సంక్రాంతికి మూడు నెలల సమయం .. పందెం రాయుళ్ల అరెస్ట్

ఏలూరు జిల్లాపెదవేగి మండలం చక్రాయగూడెంలో కోడి పందేలు కలకలంరేపాయి. పక్కా సమాచారంతో పందేల శిబిరంపై ఎస్‌ఈబీ, పెదవేగి పోలీసులు దాడి చేశారు. చక్రాయగూడెం పరిధిలోని పుంతదారి పక్కనున్న ఆయిల్‌పామ్‌ తోటలో జనరేటర్‌ సాయంతో ఫ్లడ్‌ లైట్ల వెలుగులో కోడి పందేలు, జూదాలు నిర్వహిస్తున్నారు. పోలీసులు 70 బైక్‌లు, 38 కార్లు, 27 మంది జూదరులు, 26 కోళ్లు, 34 సెల్‌ఫోన్లు, రూ.90 వేల నగదు పట్టుకున్నారు. కొందరు మాత్రం బైక్‌లు, కార్లలో పరారయ్యారు. అలా పరారయ్యే క్రమంలో కొందరు ధర్మారావుపేట, మేదినరావుపాలెం పరిధిలోని తోటలు ధ్వంసం అయ్యాయి.

వెంటనే రైతులు వారిని ఆపగా.. పంట నష్టానికి రైతులకు పరిహారం చెల్లించి అక్కడి నుంచి వెళ్లినట్లు సమాచారం. చక్రాయగూడెం వెళ్లే దారిలో ఓ కారు అదుపు తప్పి రహదారి పక్కకు వెళ్లి ఆగింది. పోలీసుల నుంచి తప్పించుకునే క్రమంలో ప్రమాదానికి గురైనట్లు స్థానికంగా చర్చ జరుగుతోంది. ఈ ప్రమాదంలో కారులో ఉన్న వారికి గాయాలైనట్ తెలుస్తోంది. శనివారం రాత్రి జరిగిన పందేల్లో దెందులూరు, ఏలూరు, చింతలపూడి నియోజక వర్గాల నుంచి దాదాపుగా 1,500 మంది పాల్గొన్నట్లు తెలుస్తోంది.

ఇదిలా ఉంటే.. కొందరు రాజకీయ నేతల కనుసన్నల్లో గుట్టుచప్పుడు కాకుండా కోడి పందేలు నిర్విహిస్తున్నారనే విమర్శలు వస్తున్నాయి. ఈ పోలీసుల దాడిలో ఇతర ప్రాంతాలకు చెందిన వారు తప్ప స్థానికులు దొరకలేదని చెబుతున్నారు. వాస్తవానికి ఉమ్మడి ఉభయ గోదావరి జిల్లాల పరిధిలో కేవలం సంక్రాంతి సమయంలో మాత్రమే కోడి పందేలు నిర్వహిస్తారు. కానీ ఈసారి అక్టోబర్ నెలలోనే ప్రారంభించడం విశేషం. ముందుగానే పందెం రాయుళ్లు జూదం మొదలు పెట్టారు.