నేను రెడీ.. నారా భువనేశ్వరి సిద్ధమా.. మేమూ అదే కోరుకుంటున్నాం: మంత్రి రోజా

టీడీపీ అధినేత చంద్రబాబు సతీమణి మంత్రి రోజా సవాల్ చేశారు. భువనేశ్వరి కోరినట్లుగా తన ఆస్తుల విషయమై సీబీఐతో విచారణకు తాను సిద్ధమేనని.. వారు కూడా సిద్ధమేనా భువనేశ్వరీ అంటూ ఛాలెంజ్ విసిరు. గురువారం ఉదయం రాజమండ్రి నగరంలోని శ్రీ మార్కండేయేశ్వర స్వామి ఆలయాన్ని రాజమండ్రి ఎంపీ మార్గాని భరత్ రామ్ తో కలిసి సందర్శించారు. స్వామి, అమ్మవార్లకు ప్రత్యేక పూజలు, అభిషేకాలు, కుంకుమార్చనలు నిర్వహించారు.

స్కిల్ స్కామ్ లో వందల కోట్లు దోచుకుని సీఐడీ దర్యాప్తులో అడ్డంగా దొరికిపోయి.. రాజమండ్రి సెంట్రల్ జైలులో చంద్రబాబు ఉండటాన్ని చూసి భువనేశ్వరి ఏమి మాట్లాడుతున్నారో కూడా తెలియడం లేదని ఎద్దేవా చేశారు. నిజానికి ఒక్క చిన్న స్కామ్ కేసులోనే రూ.300 కోట్లకు పైగా చంద్రబాబు అడ్డంగా బొక్కేస్తే.. మరి ఆయన హయాంలో మిగిలిన స్కామ్‌లన్నీ బయటకు తీస్తే చంద్రబాబు జీవితాంతం జైల్లో ఉన్నా శిక్ష చాలదన్నారు. ఏ నేరం చేయకపోతే ఇన్ని రోజులు చంద్రబాబు జైలులో ఎందుకున్నాడో ముందు భువనేశ్వరి సమాధానం చెప్పాలన్నారు.

ఢిల్లీ నుంచి ప్రత్యేక విమానాల్లో కోట్లు ఖర్చుపెట్టి న్యాయవాదులను తీసుకొచ్చినా చంద్రబాబుకు రిలీఫ్ లేదంటే స్కిల్ స్కామ్ లో నేరం చేసినట్లేనన్నారు. టీడీపీ వాళ్లు అంటున్నట్టు 'నిజం గెలవాలని' తామూ కోరుకుంటున్నామని.. నిజం గెలిచి చంద్రబాబు, లోకేష్, భువనేశ్వరి జైలులో ఉండాలనే తామూ కోరుకుంటున్నామన్నారు. తన భర్త చంద్రబాబు రోజుకు రెండు మూడు గంటలే పడుకునే వారని భువనేశ్వరి చెబుతున్నారని.. మరి మిగిలిన గంటలన్నీ రాష్ట్రాన్ని ఎలా దోచుకోవాలనే ఆలోచనలతో పడుకునేవారు కాదన్న విషయం ఆమెకూ తెలుసన్నారు.

తన హెరిటేజ్2లో 2 శాతం వాటా అమ్మితే రూ.400 కోట్లు వస్తాయంటున్న భువనేశ్వరి.. మరి ఈ ఆస్తులను ఎన్నికల అఫిడవిట్ లో చంద్రబాబు ఎందుకు చూపలేదని ప్రశ్నించారు. ‌భువనేశ్వరి తన ఆస్తులపై సీబీఐ విచారణ జరిపించాలని అడుగుతున్నారని.. దానికి తాను సిద్ధమేనన్నారు. 1991లో చిత్ర పరిశ్రమకు వచ్చిన నాటి నుంచి తన ఆదాయం ప్రారంభమైందని.. సీబీఐ విచారణకు సిద్ధమేనన్నారు. మరి అదే సమయంలో భువనేశ్వరి కూడా ఆమె ఆస్తులపై సీబీఐ విచారణకు సిద్ధమేనా అని సవాల్ విసిరారు. ఆర్థిక నేరగాడికి సంకెళ్ళు వేస్తే మొత్తం రాష్ట్రానికే సంకెళ్ళు వేసినట్టు భువనేశ్వరి వ్యాఖ్యానించడాన్ని రాష్ట్ర ప్రజలు నవ్వుతున్నారని అన్నారు.

చంద్రబాబు అరెస్టు వార్త విని మృతిచెందిన కుటుంబ సభ్యులకు రూ.3 లక్షలు చొప్పున ఇస్తున్న విషయాన్ని మంత్రి ప్రస్తావించారు. చంద్రబాబు అరెస్టైంది సెప్టెంబర్ 9న అయితే 4వ తారీఖు సంతకంతో ఎలా చెక్ లిచ్చారని ప్రశ్నించారు. అంటే చంద్రబాబు అరెస్టు అవుతారని ముందే తెలిసి చెక్కులు సిద్ధం చేశారా అని మంత్రి ఆర్కే రోజా ప్రశ్నించారు. చంద్రబాబు అరెస్టుతో టీడీపీ నేతల చిన్న మెదడు పగిలిపోయి వారిష్టానుసారం మాట్లాడుతున్నారన్నారు. మొన్న ఒక మాజీ ఎమ్మెల్యే మాట్లాడుతూ చంద్రబాబు మరణవార్త తట్టుకోలేక అనేక మంది చనిపోయారని అనడాన్ని గుర్తు చేశారు.