రిజర్వేషన్లపై సామాజిక కార్యకర్త ఆమరణ దీక్ష,,,ప్రభుత్వానికి 40 రోజుల డెడ్‌లైన్ విధించిన మరాఠాలు

విద్య, ఉద్యోగాల్లో రిజర్వేషన్లు కోరుతూ మరాఠాలు చేపట్టిన ఆందోళనలు తీవ్రరూపం దాల్చాయి. ఈ క్రమంలో ఓ ప్రజాప్రతినిధి నివాసానికి ఆందోళనకారులు నిప్పంటించారు. బీడ్‌లోని నేషనలిస్ట్‌ కాంగ్రెస్‌ పార్టీ (ఎన్సీపీ) ఎమ్మెల్యే ప్రకాశ్‌ సోలంకే నివాసంపై దాడికి పాల్పడ్డి.. బయట ఉన్న వాహనాలపై రాళ్లు రువ్వి ధ్వంసం చేశారు. అనంతరం ఇంటికి నిప్పంటించడంతో పూర్తిగా దగ్ధమైంది. ఆ సమయంలో ఇంట్లోనే ఉన్న ఎమ్మెల్యే, ఆయన కుటుంబసభ్యులు త్రుటిలో తప్పించుకున్నారు. తాను, కుటుంబసభ్యులు, సిబ్బంది అక్కడ నుంచి సురక్షితంగా బయటపడినట్లు ఎమ్మెల్యే వెల్లడించారు. ‘దాడి సమయంలో నేను ఇంట్లోనే ఉన్నాను. అదృష్టవశాత్తు కుటుంబసభ్యులు, సిబ్బంది ఎవ్వరికీ ఎటువంటి గాయాలు కాలేదు. మేమంతా సురక్షితంగా బయటపడ్డాం.. కానీ, ఆస్తి నష్టం భారీగా సంభవించింది’ అని ఎమ్మెల్యే ప్రకాశ్‌ సోలంకే వెల్లడించారు. మరోవైపు, ఈ ఘటనపై శరద్ పవార్ కుమార్తె, ఎంపీ సుప్రీయా సూలే విమర్శలు గుప్పించారు. హోంమంత్రిత్వ శాఖ, ప్రభుత్వ వైఫల్యం వల్లే ఈ దాడి జరిగిందని సూలే ఆరోపించారు.

మరాఠా రిజర్వేషన్లు కోరుతూ సామాజిక కార్యకర్త మనోజ్ జరంగే పాటిల్‌ అక్టోబరు 25 నుంచి ఆమరణ నిరాహార దీక్ష చేపట్టారు. ఈ దీక్షపై పవావర్ వర్గానికి చెందిన ఎన్సీపీ ఎమ్మెల్యే సోలంకీ చేసిన వ్యాఖ్యలతో మరాఠాల్లో ఆగ్రహం కట్టలు తెంచుకుంది. దీంతో ఆయన నివాసంపై దాడికి పాల్పడ్డారు. ఈ ఘటనపై మహారాష్ట్ర సీఎం ఏక్‌నాథ్‌ షిండే స్పందిస్తూ. ఈ నిరసనలు ఎటువైపు వెళ్తున్నాయో అనే విషయాన్ని మనోజ్‌ జరంగే పాటిల్‌ గమనించాలని సూచించారు. తప్పుడు మార్గంలో వెళ్తున్నాయన్న షిండే.. దీనిపై ప్రభుత్వానికి సలహా ఇచ్చేందుకు ముగ్గురు నిపుణులతో కూడిన కమిటీని ఏర్పాటు చేస్తామని హామీ ఇచ్చారు. జాల్నా జిల్లాలోని అంతర్వాలీ సారథి గ్రామంలో మనోజ్ జరంగే పాటిల్‌ ఆమరణ దీక్ష చేస్తున్నారు. ఏ రాజకీయ నేతను గ్రామంలోకి అనుమతించవద్దని ఆయన కోరడంతో గ్రామస్థులు అడ్డుకుంటున్నారు. వైద్య పరీక్షల కోసం అధికారులు, వైద్యులు ప్రయత్నిస్తున్నప్పటికీ ఆయన నిరాకరిస్తున్నారు. ఆయన ఆరోగ్యంపై వైద్యులు ఆందోళన వ్యక్తం చేస్తోన్న సమయంలోనే.. మహారాష్ట్ర వ్యాప్తంగా ఆందోళనలు ఒక్కసారిగా తీవ్రరూపం దాల్చాయి. ఇదే సమయంలో ఎమ్మెల్యే చేసిన వ్యాఖ్యలతో మరింత రెచ్చిపోయారు. ‘రిజర్వేషన్ల అమలకు రాష్ట్ర ప్రభుత్వానికి 40 రోజుల గడువు విధించడం పిల్లల చేష్టలు.. గ్రామ పంచాయితీ ఎన్నికల్లో కూడా పోటీ చేయని వ్యక్తి ( పాటిల్‌) నేడు తెలివైన వ్యక్తిగా మారాడు.’ అని ఎమ్మెల్యే నోరు జారడంతో మరాఠాల్లో ఆగ్రహం కట్టలు తెంచుకుంది. ఆయన నివాసంపై దాడిచేసి.. నిప్పంటించారు.