వసుంధర రాజే, గెహ్లాట్, పైలట్‌ల పోటీ అక్కడే,,,కాంగ్రెస్, బీజేపీ అభ్యర్థుల జాబితాలు విడుదల

రాజస్థాన్‌లో అధికార పీఠాన్ని తిరిగి దక్కించుకోవాలని కాంగ్రెస్ పార్టీ.. ఎలాగైనా కాంగ్రెస్‌ను గద్దె దించి తాము అధికారంలోకి రావాలని బీజీపీ వ్యూహ ప్రతివ్యూహాలతో దూసుకెళ్తున్నాయి. ఈ క్రమంలోనే పోటా పోటీగా అభ్యర్థుల జాబితాలను ఇరు పార్టీలు విడుదల చేస్తున్నాయి. తాజాగా బీజేపీ 83 మంది పేర్లతో రెండో జాబితాను విడుదల చేయగా.. కాంగ్రెస్ పార్టీ 33 మందితో తొలి జాబితాను వెల్లడించింది. తొలి జాబితాలో చోటు దక్కని రాజస్థాన్ మాజీ సీఎం వసుంధర రాజేకు రెండో జాబితాలో పేరు దక్కింది. ఇక కాంగ్రెస్ తొలి లిస్ట్‌లో సీఎం అశోక్ గెహ్లాట్‌తోపాటు సీనియర్ నేత సచిన్ పైలట్‌లు పోటీ చేసే స్థానాలను హస్తం పార్టీ ప్రకటించింది.

రాజస్థాన్‌లో సీఎం అభ్యర్థి ఎవరు అనేది ఇప్పటివరకు బీజేపీ ప్రకటించలేదు. అయితే మాజీ సీఎం వసుంధర రాజే ఆ స్థానానికి పోటీ పడుతున్నా.. కాషాయ పార్టీ అధిష్ఠానం ఆమె పట్ల సానుకూలంగా ఉన్నట్లు కనిపించడం లేదు. ఈ క్రమంలోనే ఆమెకు తొలి జాబితాలో స్థానం కల్పించకపోవడంతో ఈ ఊహాగానాలకు మరింత బలం చేకూరింది. అయితే శనివారం 83 మంది పేర్లతో విడుదల చేసిన రెండో జాబితాలో వసుంధర రాజేకు చోటు దక్కింది. ఆమె తన సొంత నియోజకవర్గం జల్రాపటన్ నుంచే పోటీ చేయనున్నారు. సింధియా రాజవంశానికి చెందిన వసుంధరా రాజే గతంలో రెండు సార్లు రాజస్థాన్ సీఎంగా పనిచేశారు. 2003 నుంచి 2008 వరకు.. 2013 నుంచి 2018 వరకూ ఆమె ముఖ్యమంత్రి పదవిలో ఉన్నారు. వసుంధరా రాజేతోపాటు అంబర్ నియోజకవర్గం నుంచి సతీష్ పునియా, తారానగర్ నుంచి రాజేంద్ర రాథోడ్, నాగపూర్ నుంచి జ్యోతి మీర్దా బీజేపీ తరఫున బరిలో ఉన్నారు. ఈ జాబితా విడుదల కోసం కేంద్ర హోం మంత్రి అమిత్‌ షా, బీజేపీ నేతలు బీఎల్ సంతోష్, వసుంధరా రాజే, ప్రహ్లాద్ జోషి, గజేంద్ర సింగ్ షెకావత్ సహా బీజేపీ కీలక నేతలు శుక్రవారం సమావేశమయ్యారు.

ఇక 33 మంది అభ్యర్థుల పేర్లతో తొలి జాబితాను కాంగ్రెస్ పార్టీ శనివారం విడుదల చేసింది. సీఎం అశోక్ గెహ్లాట్ సర్దా‌ర్‌పుర అసెంబ్లీ నియోజకవర్గం నుంచి పోటీ చేయనుండగా.. టోంక్ స్థానంలో సచిన్ పైలట్ బరిలో నిలవనున్నారు. వీరితోపాటు నాథ్‌ద్వారా నుంచి సీపీ జోషి, ఓసియన్ నుంచి దివ్య మడెర్న, లక్ష్మణ్‌గఢ్ నుంచి గోవింద్ సింగ్ డోటసర, సాదుల్‌పూర్ నుంచి కృష్ణ పునియా బరిలో ఉన్నారు. రాజస్థాన్‌ అసెంబ్లీలో 200 నియోజకవర్గాలు ఉండగా.. ముందుగా కేంద్ర ఎన్నికల సంఘం విడుదల చేసిన షెడ్యూల్ ప్రకారం నవంబర్ 23 వ తేదీన ఎన్నికలు జరగాల్సి ఉంది. అయితే ఆ రోజు రాజస్థాన్‌లో భారీగా పెళ్లిళ్లు ఉండటంతో పోలింగ్‌ తేదీని నవంబర్ 25 వ తేదీకి ఎన్నికల సంఘం వాయిదా వేసింది. ఇక ఐదు రాష్ట్రాలతోపాటే డిసెంబర్ 3 వ తేదీన ఫలితాలు వెలువనున్నాయి.