబీఎంపీ దాన్ని తొలగించింది.. కంపెనీ వైస్ ప్రెసిడెంట్ మాకు తప్పుదోవ పట్టించే ఫిర్యాదు ఇచ్చారు.. నాణ్యతలోపంపై వివరణ కోరుతూ నోటీసు ఇచ్చాం’ అని ఆయన తెలిపారు.